ବଢ଼ୁଛି ଏସିଏଫ ସୌମ୍ୟରଞ୍ଜନ ମୃତ୍ୟୁର ରହସ୍ୟ । ପତ୍ନୀଙ୍କ ସହ ସଂପର୍କ ନରଖିବା ପାଇଁ ପତି-ପତ୍ନୀଙ୍କ ମଧ୍ୟରେ ହୋଇଥିଲା ଏଗ୍ରିମେଣ୍ଟ
କନକ ବ୍ୟୁରୋ: ପାରଳାଖେମୁଣ୍ଡି ଏସିଏଫ ସୌମ୍ୟରଞ୍ଜନଙ୍କ ମୃତ୍ୟୁ ରହସ୍ୟ ଦିନକୁ ଦିନ ଆହୁରି ରହସ୍ୟ ମୟ ହେବାରେ ଲାଗିଛି । ସୌମ୍ୟଙ୍କର ମୃତ୍ୟୁ ଯେମିତି ବି ହେଉନା କାହିଁକି ତାଙ୍କ ପତ୍ନୀଙ୍କ ସହ ତାଙ୍କର ବୈବାହିକ ଠିକ୍ ଠାକ୍ ନଥିଲା, ଏହା ଧିରେ ଧିରେ ସାମନାକୁ ଆସିବାରେ ଲାଗିଛି । ଏପରିକି ବିବାହ କରିଥିଲେ ବି ଫିଲ୍ମର କାହାଣୀ ପରି ଦୁହେଁ ଶାରୀରିକ ସମ୍ପର୍କ ନରଖିବାକୁ ଏଗ୍ରିମେଂଟ କରିଥିଲେ ବୋଲି ଅଭିଯୋଗ କରିଛନ୍ତି ସୌମ୍ୟଙ୍କ ପରିବାର ଲୋକ । ଅନ୍ୟପଟେ ଉଚ୍ଚସ୍ତରୀୟ ତଦନ୍ତ ସହ ଡିଏଫଓଙ୍କ ବଦଳି ଦାବି କରିଛନ୍ତି ମୃତ ସୌମ୍ୟଙ୍କ ବାପା ।
Kanak News is now on WhatsApp
Join and get latest news updates delivered to you via WhatsApp
ପାରଳାଖେମୁଣ୍ଡି ଏସିଏଫଙ୍କ ମୃତ୍ୟୁ ରହସ୍ୟ ଉପରୁ ପରଦା ଉଠିବାକୁ ଯେତିକି ବିଳମ୍ବ ହେଉଛି, ତାଙ୍କ ଦାମ୍ପତ୍ୟ ଜୀବନକୁ ନେଇ ସେତିକି ଗୁମର ଖୋଲୁଛି । ସୌମ୍ୟଙ୍କ ପରିବାରର ଅଭିଯୋଗ ଅନୁସାରେ ମୃତ ସୌମ୍ୟରଞ୍ଜନ ଓ ବିଦ୍ୟାଭାରତୀ ବିବାହ କରିଥିଲେ ସତ, କିନ୍ତୁ ଏହି ବିବାହ କୁଆଡେ ଏକ କଂଟ୍ରାକ୍ଟ ମ୍ୟାରେଜ ଥିଲା । ବର୍ଷକ ପାଇଁ ଦୁହିଁଙ୍କ ମଧ୍ୟରେ ହୋଇଥିଲା ବୁଝାମଣା । ଶାରୀରିକ ସମ୍ପର୍କ ନରଖିବାକୁ ଏଭଳି ଗୋଟିଏ କ୍ଲଜ୍ ଏଗ୍ରିମେଂଟରେ ରଖାଯାଇଥିଲା । ଯାହା କେବଳ ଫିଲ୍ମରେ ଆପଣ ଦେଖିଥିଲେ । ଯାହାକି ଆମ ସଂସ୍କୃତି ପରମ୍ପରାରେ ଆପଣ କେବେ ଶୁଣିନଥିବେ । ହେଲେ ଏହି ଦୁଇ ଉଚ୍ଚ ଶିକ୍ଷିତ ଦମ୍ପତି ସେମାନଙ୍କ ମଧ୍ୟରେ ବୁଝାମଣା କରିଥିଲେ । ଗୋଟିଏ ଛାତ ତଳେ ରହିଲେ ବି ସେମାନେ ପରସ୍ପରକୁ ସ୍ପର୍ଶ କରୁନଥିଲେ ।
କେବଳ ଏତିକି ନୁହେଁ ଦୁହିଁଙ୍କ ମଧ୍ୟରେ ସମ୍ପର୍କ ମଧ୍ୟ ଭଲ ନଥିଲା । ଅନେକ ସମୟରେ ସେମାନଙ୍କ ମଧ୍ୟରେ କଳି ଝଗଡା ହେଉଥିଲା । ଏପରିକି ଥରେ ବିଦ୍ୟାଭାରତୀ ଶଂଖା ଚୂଡି ଖୋଲି ଫୋପାଡି ଡିଏଫଓଙ୍କ ଘରକୁ ଚାଲିଯାଇଥିଲେ ବୋଲି ତାଙ୍କ ଭାଇ ଅଭିଯୋଗ କରିଛନ୍ତି । ଏସବୁକୁ ନେଇ ସୌମ୍ୟ ସବୁବେଳେ ଚାପରେ ରହୁଥିଲେ ।
ପୋଲିସ ମୃତକଙ୍କ ପରିବାରର ଅଭିଯୋଗ ଆଧାରରେ ମାମଲା ରୁଜୁ କରି ତଦନ୍ତ ଚଳାଇଥିଲେ ବି ଏଥିରେ ସନ୍ତୁଷ୍ଟ ନାହାଁନ୍ତି ସୌମ୍ୟଙ୍କ ପରିବାର ଲୋକ । ଡିଏଫଙ୍କୁ ବଦଳି ଦାବି କରିବା ସହ ଉଚ୍ଚସ୍ତରୀୟ ତଦନ୍ତ ଦାବି କରି ପୋଲିସ ଡିଜିପି ଓ ପିସିସିଏଫଙ୍କୁ ଭେଟି ଦାବି କରିଛନ୍ତି ସୌମ୍ୟଙ୍କ ବାପା ।
ପୂରା ମାମଲାରେ ମୂଳରୁ ଡିଏଫଓ ସଂଗ୍ରାମ କେଶରୀ ବେହେରାଙ୍କ ଭୂମିକାକୁ ସନ୍ଦେହ କରିଆସୁଛନ୍ତି ପରିବାର । ସୌମ୍ୟଙ୍କୁ ଜାଣିଶୁଣି ରାତି ଡ୍ୟୁଟି ଦେବା ସହ ସୌମ୍ୟଙ୍କ ପତ୍ନୀଙ୍କ ସହ ଡିଏଫଓଙ୍କ ସମ୍ପର୍କ ଥିଲା ବୋଲି ସଙ୍ଗୀନ ଅଭିଯୋଗ କରି ଆସୁଛନ୍ତି ।
ତଦନ୍ତ ବେଳେ ଆଉ ଏକ ଦିଗ ଆସିଛି । ସୌମ୍ୟ ଓ ତାଙ୍କ ପତ୍ନୀଙ୍କୁ ଭୁବନେଶ୍ୱର ନେବା ଆଣିବା ପାଇଁ ଗାଡି ପଠାଉଥିଲେ ଡିଏଫଓ । ଡିଏଫଓ କାହିଁକି ଏତେ ଅନୁକମ୍ପା ଦେଖାଉଥିଲେ ଏହା ପଛର କଣ ରହିଛି ତାକୁ ନେଇ ତଦନ୍ତକାରୀ ଟିମ ସମ୍ମୁଖରେ ଅଭିଯୋଗ କରିଛନ୍ତି । ସୌମ୍ୟରଞ୍ଜନଙ୍କର ପ୍ରକୃତରେ କେମିତି ମୃତ୍ୟୁ ହେଲା । ସେ ଆତ୍ମହତ୍ୟା କରିଥିଲେ ନାଁ ତାଙ୍କୁ ହତ୍ୟା କରାଯାଇଛି ନା ଆକସ୍ମିକ ଦୁର୍ଘଟଣାରେ ମୃତ୍ୟୁ ହୋଇଛି ଏମିତି ଅନେକ ପ୍ରଶ୍ନର ଉତ୍ତର ଖୋଜୁଛି ପୋଲିସ ।