ବିଦେଶ ଯିବାକୁ ଚାହୁଁଥିଲେ ୮୪ ଦିନ ପୂର୍ବରୁ ବି ନେଇପାରିବେ କୋଭିସିଲ୍ଡ ଟିକା : ଛାତ୍ରଛାତ୍ରୀ, ଚାକିରିଆ ଓ ଖେଳାଳୀଙ୍କ ପାଇଁ ନିୟମ କୋହଳ କଲେ ସରକାର
କନକ ବ୍ୟୁରୋ : ବିଦେଶ ଯିବାକୁ ଚାହୁଁଥିବା ଛାତ୍ରଛାତ୍ରୀ, ଚାକିରିଆ ଓ କ୍ରୀଡାବିତଙ୍କ ପାଇଁ ଟିକା ନିୟମକୁ ପରିବର୍ତନ କରିଛନ୍ତି କେନ୍ଦ୍ର ସରକାର । ଏ ସଂପର୍କିତ କ୍ଷମତାପ୍ରାପ୍ତ ଗୋଷ୍ଠୀର ଅନୁମୋଦନ ପରେ ନିୟମ କୋହଳ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ନୂଆ ନିୟମ ଅନୁସାରେ ୮୪ ଦିନ ପୂର୍ବରୁ ମଧ୍ୟ କୋଭିସିଲ୍ଡର ଦ୍ୱିତୀୟ ଡୋଜ୍ ନେଇପାରିବେ ବିଦେଶ ଯିବାକୁ ଚାହୁଁଥିବା ଛାତ୍ରଛାତ୍ରୀ କିମ୍ବା ଚାକାରିଆ । କିନ୍ତୁ ପ୍ରଥମ ଡୋଜ୍ ନେବାର ୨୮ ଦିନ ପରେ ହିଁ ଦ୍ୱିତୀୟ ଡୋଜ୍ ନେବାକୁ କୁହାଯାଇଛି । ଟୋକିଓ ଅଲିମ୍ପିକ୍ସରେ ଯୋଗଦେବାକୁ ଥିବା ଭାରତୀୟ ଖେଳାଳି ମଧ୍ୟ ୮୪ ଦିନ ପୂର୍ବରୁ କୋଭିସିଲ୍ଡ ଟିକାର ଦ୍ୱିତୀୟ ଡୋଜ୍ ନେଇପାରିବେ । କାରଣ ବିଦେଶ ଯିବା ପାଇଁ ଦୁଇଟି ଡୋଜ୍ କୋରନା ଟିକା ବାଧ୍ୟତାମୂଳକ ରହିଛି ।
ଏହାକୁ ସୁନିଶ୍ଚିତ କରିବା ପାଇଁ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଂଚଳ ଜଣେ ଲେଖାଏଁ ନୋଡାଲ ଅଧିକାରୀଙ୍କୁ ନିଯୁକ୍ତ କରିବେ । ଏହି ଅଧିକାରୀ ହିଁ ଆବଶ୍ୟକ ନଥିପତ୍ର ଯାଂଚ୍ କରି ୮୪ ଦିନ ପୂର୍ବରୁ ଟିକା ଦେବାଲାଗି ସ୍ଥିର କରିବେ । ବିଦେଶ ଯିବାକୁ ଚାହୁଁଥିବା ଛାତ୍ରଛାତ୍ରୀଙ୍କୁ ଶିକ୍ଷାନୁଷ୍ଠାନର ନାମଲେଖା ପ୍ରମାଣପତ୍ର ଏବଂ ଚାକିରିଆଙ୍କୁ ସଂସ୍ଥାର ନିଯୁକ୍ତି ପତ୍ର ଦେବାକୁ ପଡିବ । ଖେଳାଳିମାନେ ମଧ୍ୟ ବୈଧ ଡକ୍ୟୁମେଂଟ ଦେଇ ୮୪ ଦିନ ଆଗରୁ କୋଭିସିଲ୍ଡ ଟିକାର ଦ୍ୱିତୀୟ ଡୋଜ୍ ନେଇପାରିବେ ।