କନକ ବ୍ୟୁରୋ: ୫୦ରୁ ଅଧିକ ଦିନ ଧରି ରୁଷ୍ ଓ ୟୁକ୍ରେନ୍ ମଧ୍ୟରେ ଯୁଦ୍ଧ ଜାରି ରହିଛି । ଯୁଦ୍ଧ କେବେ ସରିବ ଓ କିପରି ଶାନ୍ତି ଫେରିବ, ତାକୁ ନେଇ ସମସ୍ତେ ଚିନ୍ତିତ ଅଛନ୍ତି । କିନ୍ତୁ ଏହାରି ଭିତରେ ଆମେରିକାର ଏକ ଆକଳନ ସମଗ୍ର ବିଶ୍ୱ ପାଇଁ ଚିନ୍ତା ବଢ଼ାଇ ଦେଇଛି । ଆମେରିକା ପକ୍ଷରୁ କୁହାଯାଇଛି, ଏହି ଯୁଦ୍ଧ ଚଳିତ ବର୍ଷ ଶେଷ ହେବ ନାହିଁ ବରଂ ଏହା ଦୀର୍ଘ ଦିନ ଧରି ଚାଲିବ । କୃଷ୍ଣ ସାଗରରେ ରୁଷର ଅତି ଗୁରୁତ୍ୱପୂର୍ଣ୍ଣ ଯୁଦ୍ଧ ଜାହାଜ ମସ୍କୋଭା ବୁଡ଼ିଯିବା ପରେ ରୁଷ୍ ପ୍ରତିଶୋଧ ପରାୟଣ ହୋଇପଡ଼ିଛି । ଏହି ଜାହାଜକୁ ୟୁକ୍ରେନ୍ ଧ୍ୱଂସ କରିଦେବା ପରେ ରୁଷ୍ ପୁଣିଥରେ କିଭ୍ ଓ ପଶ୍ଚିମ ୟୁକ୍ରେନରେ ଘନଘନ ଆକ୍ରମଣ କରିଛି । ଶୁକ୍ରବାର ରାତିରେ ରୁଷର ଆକ୍ରମଣରେ ୟୁକ୍ରେନର ଦୁଇଟି ସାମରିକ ପ୍ରତିଷ୍ଠାନ ଧ୍ୱଂସ ହୋଇଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସେହିପରି ୟୁକ୍ରେନର ରାଜଧାନୀ କିଭ୍ ଅନ୍ତର୍ଜାତୀୟ ବିମାନ ବନ୍ଦର ନିକଟରେ ରୁଷ୍ ଏକ ପ୍ଲାଣ୍ଟକୁ ମିଜାଇଲ୍ ମାଡ଼ କରି ଛାରଖାର କରିଦେଇଛି । ଆଗାମୀ ଦିନରେ କିଭରେ ଆକ୍ରମଣ ଆହୁରି ଜୋରଦାର ହେବ ବୋଲି ରୁଷ୍ ଚେତାବନୀ ଦେଇସାରିଛି । ସେହିପରି ରୁଷର ଯୁଦ୍ଧ ଜାହାଜ ଶନିବାର ଲଭିଭରେ ଗୋଳାବର୍ଷା କରିଛି । ଏପରିକି ମାରିୟୁପୋଲ ରାସ୍ତାଘାଟରେ ମଧ୍ୟ ଲଢ଼େଇ ଜାରି ରହିଛି । ତେଣୁ ଏସବୁ ଯୁଦ୍ଧକୁ ଆହୁରି ଲମ୍ବା କରିବ ଏବଂ ଏହା ୨୦୨୨ ଶେଷ ପର୍ଯ୍ୟନ୍ତ ଚାଲିବ ବୋଲି କହିଛି ଆମେରିକା କହିଛି ।
ଅନ୍ୟପଟେଙ୍କ ୟୁକ୍ରେନ୍ ଉପରେ ରୁଷର ଆକ୍ରମଣ ୫୩ ଦିନରେ ପହଞ୍ଚିଛି । ଏହାରି ଭିତରେ ରୁଷ୍ ୟୁକ୍ରେନର ୮ଟି ସହର ଉପରେ ଏୟାର୍ ଷ୍ଟ୍ରାଇକ୍ କରିଛି । ଏଥିରେ କିଛି ନାଗରିକଙ୍କର ମୃତ୍ୟୁ ହେବା ସହ ଶତାଧିକ ଆହତ ହୋଇଥିବା ୟୁକ୍ରେନର ରାଷ୍ଟ୍ରପତି କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି । ଗତ ୨୪ ଘଣ୍ଟା ମଧ୍ୟରେ ରୁଷ୍ ଯେଉଁ ୮ଟି ସହର ଉପରେ ଆକ୍ରମଣ କରିଛି, ସେଗୁଡ଼ିକ ହେଲେ ଡୋନେସ୍କ, ଲୁହାନସ୍କ, ପୂର୍ବରେ ଥିବା ଖାରକିଭ୍, ନିପ୍ରୋପେଟ୍ରୋଭସ୍କ, ପୋଲଟଭା, କିରୋଭୋରାଡ୍, ଦକ୍ଷିଣରେ ଥିବା ମାଇକୋଲେଭ୍ ଓ ଖେରସନ୍ ।
ଶୁକ୍ରବାର ଖାରକିଭରେ ୯ଜଣ ସାଧାରଣ ନାଗରିକଙ୍କ ମୃତ୍ୟୁ ଘଟିଥିବା ବେଳେ ୫୦ରୁ ଅଧିକ ଲୋକ ଆହତ ହୋଇଥିବା ରିପୋର୍ଟରେ ଦର୍ଶାଯାଇଛି । ସେହିପରି ଦକ୍ଷିଣ ମାଇକୋଲେଭରେ ଶୁକ୍ରବାର ଓ ଶନିବାର ପ୍ରବଳ ଗୋଳାବର୍ଷା ହୋଇଥିଲା । ଶୁକ୍ରବାର ହୋଇଥିବା ଏୟାରଷ୍ଟ୍ରାଇକରେ ୫ଣଙ୍କ ମୃତ୍ୟୁ ହୋଇଥିବା ବେଳେ ୧୫ରୁ ଅଧିକ ଆହତ ହୋଇଛନ୍ତି । ସେପଟେ ୟୁକ୍ରେନର ଲିସିଚାନସ୍କ ସହରରେ ଥିବା ଏକ ତୈଳ ବିଶୋଧନାଗାର ଉପରେ ରୁଷୀୟ ସେନାର ଗୋଳାବର୍ଷା ଦ୍ୱାରା ସେଠାରେ ବଡ଼ ଧରଣର ଅଗ୍ନିକାଣ୍ଡ ଘଟିଥିବା ଜଣାପଡ଼ିଛି । ତେବେ ତୈଳ ବିଶୋଧନଗାରକୁ ଟାର୍ଗେଟ୍ କରାଯିବା ଘଟଣା ପ୍ରଥମ ନୁହେଁ । ଆକ୍ରମଣ ସମୟରେ ତୈଳ ବିଶୋଧନଗାରରେ କୌଣସି ଇନ୍ଧନ ନଥିଲା । ତେଣୁ ତୈଳ ଆବର୍ଜନାର ଅବଶେଷ ଗୁଡ଼ିକ ଜଳିଯାଇଥିଲା ବୋଲି ଜଣାପଡ଼ିଛି ।