ଆସନ୍ତାକାଲି ସାରା ଦେଶର ରାଜମାର୍ଗରେ କୃଷକ ସଂଗଠନ କରିବ ଚକା ଜାମ୍ । ହେଲେ ଦିଲ୍ଲୀରେ ଗଡିବ ଗାଡି । ଶାନ୍ତିପୂର୍ଣ୍ଣ ଆନ୍ଦୋଳନ ପାଇଁ କୃଷକ ସଂଗଠନ ସହ ପୋଲିସ ପ୍ରସ୍ତୁତ
କନକ ବ୍ୟୁରୋ : କେନ୍ଦ୍ର ସରକାରଙ୍କ ଦ୍ୱାରା ପାରିତ ୩ କୃଷି ଆଇନକୁ ଦେଶର କୃଷକ ସଂଗଠନ ମାନେ ବିରୋଧ କରି ୨ ମାସରୁ ଅଧିକ ସମୟ ହେବ ଦେଶର ବିିଭିନ୍ନ ସ୍ଥାନରେ ଧାରଣାରେ ବସିଛନ୍ତି । ଏହି କ୍ରମରେ ସରକାର ଓ କୃଷକ ସଂଗଠନ ମାନଙ୍କ ଭିତରେ ଏନେଇ ୧୧ ଥର ଆଲୋଚନା ହୋଇଥିଲେ ବି କୌଣସି ନିସ୍କର୍ଷ ବାହାରିପାରି ନାହିଁ । ଯାହାକୁ ନେଇ ଆସନ୍ତା କାଲି ତଥା ଫେବୃଆରୀ ୬ ତାରିଖ ଦିନ କୃଷକ ସଂଗଠନ ମାନେ ସାରା ଦେଶରେ ୩ ଘଂଟା ପାଇଁ ଚକା ଜାମ୍ କରିବାକୁ ଆହ୍ୱାନ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏନେଇ ଆନ୍ଦୋଳନରତ କୃଷକ ସଂଗଠନର ନେତା ମାନେ ଆଜି କହିଛନ୍ତି କି ଦିଲ୍ଲୀକୁ ଛାଡି ଦେଶର ଅନ୍ୟ ସମସ୍ତ ରାଜମାର୍ଗରେ କାଲି ଏହି ଚକାଜାମ୍ ଆନ୍ଦୋଳନ କରାଯିବ । କୃଷକ ନେତା ଦର୍ଶନପାଲ୍ ସିଂ କହିଛନ୍ତି କି ଦିଲ୍ଲୀ ବ୍ୟତିତ ଅନ୍ୟସବୁ ସ୍ଥାନରେ ଆନ୍ଦୋଳନ କରାଯିବ ଓ ଦିଲ୍ଲୀର ସମସ୍ତ ସୀମାରେ କୃଷକ ମାନେ ଶାନ୍ତିପୂର୍ଣ୍ଣ ଭାବେ ବସି ରହିବେ । ଏହି ଆନ୍ଦୋଳନ ବେଳେ ରାଷ୍ଟ୍ରୀୟ ରାଜମାର୍ଗ ଓ ରାଜ୍ୟ ରାଜମାର୍ଗ ଉପରେ କୃଷକ ମାନେ ଧାରଣା ଦେବେ । ଦିନ ୩ ଟାରେ ଯେତେବେଳେ ଚକାଜାମ୍ ଆନ୍ଦୋଳନ ସମାପ୍ତ ହେବ ସେତେବେଳେ ସାରା ଦେଶର ଆନ୍ଦୋଳନକାରୀ ମାନେ ୧ ମିନିଟ୍ ପର୍ଯ୍ୟନ୍ତ ସେମାନଙ୍କ ଗାଡିର ହର୍ଣ୍ଣ ବଜାଇବେ । ଭାରତୀୟ କିଷାନ ୟୁନିୟନର ରାଷ୍ଟ୍ରୀୟ ପ୍ରବକ୍ତା ରାକେଶ ଟିକାୟତ କହିଛନ୍ତି କି ଯେଉଁ କୃଷକ ମାନେ ଏଠାକୁ ଆସିପାରୁ ନାହାନ୍ତି ସେମାନେ ଆସନ୍ତା କାଲି ନିଜ ନିଜ ଅଞ୍ଚଳରେ ଚକାଜାମ୍ ଆନ୍ଦୋଳନରେ ସାମିଲ ହୋଇପାରିବେ ।
ଅନ୍ୟପଟେ ଆନ୍ଦୋଳନରେ ପୁଣି ହିଂସା କୁ ନଜରରେ ରଖି ସରକାର ଆନ୍ଦୋଳନ ସ୍ଥଳରେ ଇଣ୍ଟରନେଟ୍ ସେବା ବନ୍ଦ ରଖିଛନ୍ତି । ଏହାସହ ଦିଲ୍ଲୀ ପୋଲିସ ଏବେ ବି ଦିଲ୍ଲୀର ବିଭିନ୍ନ ସୀମାରେ ଲୁହା କିଳା ପୋତିବା କାମ ଜାରି ରଖିଛି । ଦିଲ୍ଲୀର ବିଭିନ୍ନ ସୀମାରେ ସୁରକ୍ଷାବଳ ବଢାଇଛନ୍ତି ସରକାର । ଆନ୍ଦୋଳନର ଭିଡ ଭିତରେ ଯେଭଳି ଭାବେ ଦେଶଦ୍ରୋହୀ ଶକ୍ତି ମାନେ ଆତଙ୍କ ନ ଖେଳାନ୍ତି ସେ ନେଇ ବି ବେସ୍ ସଜାଗ ରହିଛି ଗୁଇନ୍ଦା ବିଭାଗ ।
ସେପଟେ ଦ୍ରୋଣାଚାର୍ଯ୍ୟ ସମ୍ମାନରେ ସମ୍ମାନିତ ପାଲ ସିଂହ ସନ୍ଧୁ ଓ ପଦ୍ମଶ୍ରୀ ସମ୍ମାନରେ ସମ୍ମାନିତ କୁସ୍ତିଯୋଦ୍ଧା କରତାର ସିଂ କୃଷକ ମାନଙ୍କୁ ତ୍ରୀରଙ୍ଗାର ମହତ୍ୱ ବୁଝାଇବାକୁ ସିଂଘୁ ସୀମାରେ ପହଂଚିଥିବା ଦେଖିବାକୁ ମିଳିଛି ।