ଅରୁଣାଚଳପ୍ରଦେଶ ହେଲା କରୋନା ମୁକ୍ତ । ଶେଷ ୩ ଆକ୍ରାନ୍ତ ସୁସ୍ଥ ହେବା ପରେ ପୁରା କରୋନା ମୁକ୍ତ ହୋଇଛି ରାଜ୍ୟ ।
କନକ ବ୍ୟୁରୋ : ଦେଶରେ କରୋନା ସଂକ୍ରମଣ ଦ୍ୱିତୀୟ ଲହର ଆରମ୍ଭ ହୋଇ ଯାଇଛି । ଏନେଇ ଦେଶରେ ୮ ରାଜ୍ୟରେ ଏବେ କରୋନା ସଂକ୍ରମଣ ପୁଣି ବଢିବାରେ ଲାଗିଛି । ଯାହାକୁ ନେଇ ରାଜ୍ୟ ମାନଙ୍କ ଠାରୁ କେନ୍ଦ୍ର ସରକାର ପୁଣି କରୋନା କଟକଣା ଜାରି କରିବାକୁ ଚିନ୍ତା କରୁଥିବା ବେଳେ ଦେଶର ଗୋଟିଏ ରାଜ୍ୟ କରୋନା ମୁକ୍ତ ହେବା ଭଳି ଏକ ଖୁସି ଖବର ଆସିଛି ।
Kanak News is now on WhatsApp
Join and get latest news updates delivered to you via WhatsApp
ସ୍ୱାସ୍ଥ୍ୟ ବିଭାଗର ଜଣେ ବରିଷ୍ଠ ଅଧିକାରୀଙ୍କ ସୂଚନା ମୁତାବକ ଅରୁଣାଚଳ ପ୍ରଦେଶ ଏବେ ଦେଶର ପ୍ରଥମ କରୋନାମୁକ୍ତ ରାଜ୍ୟ ପାଲଟିଛି । ରାଜ୍ୟରେ ଚିକିତ୍ସିତ ହେଉଥିବା ଶେଷ ୩ ଜଣ କରୋନା ସଂକ୍ରମିତ ଗତକାଲି ସୁସ୍ଥ ହେବା ପରେ ଅନ୍ୟ କୌଣସି ସଂକ୍ରମିତ ଚିହ୍ନଟ ହୋଇନାହାନ୍ତି । ଏପର୍ଯ୍ୟନ୍ତ ରାଜ୍ୟରେ ମୋଟ ୧୬,୮୩୬ ଜଣ କରୋନାରେ ସଂକ୍ରମିତ ହୋଇଥିଲେ । ସେମାନଙ୍କ ମଧ୍ୟରୁ ୧୬,୭୮୦ ଜଣ ସୁସ୍ଥ ହୋଇ ଘରକୁ ଫେରିଛନ୍ତି । ୫୬ ଜଣଙ୍କର କରୋନାରେ ମୃତ୍ୟୁ ହୋଇଛି ।
ରାଜ୍ୟ ସର୍ଭିଲାନ୍ସ ଅଫିସର ଲବସାଙ୍ଗ କାମ୍ପା କହିଛନ୍ତି କି ଗତ ୨୪ ଘଂଟା ମଧ୍ୟରେ ରାଜ୍ୟରେ କୌଣସି କରୋନା ସଂକ୍ରମିତ ଚିହ୍ନଟ ହୋଇ ନାହାନ୍ତି । ରାଜ୍ୟରେ ସୁସ୍ଥ ହାର ୯୯.୬୬ ରହିଥିବା ବେଳେ ସଂକ୍ରମିତଙ୍କ ହାର ପାଖାପାଖି ଶୂନ ରହିଛି । ଏହାସହ ଜାନୁଆରୀ ୧୬ ତାରିଖରୁ ଆରମ୍ଭ ହୋଇଥିବା ଟିକାକରଣରେ ରାଜ୍ୟରେ ୩୨,୩୨୫ ଜଣ ସ୍ୱାସ୍ଥ୍ୟକର୍ମୀ ଓ ଆଗଧାଡିର କରୋନାଯୋଦ୍ଧାଙ୍କୁ ଟିକା ଦିଆଯାଇଥିବା କଥା କାମ୍ପା ସୂଚନା ଦେଇଛନ୍ତି ।