ବାଲେଶ୍ୱର ରୁଟରେ ଟ୍ରେନ ଚଳାଚଳ ସ୍ୱାଭାବିକ । ରେଳବ୍ରିଜରୁ ସ୍ଲାବ ଖସିବା ପରେ ଯୁଦ୍ଧକାଳୀନ ଭିତ୍ତିରେ ହେଲା ମରାମତି
ପ୍ରଥମେ ଟ୍ରେନକୁ ଡିଜେଲ ଇଞ୍ଜିନରେ ଚଳାଯିବା ସହ ପରେ କରାଯାଇଥିଲା ବିଦ୍ୟୁତ ସଂଯୋଗ
କନକ ବ୍ୟୁରୋ: ବାଲେଶ୍ୱର ରୁଟରେ ସ୍ୱାଭାବିକ ହେଲା ଟ୍ରେନ୍ ଚଳାଚଳ । ବାଲେଶ୍ୱର ରେଳଷ୍ଟେସନ ଦକ୍ଷିଣ ପାଶ୍ୱର୍ରେ ନିର୍ମାଣଧୀନ ଏକ ଓଭରବ୍ରିଜ ଉପରୁ ଏକ ଲୁହାସ୍ଲାବ ଖସିପଡିଥିଲା । ଏହାସହ ଦୁଇଟି ସ୍ଲାବ ବଙ୍କା ହୋଇ ନଇ ପଡିଥିଲା । ଗାର୍ଡର ଖସିପଡିବା ଯୋଗୁଁ ରେଳଧାରଣା ଉପର ଦେଇ ଯାଇଥିବା ସମସ୍ତ ବିଦ୍ୟୁତ ତାର ଛିଡିପଡିଥିଲା । ଫଳରେ ବାଲେଶ୍ୱର ଦେଇ ଦକ୍ଷିଣ ପୂର୍ବ ରୁଟରେ ଚଳାଚଳ କରୁଥିବା ସମସ୍ତ ଟ୍ରେନ ବନ୍ଦ ରହିଥିଲା ।
Kanak News is now on WhatsApp
Join and get latest news updates delivered to you via WhatsApp
ରେଳଧାରଣା ଯାଇଥିବା ଅଂଶର ଉଭୟ ପାଶ୍ୱର୍ରେ ନିର୍ମିତ ଦୁଇଟି ଖମ୍ଭ ଉପରେ କ୍ରେନ ସାହାଯ୍ୟରେ ୬ଟି ସ୍ଲାବ ବସାଯିବାର ଥିଲା । ଏହି କାମ ଚାଲିଥିବା ବେଳେ ଗୋଟିଏ ଗାର୍ଡର ତଳକୁ ଖସିପଡିଥିଲା । ପରେ ଦ୍ୱିତୀୟ ଓ ତୃତୀୟ ଗାର୍ଡର ମଧ୍ୟ ତଳକୁ ଓହଳି ପଡିଥିଲା । ଫଳରେ ବିଦ୍ୟୁତ ତାର ମଧ୍ୟ ଛିଣ୍ଡିଯାଇଥିଲା । ଅଘଟଣ ଆଶଙ୍କାରେ ସ୍ଥାନୀୟ ଅଂଚଳକୁ ଆରପିଏଫ ଓ ପୁଲିସ ଦ୍ୱାରା ସିଲ୍ କରିଦିଆଯାଇଥିଲା । ପରେ ଦକ୍ଷିଣ ପୂର୍ବ ରେଳପଥ ଖଡଗପୁର ଡିଭିଜନର ଡିଆରଏମ ଓ ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଂଚି ସମୀକ୍ଷା କରିବା ପରେ କାମ ଆରମ୍ଭ ହୋଇଥିଲା ।
କ୍ରେନ ସାହାଯ୍ୟରେ ସବୁ ଗାର୍ଡରକୁ ଉପରୁ ତଳକୁ ଆଣିବା ପରେ ପଡିଥିବା ଗାର୍ଡରକୁ ଗ୍ୟାସ କଟରରେ କଟାଯାଇ ରେଳଧାରଣା ଉପରୁ ହଟାଯାଇଥିଲା । ମରାମତି କାମ ସରିବା ପରେ ପ୍ରଥମେ ଅଟକି ରହିଥିବା ଟ୍ରେନ ଗୁଡିକୁ ଡିଜେଲ ଇଂଜିନ ସାହାଯ୍ୟରେ ଚଳାଯାଇଥିବା ବେଳେ ରାତି ୨ଟା ପରେ ବିଦ୍ୟୁତ ସଂଯୋଗ କରାଯାଇଥିଲା । ତେବେ ଓଭରବ୍ରିଜ କାମ ରେଳବାଇ ନିର୍ମାଣ ବିଭାଗ ଦ୍ୱାରା କରାଯାଉଥିବା ବେଳେ କେଉଁ କାରଣରୁ ସ୍ଲାବ ଖସିଲା ଓ ତ୍ରୁଟି ରହିଲା ତାହାର ତଦନ୍ତ କରାଯିବ ବୋଲି ସୂଚନା ଦେଇଛନ୍ତି ରେଳବାଇ ଡିଭିଜନାଲ ଟ୍ରାଫିକ ଇନସପେକ୍ଟର ।