କନକ ବ୍ୟୁରୋ: ବଙ୍ଗୋପ ସାଗରର ବାଂଲାଦେଶ ଏବଂ ମିଆଁମାର ଉପକୂଳରେ ସୃଷ୍ଟି ହୋଇଥିବା ୨ଟି ଘୂର୍ଣ୍ଣିବଳୟ ଏବେ ଗୋଟିଏ ଘୂର୍ଣ୍ଣିବଳୟରେ ପରିଣତ ହୋଇଛି । ୪୮ ଘଣ୍ଟା ମଧ୍ୟରେ ଏହା ଓଡ଼ିଶା ଉପକୂଳ ଆଡ଼କୁ ମୁହାଁଇବ । ଏହାର ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ବିଶେଷ କରି ଦକ୍ଷିଣ ଓଡ଼ିଶାରେ ଅଧିକ ବର୍ଷା ହେବ ବୋଲି ପୂର୍ବାନୁମାନ କରିଛି ପାଣିପାଗ କେନ୍ଦ୍ର ।
Kanak News is now on WhatsApp
Join and get latest news updates delivered to you via WhatsApp
ସୂଚନାନୁସାରେ, ୨ଟି ଘୂର୍ଣ୍ଣିବଳୟର ମିଶ୍ରଣ ହେବା ପରେ ଗତକାଲି ଏହା ଉତ୍ତର ପୂର୍ବ ବଙ୍ଗୋପ ସାଗରର ବାଂଲାଦେଶରୁ ଅଗରତାଲା ନିକଟରେ କେନ୍ଦ୍ରୀଭୂତ ହୋଇଛି । ପାଣିପାଗ କେନ୍ଦ୍ର ନିର୍ଦେଶକ ଡ. ଶରତ ଚନ୍ଦ୍ର ସାହୁଙ୍କ କହିବା ମୁତାବକ, ଏହି ଘୂର୍ଣ୍ଣିବଳୟ ଲଘୁଚାପରେ ପରିଣତ ହୋଇପାରେ । ଲଘୁଚାପଟି ଓଡ଼ିଶା ଉପକୂଳ ନିକଟକୁ ବି ଗତି କରିବାର ସମ୍ଭାବନା ଅଧିକ । ବର୍ତ୍ତମାନ ପାଇଁ ଏ ନେଇ କେବଳ ପୂର୍ବାନୁମାନ କରାଯାଉଛି ।
ଆଜି ଘୂର୍ଣ୍ଣିବଳୟର ସ୍ଥିତିରୁ ଏହା କେଉଁ ଦିଗକୁ ଗତି କରିବ ଏବଂ ବର୍ଷା କରାଇବ ତା’ର ରୂପରେଖ ସ୍ପଷ୍ଟ ହୋଇଯିବ ବୋଲି ସେ କହିଛନ୍ତି । ତେବେ ଏହାର ପ୍ରଭାବରେ ରାଜ୍ୟର ଦକ୍ଷିଣରେ ଅଧିକ ବର୍ଷା ହେବାର ସମ୍ଭାବନା ଥିବା ବେଳେ ଉତ୍ତର, ଉପକୂଳ ଏପରି କି ଆଭ୍ୟନ୍ତରୀଣ ଅଞ୍ଚଳର କିଛି ସ୍ଥାନରେ ବି ବର୍ଷା ହୋଇପାରେ । ଏଭଳି ବର୍ଷା ଆସନ୍ତା ୨୮ ତାରିଖ ପର୍ଯ୍ୟନ୍ତ ଲାଗି ରହିବ ।
ତେବେ ଗତ ୨୪ ଘଣ୍ଟାରେ ଗୋପରେ ସର୍ବାଧିକ ୮୦ ମିଲିମିଟର ବର୍ଷା ହୋଇଥିଲା । ସେହିପରି ଗଜପତି ଜିଲ୍ଲାର ନୂଆଗଡ଼, ରାଇକିଆରେ ୫୦ ମି.ମି., ଆସ୍କା, ବାଲିଗୁଡ଼ା, କାକଟପୁର, ସାଲେଭଟାରେ ୩୦ ମି.ମି., କନ୍ଧମାଳ ଜିଲ୍ଲାର କେ.ନୂଆଗଡ଼, ସୋରଡ଼ା, ଅସ୍ତରଙ୍ଗରେ ୨୦ ମି.ମି. ବର୍ଷା ହୋଇଥିଲା । ଆଜି ସନ୍ଧ୍ୟା ସୁଦ୍ଧା ମାଲକାନଗିରିରେ ସର୍ବାଧିକ ୨୨ ମି.ମି. ବର୍ଷା ହୋଇଥିବା ବେଳେ ବାଲେଶ୍ୱର, ସମ୍ବଲପୁର, କେନ୍ଦୁଝର ଆଦି ସ୍ଥାନମାନଙ୍କରେ ସାମାନ୍ୟ ବର୍ଷା ହୋଇଥିବା ଖବର ମିଳିଛି ।