କନକ ବ୍ୟୁରୋ: ଋଣ ଯନ୍ତାରେ ପଡ଼ିଗଲାଣି ଓଡ଼ିଶା ଚାଷୀ । ହେଲେ ତାର ଆୟ ସେଭଳି ବଢ଼ୁନି । ଗତ ୮ ବର୍ଷରେ ଓଡ଼ିଶା ଚାଷୀଙ୍କ ଋଣ ପରିମାଣ ୬.୩୯ ଲକ୍ଷ କୋଟିରୁ ୧୬.୫ ଲକ୍ଷ କୋଟିରେ ପହଁଚିଲାଣି । ହେଲେ ଓଡ଼ିଶା ଚାଷୀର ଆୟ ୬ ବର୍ଷରେ ମାତ୍ର ୩% ବଢ଼ିଛି! ଏଭଳି ଏକ ସ୍ଥିତିରେ ଚାଷୀ ଆତ୍ମହତ୍ୟା କରିବାକୁ ବାଧ୍ୟ ହେଉଥିବା ଦେଖାଯାଉଛି । ବିଧାନସଭାରେ ଉପସ୍ଥାପିତ କିଛି ତଥ୍ୟରୁ ଏହି ସତ୍ୟ ପଦାକୁ ଆସିଛି ।…
Kanak News is now on WhatsApp
Join and get latest news updates delivered to you via WhatsApp
ଆଠ ବର୍ଷ ଭିତରେ ରାଜ୍ୟର ଚାଷୀଙ୍କ ଉପରେ କୃଷି ଋଣ ଭାର ଅଢେଇ ଗୁଣାରୁ ଅଧିକ ବଢି ଯାଇଛି । କିନ୍ତୁ ଚାଷୀର ଆୟ ସେହି ଅନୁପାତରେ ବଢୁନି । ବିରୋଧୀଦଳ ମୁଖ୍ୟ ସଚେତକ ମୋହନ ମାଝୀଙ୍କ ପ୍ରଶ୍ନରେ ବିଧାନସଭାରେ ସମବାୟ ମନ୍ତ୍ରୀ ଅତନୁ ସବ୍ୟସାଚୀ ଦେଇଥବା ଉତରରୁ ମିଳିଛି ଏମିତି ତଥ୍ୟ । ୨୦୧୩-୧୪ରେଳ ରାଜ୍ୟର ଚାଷୀମାନଙ୍କ ଉପରେ ଋଣ ଭାର ଥିଲା ୬,୩୯୫.୫୮ କୋଟି ଟଙ୍କା । ଯାହା ୨୦୨୧-୨୨ବେଳକୁ ବଢି ହେଲାଣି ୧୬,୫୬୦.୪୦ କୋଟି ଟଙ୍କା ।
ସରକାରଙ୍କ ତଥ୍ୟ ଅନୁସାରେ ରାଜ୍ୟରେ ଏବେ ୫୪.୩୩ ଲକ୍ଷ ଚାଷୀ ଅଛନ୍ତି । ଏନଏସଏସଓ ସର୍ଭେ ଅନୁସାରେ କିନ୍ତୁ ଓଡିଶା ଚାଷୀଙ୍କ ଆୟ ୨୦୧୨-୧୩ରୁ ୨୦୧୮-୧୯ ଭିତରେ ଅର୍ଥାତ୍ ୬ ବର୍ଷରେ ମାତ୍ର ୩% ବଢ଼ିଛି । କେବଳ ଝାଡ଼ଖଣ୍ଡ ଚାଷୀ ପରିବାରର ମାସିକ ଆୟଠାରୁ ଉପରେ ଅଛନ୍ତି ଓଡ଼ିଶା ଚାଷୀ ।
ଏନଏସଏସଓ ବା ଜାତୀୟ ନମୁନା ସର୍ବେକ୍ଷଣ ସଂସ୍ଥା ପକ୍ଷରୁ ଅନୁଷ୍ଠିତ ସର୍ଭେରୁ ମିଳିଥିବା ତଥ୍ୟ ଅନୁସାରେ ୨୦୧୨-୧୩ରେ ଓଡ଼ିଶା ଚାଷୀ ପରିବାରର ମାସିକ ହାରାହାରି ଆୟ ୪,୯୭୬ ଟଙ୍କା ଥିବାବେଳେ ୨୦୧୮-୧୯ରେ ଏହା ମାତ୍ର ୫,୧୧୨ଟଙ୍କାରେ ପହଁଚିଛି ।
ଅନ୍ୟପଟରେ ଦେଶରେ ୨୦୧୮ରୁ ୨୦୨୦ ମଧ୍ୟରେ ଅର୍ଥାତ୍ ତିନି ବର୍ଷରେ ୧୭ ହଜାର ଚାଷୀ ଆତ୍ମହତ୍ୟା କରିଥିବା ସ୍ୀକାର କରିଛନ୍ତି କେନ୍ଦ୍ର ଗୃହ ମନ୍ତ୍ରୀ । ଏନସିଆରବି ତଥ୍ୟ ଅନୁସାରେ ୨୦୧୮ରେ ୫,୭୬୩ ଚାଷୀ ଆତ୍ମହତ୍ୟା କରିଥିବା ବେଳେ ୨୦୧୯ରେ ୫,୯୭୫ ଚାଷୀ ଓ ୨୦୨୦ରେ ୫,୫୭୯ ଜଣ ଚାଷୀ ଆତ୍ମହତ୍ୟା କରିଥିବା ହିସାବ କରାଯାଇଛି । ଋଣଭାର ଚାଷୀ ଆତ୍ମହତ୍ୟାର ମୂଳ କାରଣ କୁହାଯାଉଥିବା ବେଳେ,କିନ୍ତୁ ସରକାର ଏହାକୁ ସ୍ୱୀକାର କରିବାକୁ ନାରାଜ ।