କରୋନା ଯୋଗୁଁ କଲବଲ ହେଉଛି ଆମେରିକା । ବଢୁଛି ସଂକ୍ରମଣ,ଡାକ୍ତରଖାନାରେ ମିଳୁନି ବେଡ୍ । ସେପଟେ ଆଫ୍ରିକାରୁ ଆସିଲା ଆଶ୍ୱସ୍ତିକର ଖବର
କନକ ବ୍ୟୁରୋ: ପ୍ରତିଦିନ ୮ରୁ ୯ ଲକ୍ଷ ନୂଆ କରୋନା ମାମଲା ସାଙ୍ଗକୁ ଅଢେଇ ହଜାରରୁ ଅଧିକ ମୃତ୍ୟୁ । ଆମେରିକାରେ ଓମିକ୍ରନ ଭୂତାଣୁ ଯୋଗୁଁ କରୋନା ସଂକ୍ରମଣର ବିସ୍ଫୋରଣ ଲାଗିରହିଛି । ଡେଲ୍ଟା ଭଳି ଓମିକ୍ରନ୍ ଭୟାବହ ହେବନାହିଁ ଏବଂ ଅଧିକ ଲୋକ ଗୁରୁତର ହେବେ ନାହିଁ ବୋଲି ଆକଳନ କରାଯାଉଥିଲା । ହେଲେ ଆମେରିକାରେ ଲଗାତର ହସ୍ପିଟାଲ ଉପରେ ଚାପ ବଢିବାରେ ଲାଗିଛି । ସଂକ୍ରମଣ ଯେତେ ବ୍ୟାପକ ହେଉଛି ସ୍ୱାସ୍ଥ୍ୟସେବା ଉପରେ ଚାପ ସେତେ ବଢିଯାଉଛି । ଗତ ସପ୍ତାହ ଅପେକ୍ଷା ହସ୍ପିଟାଲରେ ରୋଗୀ ସଂଖ୍ୟା ୨୦ ପ୍ରତିଶତ ବୃଦ୍ଧି ହୋଇଥିବାବେଳେ ପ୍ରତିଦିନ ପ୍ରାୟ ଦେଢଲକ୍ଷ ଲୋକ ହସ୍ପିଟାଲକୁ ଆସୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆମେରିକ ଭୂତାଣୁ ବିଶେଷଜ୍ଞ ଆନ୍ଥୋନି ଫସିଙ୍କ କହିବା ହେଲା, ଓମିକ୍ରନର ସଂକ୍ରାମକ କ୍ଷମତା ଏତେ ଅଧିକ ଯେ, ଏହା ପ୍ରତ୍ୟେକ ବ୍ୟକ୍ତିଙ୍କୁ ଖୋଜି ଖୋଜି ସଂକ୍ରମିତ କରିପାରିବ । ଗତ ସପ୍ତାହରେ ସାରାବିଶ୍ୱରେ ପ୍ରାୟ ଦେଢକୋଟି ଲୋକ ଓମିକ୍ରନ୍ ସଂକ୍ରମିତ ହେବା ପରେ ଟିକା ନେଇନଥିବା ଲୋକଙ୍କ ପାଇଁ ଏହା ବିପଦ ଆଣିପାରେ ବୋଲି ଚେତାଇ ଦେଇଥିଲା ହୁ ।
ଏପଟେ ଦକ୍ଷିଣ ଆଫ୍ରିକାରେ ଓମିକ୍ରନ୍ ପ୍ରଜାତି ଯୋଗୁଁ ଆସିଥିବା କରୋନାର ଚତୁର୍ଥ ଲହର ପ୍ରାୟ ୬ ମାସର ଦ୍ରୁତ ସଂକ୍ରମଣ ପରେ କମିବା ଆରମ୍ଭ ହୋଇଛି । ୬ ସପ୍ତାହ ଧରି ଦେଶରେ ପ୍ରାୟ ୧ କୋଟି ଲୋକଙ୍କୁ ସଂକ୍ରମିତ କରିବା ପରେ ଏହା ଏକପ୍ରକାର ପ୍ଲାଟ୍ୟୁ ସ୍ଥିତିକୁ ଆସିଯାଇଥିବା କହିଛନ୍ତି ଆଫ୍ରିକାରେ ଥିବା ଡବ୍ଲୁଏଚଓର ଆଂଚଳିକ ନିର୍ଦ୍ଦେଶକ । ତାଙ୍କ ମତରେ ଆଫ୍ରିକାରେ ଏହା ସବୁଠାରୁ କମ୍ ଅବଧିର ପିକ୍ ଥିଲା । ପୂର୍ବ ସପ୍ତାହ ଅପେକ୍ଷା ଚଳିତ ସପ୍ତାହରେ କରୋନା ସଂକ୍ରମଣ ହାର ୧୪ ପ୍ରତିଶତ କମ୍ ରହିଛି । ସେହିପରି ହସ୍ପିଟାଲରେ ରୋଗୀଙ୍କ ସଂଖ୍ୟା ମଧ୍ୟ ହ୍ରାସ ପାଇଛି । ପ୍ରାୟ ୫ ହଜାର ୬ଶହ ଆଇସିୟୁ ବେଡରୁ ୯ ପ୍ରତିଶତ ଅକ୍ତିଆର ହୋଇଛି । କିନ୍ତୁ ପୂର୍ବ ସପ୍ତାହ ଅପେକ୍ଷା ମୃତ୍ୟୁ ହାର ୬୪ ପ୍ରତିଶତ ବଢିଛି । କାରଣ ଟିକା ନେଇନଥିବା ଓ ଜଟିଳ ରୋଗ ଥିବା ଅଧିକାଂଶ ବ୍ୟକ୍ତି କରୋନା ସଂକ୍ରମିତ ହୋଇଛନ୍ତି ।
କରୋନାର ଓମିକ୍ରନ୍ ପ୍ରଜାତି ପ୍ରଥମେ ଦକ୍ଷିଣ ଆଫ୍ରିକାରେ ହିଁ ଚିହ୍ନଟ ହୋଇଥିଲା । ୨୦୨୦ ନଭେମ୍ବର ୨୪ ତାରିଖରେ ଏହାକୁ ଚିହ୍ନଟ କରି ଡବ୍ଲୁଏଚଓକୁ ଜଣାଇବା ପରେ ନଭେମ୍ବର ୨୬ରେ ଏହାକୁ ଭାରିଆଂଟ ଅଫ କନସର୍ଣ୍ଣ ଘୋଷଣା କରଥିଲା ବିଶ୍ୱ ସ୍ୱାସ୍ଥ୍ୟ ସଂଗଠନ ।
ଦକ୍ଷିଣ ଆଫ୍ରିକାରେ ଡେଲ୍ଟାର ସ୍ଥାନ ନେଇ ସାରିଛି ଓମିକ୍ରନ୍ ଭୂତାଣୁ । ବିଶେଷଜ୍ଞଙ୍କ ଅନୁସାରେ ମାତ୍ର ୨ ସପ୍ତାହରେ ଓମିକ୍ରନ ସାରା ଆଫ୍ରିକାରେ ଡେଲ୍ଟାର ସ୍ଥାନ ନେଇଗଲା । ଏବଂ ୬ ସପ୍ତାହରେ ଏହା ଶୀର୍ଷକୁ ଛୁଇଁ ପୁଣି ପ୍ଲାଟ୍ୟୁ ସ୍ଥିତିକୁ ଆସିଯାଇଛି । ତେଣୁ ଏହା ସବୁଠାରୁ କମ୍ ସମୟରେ ଦକ୍ଷିଣ ଆଫ୍ରିକାରେ ପିକରେ ପହଂଚି ପୁଣି ହ୍ରାସ ପାଇଛି ।