ତଲାକର ତତଲା ନିଆଁରେ ଜଳିବେନି ମହିଳା ! ଦେଖନ୍ତୁ ଟ୍ରିପଲ୍ ତଲାକ୍ ବିରୋଧରେ ଲଢିଥିବା ଓଡ଼ିଶାର ମୁସଲିମ୍ ଦମ୍ପତିଙ୍କ କାହାଣୀ
କନକ ବ୍ୟୁରୋ : ଆଉ ତିନି ତଲାକ୍ କହିଲେ ହେବନାହିଁ ମୁସଲମାନ ମହିଳାଙ୍କ ବିବାହ ବିଚ୍ଛେଦ । ଆଜି ଏକ ଐତିହାସିକ ରାୟରେ ୧୪ଶହ ବର୍ଷର ଏହି ପରମ୍ପରାରେ ପୂର୍ଣ୍ଣଛେଦ ଟାଣିଛନ୍ତି ସୁପ୍ରିମକୋର୍ଟ । ପ୍ରାୟ ୧୪ଶହ ବର୍ଷ ତଳୁ ମୁସଲମାନ ସଂପ୍ରଦାୟରେ ଚଳିଆସୁଥିବା ତିନି ତଲାକ ବ୍ୟବସ୍ଥାକୁ ଅସାମ୍ବିଧାନିକ ଘୋଷଣା କଲେ ସୁପ୍ରିମକୋର୍ଟଙ୍କ ୫ଜଣିଆ ସାମ୍ଭିଧାନିକ ଖଣ୍ଡପୀଠ । ୫ ଜଣ ଅଲଗା ଅଲଗା ଧର୍ମର ବିଚାରପତିଙ୍କ ମଧ୍ୟରୁ ୩ଜଣ ଏହାକୁ ଅସାମ୍ବିଧାନିକ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଜଷ୍ଟିସ କୁରିଏନ ଜୋସେଫ, ଆର.ଏଫ. ନରିମାନ ଏବଂ ୟୁ.ୟୁ. ଲଳିତ କହିଛନ୍ତି ତିନି ତଲାକ ବ୍ୟବସ୍ଥା ମୁସଲମାନ ମହିଳାଙ୍କ ମୌଳିକ ଅଧିକାରକୁ କ୍ଷୁର୍ଣ୍ଣ କରୁଛି । ତେବେ ମୁଖ୍ୟ ବିଚାରପତି ଜେ.ଏସ. ଖେହର ଓ ବିଚାରପତି ଏସ. ଅବଦୁଲ ନଜିର ରଖିଥିଲେ ଭିନ୍ନ ମତ । ତିନି ତଲାକ ବ୍ୟବସ୍ଥା ମୁସଲମାନଙ୍କ ଧର୍ମୀୟ ଅଧିକାର ଓ ଏହା ଅସାମ୍ବିଧାନିକ ନୁହେଁ ବୋଲି ମତ ଦେଇଥିଲେ । ଏପରିକି ୬ମାସ ଯାଏଁ ଏହା ଉପରେ ସ୍ଥଗିତାଦେଶ ଜାରି କରି ସଂସଦରେ ନୂଆ ଆଇନ ଆଣିବାକୁ ଦେଇଥିଲେ ପରାମର୍ଷ । ଶେଷରେ ୩-୨ ବହୁମତରେ ତିନି ତଲାକ ବ୍ୟବସ୍ଥାକୁ ଅସାମ୍ବିଧାନକ ଘୋଷଣା କରିଛନ୍ତି ସର୍ବୋଚ୍ଚ ନ୍ୟାୟାଳୟ ।
ସୁପ୍ରିମକୋର୍ଟଙ୍କ ଏହି ଯୁଗାନ୍ତକାରୀ ରାୟକୁ ଦଳମତ ନିର୍ବିଶେଷରେ ସବୁ ମହଲରୁ ସ୍ୱାଗତ କରାଯାଇଛି । ତିନି ତଲାକ ବ୍ୟବସ୍ଥାକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ପ୍ରାୟ ୭ଟି ଭିନ୍ନଭିନ୍ନ ପିଟିସନ କରାଯାଇଥିଲା । ପୂର୍ବରୁ ଏହା ମୁସଲମାନ ମହିଳାଙ୍କ ସମାନତାର ଅଧିକାର କ୍ଷୁର୍ଣ୍ଣ କରୁଥିବା ଦର୍ଶାଇ କୋର୍ଟରେ ବିରୋଧ କରିଥିଲେ କେନ୍ଦ୍ର ସରକାର । ଆଉ ଧର୍ମୀୟ ଭାବନା ସହ ଜଡିତ ଏହି ସମ୍ବେଦନଶୀଳ ପ୍ରସଙ୍ଗର ବିଚାର ପାଇଁ ଭିନ୍ନଭିନ୍ନ ୫ଟି ଧର୍ମର ବିଚାରପତିଙ୍କୁ ନେଇ ଗଠନ କରାଯାଇଥିଲା ସାମ୍ବିଧାନିକ ଖଣ୍ଡପୀଠ ।
ବିଶ୍ୱର ପାଖାପାଖି ୨୦ଟି ଦେଶରେ ତିନି ତଲାକକୁ ବେଆଇନ ଘୋଷଣା କରାଯାଇଥିବାବେଳେ ଭାରତରେ ଏହାକୁ ନେଇ ବାରମ୍ବାର ବିବାଦ ଉଠିଛି । ଶରିଆ ଆଇନ ଅନୁସାରେ ମୁସଲମାନ ସଂପ୍ରଦାୟରେ ଯେକୌଣସି ପୁରୁଷ ଚାହିଁଲେ ନିଜ ସ୍ତ୍ରୀଙ୍କୁ ତିନିଥର ତଲାକ କହି ବିବାହ ବିଚ୍ଛେଦ କରିପାରୁଥିଲେ । ତଲାକ ପରେ ପୁରୁଷ ବିବାହ ବନ୍ଧନରୁ ମୁକ୍ତ ହେଉଥିବାବେଳେ ମହିଳାଙ୍କ ଜୀବନ ଦୁର୍ବିସହ ହୋଇପଡୁଥିଲା । ଏବେ ସୁପ୍ରିମକୋର୍ଟଙ୍କ ରାୟ ଆସିବା ପରେ ସେପ୍ଟେମ୍ବର ୧୦ରେ ଭୋପାଲରେ କାର୍ଯ୍ୟକାରୀ ବୈଠକରେ ଆଗାମୀ ପଦକ୍ଷେପ ନେଇ ଆଲୋଚନା କରାଯିବ ବୋଲି କହିଛି ମୁସଲିମ ପର୍ସନାଲ ଲ ବୋର୍ଡ ।
ଟେଲିଗ୍ରାମ, ଟେଲିଫୋନ କିମ୍ବା ହ୍ୱାଟ୍ସଆପରେ ମଧ୍ୟ ମୁସଲମାନ ମହିଳାଙ୍କୁ ତିନି ତଲାକ କହି ବିବାହ ବନ୍ଧନରୁ ମୁକ୍ତ ହେବା ପରମ୍ପରାରେ ପୂର୍ଣ୍ଣଛେଦ ଟାଣିଛି ସୁପ୍ରିମକୋର୍ଟଙ୍କ ଏହି ଐତିହାସିକ ରାୟ ।
ଟ୍ରିପଲ ତଲାକକୁ ନେଇ ଏହି ଐତିହାସିକ ରାୟ, ମନେ ପକାଇ ଦେଉଛି ଭଦ୍ରକର ନଜମା ବିବିଙ୍କ କାହାଣୀ । ଯିଏ, ନ୍ୟାୟ ପାଇବା ପାଇଁ ଭଦ୍ରକରୁ ଦିଲ୍ଲୀ ଯାଏଁ ଯାଇଥିଲେ । ନିଶାଗସ୍ତ ଅବସ୍ଥାରେ ସ୍ୱାମୀ କହିଥିବା ତିନିଥର ତଲାକ୍ କେମିତି ଗୋଟିଏ ପରିବାର ଉଜାଡି ଦେଇଥିବା, ତାହା ଆଜିବି କାହା ମନରୁ ଲିଭିନି । ଆଉ ଆଜି ଯେତେବେଳେ ଏହି କୁପରମ୍ପରାକୁ ସୁପ୍ରିମକୋର୍ଟ ରଦ୍ଧ କରିଛନ୍ତି, ଏହାକୁ ସ୍ୱାଗତ କରିଛନ୍ତି ନଜମା ଏବଂ ତାଙ୍କ ପାଇଁ ଲଢ଼େଇ କରିଥିବା ସ୍ୱେଚ୍ଛାସେବୀ ସେଖ୍ ସୋଫିଆ ।
ଜୁଲାଇ ୨୦୦୩ :
ନଜମାଙ୍କ ଜୀବନରେ ଆସିଲା ଝଡ଼ । ଭାଙ୍ଗି ଗଲା ନଜମାଙ୍କ ସୁନାର ସଂସାର । ଆଉ ଏହା ପଛରେ ଥିଲା, ସାରିଆ ପ୍ରଥା ଅନୁସାରେ ଚାଲି ଆସିଥିବା ତଲାକ୍ ବ୍ୟବସ୍ଥା । ଘରୋଇ କଳିକୁ ନେଇ ସ୍ୱାମୀ-ସ୍ତ୍ରୀ ଝଗଡ଼ା ହେଲା, ଏବଂ ନଜ୍ମାଙ୍କ ସ୍ୱାମୀ ଶେଖ୍ ମହମ୍ମଦ ଓରଫ୍ ସେରୁ ନିଶାଗସ୍ତ ଅବସ୍ଥାରେ, ରାଗରେ ତିନିଥର ତଲାକ୍ କହିଦେଇଥିଲେ । ହେଲେ ସକାଳ ପାଇଲା ବେଳକୁ ସ୍ୱାମୀ-ସ୍ତ୍ରୀ ସଂପର୍କରେ ଆଗରେ ଛିଡ଼ା ହୋଇଥିଲା ସମାଜ । ତଲାକ୍ କହି ଦେଇଥିବାରୁ ଉଭୟଙ୍କୁ ଅଲଗା କରିବାରେ ଲାଗି ପଡ଼ିଥିଲା ବ୍ୟବସ୍ଥା ।
ନିଜ ୪ ପିଲାଙ୍କ ସହ ସ୍ୱାମୀଙ୍କ ଘର ଛାଡିବାକୁ ବାଧ୍ୟ କରାଯାଇଥିଲା ନଜ୍ମାଙ୍କୁ । ଆଉ ଏଭଳି ଘଡି ସନ୍ଧି ମୁହୁର୍ତରେ ନଜମାଙ୍କ ପାଖରେ ଠିଆ ହୋଇଥିଲେ ସ୍ୱେଚ୍ଛାସେବୀ ସେଖ୍ ସୋଫିଆ । ନ୍ୟାୟର ଏହି ଲଢ଼େଇ ସ୍ଥାନୀୟ ଅଦାଲତରୁ ସୁପ୍ରିମକୋର୍ଟ ଯାଏଁ ଯାଇଥିଲେ ନଜମା । ଆଉ ଶେଷରେ ନଜମାଙ୍କ ମିଳିଥିଲା ନ୍ୟାୟ ।
ପ୍ରାୟ ୧୪ଶହ ବର୍ଷର ଏହି ପୁରୁଣା ପରମ୍ପରା ଉପରେ ଆଜି ପୂର୍ଣ୍ଣଚ୍ଛେଦ ପଡ଼ିିଛି । ଆଉ ଏହି ଐତିହାସିକ ରାୟ ଆସିବା ପରେ ନଜମାଙ୍କ ପାଇଁ ଲଢ଼େଇ କରିଥିବା ସେକ୍ ସୋଫିଆ ଏହାକୁ ସ୍ୱାଗତ କରିଛନ୍ତି । ଏଣିକି ନଜମାଙ୍କ ଭଳି ଆଉ କୌଣସି ମହିଳା, ଆଉ ତଲାକ୍ର ଫାସରେ ଛନ୍ଦି ହେବେ ନାହିଁ । ଦେଶର ସ୍ୱାଧିନତାର ୭୦ ବର୍ଷରେ ପରେ ମୁସଲିମ୍ ମହିଳାଙ୍କୁ ମିଳିଛି ମୁକ୍ତିର ଆନନ୍ଦ ।