ଶ୍ରୀମନ୍ଦିରରେ ଜନ୍ମାଷ୍ଟମୀ : ଆଜି ୫ ଘଣ୍ଟା ବନ୍ଦ ରହିବ ସାଧାରଣ ଦର୍ଶନ
କନକ ବ୍ୟୁରୋ : ପବିତ୍ର ଭାଦ୍ରବ ଶୁକ୍ଳ ସପ୍ତମୀ ତିଥିରୁ ଶ୍ରୀମନ୍ଦିରରେ କୃଷ୍ଣଲୀଳା ଆରମ୍ଭ ହେଉଛି । ଏହି ପରିପ୍ରେକ୍ଷୀରେ ମହାପ୍ରଭୁଙ୍କୁ ରବିବାର ଯେଉଡ଼ ଭୋଗ ଲାଗି ହୋଇଛି। ଆସନ୍ତା ୩୧ ତାରିଖ ପର୍ୟ୍ୟନ୍ତ ପ୍ରତ୍ୟେକ ଦିନ ଏଭଳି ନୀତି ରହିଛି । ତେବେ ସୋମବାର ସର୍ବାଧିକ ନୀତି ରହିଥିବାରୁ ଅପରାହ୍ଣ ୪ଟା ୩୦ରୁ ରାତି ୧୦ଟା ୩୦ ପର୍ୟ୍ୟନ୍ତ ସାଧାରଣ ଦର୍ଶନ ବନ୍ଦ ରହିବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ମହାପ୍ରଭୁ ସ୍ୱୟଂ ନିଜ ପେଟରୁ ଜନ୍ମ ନେବେ। ସେ ଗର୍ଭଧାରଣ କରିଥିବାରୁ ତାଙ୍କୁ ଖଟା ଫଳ(ଯେଉଡ଼) ତରକାରୀ ଭୋଗ ଲାଗି କରାଯାଇଛି । ସନ୍ଧ୍ୟା ଆଳତି ବେଶରେ ମହାପ୍ରଭୁଙ୍କୁ ସୁନା ଅଳଙ୍କାର ଲାଗି ହେବା ପରେ ଜୟବିଜୟ ଦ୍ଵାର ବନ୍ଦ କରି ଅଣସର ପିଣ୍ଡି ଠାରେ ଏହି ଭୋଗ ରଖାଯାଇଥିଲା । ମୁଦିରସ୍ତ ଶ୍ରୀଅଙ୍ଗରେ ପ୍ରସାଦ ଲାଗି କରିଥିବା ବେଳେ ପୂଜାପଣ୍ଡା ପଞ୍ଚୋପଚାରରେ ପୂଜା କରିଥିଲେ । ଏହି ନୀତି ପାଇଁ ତିନିବାଡ଼ରେ ଗୋଟିଏ ଅଧିକ ବନ୍ଦାପନା ହୋଇଥିଲା । ତାହା ହେଉଛି ଗର୍ଭଉଦକ ବନ୍ଦାପନା। ଆସନ୍ତାକାଲି ଶ୍ରୀକୃଷ୍ଣ ଜନ୍ମ ନେବେ। ଗର୍ଭକଷ୍ଟରୁ ମୁକ୍ତି ଦେବା ପାଇଁ ଏହି ଭୋଗ ଲାଗି କରାଯିବା ସହ ବନ୍ଦାପନା ହୋଇଛି ।