କନକ ବ୍ୟୁରୋ : ସମସ୍ୟାର ସମାଧାନ ପାଇଁ ସମସ୍ତେ କୋର୍ଟଙ୍କ ଦ୍ୱାରସ୍ଥ ହୋଇଥାନ୍ତି । ଆଉ କୋର୍ଟରେ ବିଚାରପତି ସବୁ ସମସ୍ୟାର ଶୁଣାଣି କରିଥାନ୍ତି । କିନ୍ତୁ କେବେ ଆପଣ ଶୁଣିଛନ୍ତି ଯେ ଖୋଦ୍ ବିଚାରପତିଙ୍କୁ କୋର୍ଟ ବାହାରେ ମାମଲାର ଶୁଣାଣି ବା କୌଣସି ସମସ୍ୟାର ସମାଧାନ କରିବା କଥା । ବାସ୍ତବରେ ଏମିତି କିଛି ଘଟିଛି କେନ୍ଦ୍ରାପଡ଼ାରେ । ଖୋଦ୍ ବିଚାରପତି ଗାଁରେ ପହଞ୍ଚି ସମସ୍ୟା କଥା ବୁଝିଛନ୍ତି । ଘଟଣାଟି ବେଶ୍ ସମ୍ବେଦନଶୀଳ । ରାଜନଗର ଜିଲ୍ଲା ଚାରିପୋଖରିଆ ଗାଁର ଅମର ବାରିକଙ୍କ ଅକାଳ ମୃତ୍ୟୁ ପରେ ତାଙ୍କ ସ୍ତ୍ରୀ ତାଙ୍କର ଚାରି ପିଲାଙ୍କୁ ଛାଡ଼ି କୁଆଡ଼େ ପଳାଇଲେ । ବାପାଙ୍କ ମୃତ୍ୟୁ ଏବଂ ମା’ କୁଆଡ଼େ ଚାଲିଯିବା ପରେ ସେହି ୪ ଶିଶୁ ଏବେ କେମିତି ବଂଚିବେ, ତାକୁ ନେଇ କନକ ନ୍ୟୁଜରେ ଖବର ପ୍ରସାରିତ ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଏହି ଦୁଃଖଦ ଖବର କେନ୍ଦ୍ରାପଡ଼ା ଜିଲ୍ଲା ଆଇନ୍ ପ୍ରାଧିକରଣ ଅଧ୍ୟକ୍ଷ ତଥା ଜିଲ୍ଲା ଜଜ୍ ବିଶ୍ୱଜିତ୍ ମହାନ୍ତିଙ୍କୁ ବେଶ୍ ପ୍ରଭାବିତ କରିଥିଲା । ଆଉ ତୁରନ୍ତ ପରିବାର କେମିତି ସହାୟତା ପାଇବେ, ସେଥିପାଇଁ ଜିଲ୍ଲା ଆଇନ୍ ସେବା ପ୍ରାଧିକରଣ ସଚିବ ତଥା ଜଜ୍ ସୁମିତ୍ରା ସାହୁଙ୍କୁ ଚାରିପୋଖରିଆ ଗାଁକୁ ପଠାଇଥିଲେ । ଜଜ୍ ସୁମିତ୍ରା ଗାଁରେ ପହଂଚି ପ୍ରତିଟି ସମସ୍ୟା ପଚାରି ବୁଝିଥିଲେ । ୪ ଶିଶୁଙ୍କୁ ସମସ୍ତ ସୁବିଧା ଯୋଗାଇ ଦେବା ପାଇଁ ଶିଶୁ ସୁରକ୍ଷା ଅଧିକାରୀ ଓ ଜିଲ୍ଲା ସାମାଜିକ ସୁରକ୍ଷା ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ ଜଜ୍ । ଶିଶୁଙ୍କ ପରିବାରକୁ ତୁରନ୍ତ ଭୂମିହୀନ ଜାଗା ଓ ଘର ଯୋଗାଇ ଦେବାକୁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି ଜଜ୍ । ଏହାସହ ସେହି ସ୍ଥାନରେ ଶିଶୁମାନଙ୍କ ପାଇଁ ବ୍ୟାଙ୍କରେ ଆକାଉଂଟ ମଧ୍ୟ ଖୋଲାଯାଇଛି । ବୋଧହୁଏ ପ୍ରଥମଥର ଜଣେ ଜିଲ୍ଲା ଜଜ୍ ନିଜ ଆସନ ଛାଡ଼ି କୌଣସି ସମସ୍ୟାର ସମାଧାନ କରିବା ପାଇଁ ଗାଁରେ ପହଂଚିଛନ୍ତି । ଜଜଙ୍କ ଏହି ମହତ କାମକୁ ଖୁବ୍ ପ୍ରଶଂସା କରାଯାଇଛି ।