୩ ଭାରତୀୟଙ୍କୁ ନେଇ ମହାକାଶ ଯିବ ‘ଗଗନଯାନ’ ! ମାତ୍ର ୧୬ ମିନିଟରେ ଶ୍ରୀହରିକୋଟାରୁ ମହାକାଶ ଯାତ୍ରା ।
ଆସନ୍ତା ୨୦୨୧ ଦ୍ୱିତୀୟ ଭାଗରେ ଭାରତ ମହାକାଶକୁ ଜଣେ ନୁହେଁ ୩ ଜଣକୁ ପଠାଇବ ଓ ଏମାନଙ୍କ ମଧ୍ୟରେ ଜଣେ ମହିଳା ମହାକାଶଚାରୀ ରହିବାର ସମ୍ଭାବନା ରହିଛି ବୋଲି ଇସ୍ରୋ ଅଧ୍ୟକ୍ଷ କେ. ସିବନ କହିଛନ୍ତି ।
କନକ ବ୍ୟୁରୋ: ମହାକାଶକୁ ଯିବେ ଭାରତର ମଣିଷ । ଆସନ୍ତା ୨୦୨୨ ସୁଦ୍ଧା ଭାରତ ମହାକାଶକୁ ମଣିଷ ପଠାଇବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜର ସ୍ୱାଧୀନତା ଦିବସ ଅଭିଭାଷଣରେ ଘୋଷଣା କରିଥିଲେ । ଏନେଇ ଗତ ମାସରେ କେନ୍ଦ୍ର କ୍ୟାବିନେଟ ମଧ୍ୟ ଏହି ପ୍ରକଳ୍ପକୁ ସବୁଜସଂକେତ ଦେଇ ପ୍ରାୟ ୧୦ ହଜାର କୋଟି ମଂଜୁର କରିଛି । ଏହି ଲକ୍ଷ୍ୟକୁ ହାସଲ କରିବାକୁ ଭାରତୀୟ ମହାକାଶ ଗବେଷଣା ସଂସ୍ଥା ଇସ୍ରୋ ପ୍ରସ୍ତୁତି ଆରମ୍ଭ କରିଦେଇଛି ।
Kanak News is now on WhatsApp
Join and get latest news updates delivered to you via WhatsApp
ଆସନ୍ତା ୨୦୨୧ ଦ୍ୱିତୀୟ ଭାଗରେ ଭାରତ ମହାକାଶକୁ ଜଣେ ନୁହେଁ ୩ ଜଣକୁ ପଠାଇବ ଓ ଏମାନଙ୍କ ମଧ୍ୟରେ ଜଣେ ମହିଳା ମହାକାଶଚାରୀ ରହିବାର ସମ୍ଭାବନା ରହିଛି ବୋଲି ଇସ୍ରୋ ଅଧ୍ୟକ୍ଷ କେ. ସିବନ କହିଛନ୍ତି । ମୁଖ୍ୟତଃ ଭାରତୀୟ ବାୟୁସେନାର ପାଇଲଟ ମାନଙ୍କୁ ଏଥିପାଇଁ ଚୟନ କରାଯିବ । ତେବେ ଏହି ପ୍ରକଳ୍ପ ପାଇଁ ମହାକାଶଚାରୀ ଚୟନ ଏପର୍ଯ୍ୟନ୍ତ ଆରମ୍ଭ ହୋଇନାହିଁ ବୋଲି ସେ କହିଛନ୍ତି ।
ମହାକାଶ ଯାତ୍ରାକୁ ନେଇ ଭାରତୀୟ ଇତିହାସ ମଧ୍ୟ ଅଧିକ ଗଭୀରତାରେ ରହିଛି । ପୂର୍ବରୁ ଭାରତୀୟ ବଂଶୋଦ୍ଭବ ଆମେରିକୀୟ ମହିଳା କଳ୍ପନା ଚାଓ୍ଵାଲା ଓ ସୁନୀତା ଓ୍ଵିଲିୟମ୍ସ ମହାକାଶ ଯାତ୍ରା କରିଥିଲେ । ତେବେ ଭାରତର ଏହି ମିଶନକୁ ସଫଳ କରିବ ‘ଗଗନଯାନ’ । ଶ୍ରୀହରିକୋଟା ରକେଟ ଉତକ୍ଷେପଣ କେନ୍ଦ୍ରରୁ ‘ଗଗନଯାନ’ ଉତକ୍ଷେପ ହେବାର ମାତ୍ର ୧୬ ମିନିଟ ମଧ୍ୟରେ ୩ ଜଣ ଭାରତୀୟ ମହାକାଶଚାରୀ ମହାକାଶରେ ପହଞ୍ଚିବେ । ସେମାନେ ଲୋ-ଆର୍ଥ ଅରବିଟରେ ୫ରୁ ୭ ଦିନ କଟାଇବା ପରେ ପୃଥିବୀ ପୃଷ୍ଠକୁ ଫେରିଆସିବେ । ମହାକାଶ ଯାନଟି ଗୁଜୁରାଟ ଉପକୂଳ ଆରବ ସାଗରରେ ପଡିବ । ତେବେ ଯଦି କୌଣସି ପ୍ରାକୃତିକ କିମ୍ବା ଯାନ୍ତ୍ରୀକ ତ୍ରୁଟି ଦେଖାଦିଏ ତେବେ ଜରୁରୀପରିସ୍ଥିତିରେ ଗଗନଯାନକୁ ବଙ୍ଗୋପସାଗରରେ ମଧ୍ୟ ପକାଇବାର ଯୋଜନା ରହିଛି ବୋଲି ଇସ୍ରୋ ଅଧ୍ୟକ୍ଷ କେ. ସିବନ କହିଛନ୍ତି ।