ଝାରସୁଗୁଡ଼ାରେ କାଲି ଗଣତି ପୂର୍ବରୁ କଡ଼ା ସୁରକ୍ଷା : ଷ୍ଟ୍ରଙ୍ଗ ରୁମରେ ଇଭିଏମ ଓ ଭିଭିପାଟ ମେସିନ; ୧୪ ଟେବୁଲରେ ହେବ ମୋଟ୍ ୧୮ ରାଉଣ୍ଡ ଗଣତି
କନକ ବ୍ୟୁରୋ : ଝାରସୁଗୁଡ଼ା ଉପବନିର୍ବାଚନ ପାଇଁ ମତଦନା ଶେଷ ହେବା ପରେ ଷ୍ଟ୍ରଙ୍ଗ ରୁମରେ କଡ଼ା ସୁରକ୍ଷା ଭିତରେ ଇଭିଏମ ଏବଂ ଭିଭିପାଟ ମେସିନକୁ ରଖାଯାଇଛି । ଏହି ସୁରକ୍ଷାକୁ ଦୃଷ୍ଟିରେ ରଖି ଷ୍ଟ୍ରଙ୍ଗ ରୁମକୁ ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା କରାଯାଇଛି । ଷ୍ଟ୍ରଙ୍ଗ ରୁମର ସଂପୂର୍ଣ୍ଣ ଏରିଆ ସିସିଟିଭି ସ୍କାନରେ ରହିଛି ।
Kanak News is now on WhatsApp
Join and get latest news updates delivered to you via WhatsApp
କୌଣସି ପରିସ୍ଥିତିରେ ମଧ୍ୟ ବିନା ଅନୁମତିରେ କେହି ବି ଭିତରକୁ ଯାଇ ପାରିବେ ନାହିଁ ବୋଲି ଜିଲ୍ଲା ଆରକ୍ଷୀ ଅଧିକ୍ଷକ ସୂଚନା ଦେଇଛନ୍ତି । ଭୋଟ ଗଣତି ଦାୟିତ୍ୱରେ ଥିବା ଅଧିକାରୀମାନଙ୍କୁ ଆଜି ଦାୟିତ୍ୱ ପ୍ରଦାନ କରାଯାଇଛି । ଆସନ୍ତାକାଲି ସକାଳ ୮ଟାରୁ ଭୋଟ ଗଣତି ପ୍ରକ୍ରିୟା ଆରମ୍ଭ ହେବ । ମୋଟ ୧୪ଟି ଟେବୁଲରେ ୧୮ ରାଉଣ୍ଡ ପର୍ଯ୍ୟନ୍ତ ଭୋଟ ଗଣତି କରାଯିବା ବୋଲି ରିଟର୍ଣ୍ଣିଂ ଅଫିସର ତଥା ଉପଜିଳ୍ଲାପାଳ କିଶୋର ଚନ୍ଦ୍ର ସ୍ୱାଇଁ ସୂଚନା ଦେଇଛନ୍ତି ।
ଝାରସଗୁଡ଼ାବାସୀଙ୍କୁ ମିଳିବ ନୂଆ ନେତା । ନିର୍ବାଚନମଣ୍ଡଳୀକୁ ମିଳିବ ନୂଆ ବିଧାୟକ । ଭୋଟ ଗଣତି ପାଇଁ ସବୁ ପ୍ରସ୍ତୁତି ଏକ ପ୍ରକାର ସରିଛି । ଏପଟେ ଗଣତି ପୂର୍ବରୁ ପ୍ରାର୍ଥୀମାନଙ୍କ ଛାତି ଧଡ଼ଧଡ଼ । କିଏ ମାରିବ ବାଜି, କିଏ ପିନ୍ଧିବ ବିଜୟ ମୁକୁଟ, ଆଉ କାହାକୁ ଦେଖିବାକୁ ପଡ଼ିବ ପରାଜୟର ମୁହଁ, ଏସବୁ କେବଳ ଗଣତି ପରେ ହିଁ ଜଣାପଡ଼ିବ । ତେବେ ସବୁ ପ୍ରାର୍ଥୀଙ୍କ ମଧ୍ୟରେ ଚିନ୍ତା ଓ ଉତ୍ସୁକତା ରହିଛି । ବିଜେଡି, ବିଜେପି ଓ କଂଗ୍ରେସ ସବୁ ଦଳ ଦମ୍ଭୋକ୍ତି କରୁଛନ୍ତି ଯେ, ସେମାନଙ୍କ ପ୍ରାର୍ଥୀ ହିଁ ଜିତିବ । ହେଲେ ଫଳାଫଳ ଆସିବା ପରେ ହିଁ ଚିତ୍ର ସ୍ପଷ୍ଟ ହୋଇଯିବ ।