କନକ ବ୍ୟୁରୋ : ଘନଉଛି ନର୍ଥ କୋରିଆ-ଆମେରିକା ବିବାଦ । ଯୁଦ୍ଧ ଏଡ଼ାଇବାକୁ କୂଟନୈତିକ ବିକଳ୍ପ ଖୋଲା ରହିଥିବା ନେଇ ଆମେରିକା ବିଦେଶ ମନ୍ତ୍ରୀ କହିବା ପରେ ଏହାକୁ ସମୟ ନଷ୍ଟ ବୋଲି କହିଛନ୍ତି ରାଷ୍ଟ୍ରପତି । ଲିଟିଲ୍ ରକେଟ୍ ମ୍ୟାନ୍ କିମ୍ ଜଙ୍ଗଙ୍କ ସହ କଥାବାର୍ତ୍ତା ପାଇଁ ଚେଷ୍ଟା କରି ରେକ୍ସ ନିଜର ସମୟ ବରବାଦ୍ କରୁଥିବା ଟ୍ୱିଟ୍ କରିଛନ୍ତି ଟ୍ରମ୍ପ । ଏଥିସହ ସମୟ ନଷ୍ଟ ନ କରି ନିଜ ଶକ୍ତି ସଂଚୟ କରିବାକୁ ଟ୍ରମ୍ପ ପରାମର୍ଶ ଦେଇଛନ୍ତି ନିଜ ବିଦେଶ ମନ୍ତ୍ରୀଙ୍କୁ । ଯାହା କରା ଯିବା ଉଚିତ ତାହା ହିଁ କରାଯିବ ବୋଲି ଟ୍ୱିଟ୍ ଜରିଆରେ ଟ୍ରମ୍ପ ଉଲ୍ଲେଖ କରିଛନ୍ତି । ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ଏଭଳି ବୟାନ ପୁଣି ଯୁଦ୍ଧ ପରିସ୍ଥିତିକୁ ସତେଜ କରିଛି ।
Kanak News is now on WhatsApp
Join and get latest news updates delivered to you via WhatsApp
ଗତ ୨୫ ବର୍ଷ ମଧ୍ୟରେ କିମ୍ ଜଙ୍ଗଙ୍କ ପ୍ରତି ଆମେରିକା ଉଦାରତାର ପ୍ରଭାବ ଦେଖିବାକୁ ମିଳିନଥିବା ବେଳେ ଏବେ କିପରି ମିଳିବ ବୋଲି ଅନ୍ୟ ଏକ ଟ୍ୱିଟ୍ରେ ପ୍ରଶ୍ନ କରିଛନ୍ତି ଟ୍ରମ୍ପ୍ । ଏହି ପ୍ରସଙ୍ଗରେ ପୂର୍ବ ଆମେରିକା ରାଷ୍ଟ୍ରପତି କ୍ଲିଂଟନ୍, ବୁଶ୍ ଓ ଓବାମା ବିଫଳ ହୋଇଥିବା ବେଳେ ସେ ବିଫଳ ହେବେ ନାହିଁ ବୋଲି ଦୃଢ଼ୋକ୍ତି କରିଛନ୍ତି ଟ୍ରମ୍ପ । ଏଥି ସହ ଟ୍ରମ୍ପଙ୍କ କୋରିଆ ବିରୋଧୀ ଆଭିମ୍ମୁଖ୍ୟ ପୁଣିଥରେ ସ୍ପଷ୍ଟ ଦେଖିବାକୁ ମିଳିଛି ।
ପୁଣିଥରେ ଆମେରିକା-ନର୍ଥ କୋରିଆ ଡାଏଲଗ୍ ଡ୍ରାମା ! କୋରିଆ ବିରୁଦ୍ଧରେ ଟ୍ରମ୍ପଙ୍କ କଡ଼ା ଆଭିମୁଖ୍ୟ :
ନର୍ଥ କୋରିଆର ରଣହୁଙ୍କାର ଏବଂ ଆମେରିକାର ଉତ୍ତର କୋରିଆକୁ ନିଶ୍ଚିହ୍ନ କରି ଦେବା ଧମକ ପରେ ଅଶାନ୍ତ ହୋଇଉଠିଥିଲା କୋରିଆ ଉପତ୍ୟକା । ତେବେ ଏହି ଘଡିସନ୍ଧି ମୁହୁର୍ତରେ କୂଟନୀତିର ଇସାରା ଦେଇଥିଲେ ଆମେରିକା ବିଦେଶ ମନ୍ତ୍ରୀ ରେକ୍ସ ଟିଲରସନ୍ । କୋରିଆ ରାଜି ହେଲେ ସିଧାସଳଖ କଥାବାର୍ତା ସମ୍ଭବ ବୋଲି କହିଥିଲେ ରେକ୍ସ । ଯାହାକୁ ସମୟ ନଷ୍ଟ ସହ ତୁଳନା କରିଛନ୍ତି ଆମେରିକା ରାଷ୍ଟ୍ରପତି ଟ୍ରମ୍ପ୍ ।
ନର୍ଥ କୋରିଆ ବନାମ ଆମେରିକା ! କାହା ସେନା କେତେ ଶକ୍ତିଶାଳୀ ?
ଆମେରିକାର ସକ୍ରିୟ ସେନା ସଂଖ୍ୟା ୧.୪ ନିୟୂତ ହୋଇଥିବାବେଳେ ନର୍ଥ କୋରିଆର ସକ୍ରିୟ ସେନା ସଂଖ୍ୟା ମାତ୍ର ୬.୯ ଲକ୍ଷ । ଆମେରିକା ନିକଟରେ ୨୨୦୭ଟି ଯୁଦ୍ଧ ବିମାନ ରହିଥିବାବେଳେ ନର୍ଥ କୋରିଆ ପାଖରେ ରହିଛି ୪୫୮ଟି ଯୁଦ୍ଧ ବିମାନ । ଆମେରିକା ନିକଟରେ ୬୧୯୬ଟି ଯୁଦ୍ଧ ହେଲିକପ୍ଟର ଥିବାବେଳେ ନର୍ଥ କୋରିଆ ପାଖରେ ରହିଛି ୨୦୨ଟି ହେଲିକପ୍ଟର । ଆମେରିକା ନିକଟରେ ୨୦ଟି ବିମାନବାହୀ ଜାହାଜ ଥିବାବେଳେ ନର୍ଥ କୋରିଆ ପାଖରେ ବିମାନବାହୀ ଯୁଦ୍ଧ ଜାହାଜ ନାହିଁ ।
ସେହିପରି ଆମେରିକା ନିକଟରେ ୬୨ଟି ଡେଷ୍ଟ୍ରୟର ଶ୍ରେଣୀୟ ଯୁଦ୍ଧାସ୍ତ୍ର ଥିବାବେଳେ ନର୍ଥ କୋରିଆ ନିକଟରେ ଏହି ଶ୍ରେଣୀର କୌଣସି ଯୁଦ୍ଧାସ୍ତ୍ର ନାହିଁ । ଆମେରିକା ନିକଟରେ ୨୦ଟି ଅତ୍ୟାଧୁନିକ ଯୁଦ୍ଧତରୀ ଥିବାବେଳେ ନର୍ଥ କୋରିଆ ପାଖରେ ଅତ୍ୟାଧୁନିକ ଯୁଦ୍ଧତରୀ ନାହିଁ । ସେହିପରି ଆମେରିକା ନିକଟରେ ୪୪୮୦ଟି ପରମାଣୁ ଅସ୍ତ୍ର ଥିବାବେଳେ ନର୍ଥ କୋରିଆର ପରମାଣୁ ଅସ୍ତ୍ର ସଂଖ୍ୟା ମାତ୍ର ୧୦ରେ ହିଁ ସୀମିତ । ଏଥିରୁ ସହଜରେ କୁହାଯାଇପାରେ ନର୍ଥ କୋରିଆ ଯୁଦ୍ଧ କଲେ କଣ ହେବ ସ୍ଥିତି । ତେବେ ପରିଣାମକୁ ଖାତିର ନ କରି କୋରିଆ ଜାରି ରଖିଛି ଯୁଦ୍ଧଖୋର ଆଭିମୁଖ୍ୟ ।