ସଂକଟରେ ପୁଡୁଚେରୀର କଂଗ୍ରେସ ସରକାର । ୨୨ ତାରିଖରେ ଫ୍ଲୋର ଟେଷ୍ଟ, ଉପରାଜ୍ୟପାଳ ଜାରିକଲେ ଆଦେଶ
କନକ ବ୍ୟୁରୋ : ପୁଡୁଚେରୀ କଂଗ୍ରେସ ସରକାର ଉପରେ ଏବେ କଳା ବାଦଲ ଛାଇ ଯାଇଛି । ବିଧାୟକ ଜୈନ କୁମାରଙ୍କ ଇସ୍ତଫା ପରେ ଏବେ ଭି. ନରାୟଣସ୍ୱାମୀଙ୍କ ସରକାର ସଂଖ୍ୟା ଗରିଷ୍ଠତା ହରାଇଛି । ଉପରାଜ୍ୟପାଳ ତାମିଲି ସାଇ ମୁଖ୍ୟମନ୍ତ୍ରୀ ନାରାୟଣ ସ୍ୱାମୀଙ୍କୁ ଫେବୃଆରୀ ୨୨ ତାରିଖ ସଂନ୍ଧ୍ୟା ୫ ଟା ସୁଦ୍ଧା ଗୃହରେ ସଂଖ୍ୟା ଗରିଷ୍ଠତାର ପ୍ରମାଣ ଦେବାକୁ ନିର୍ଦ୍ଦେଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କହିରଖୁ କି ଫେବୃଆରୀ ୧୬ ତାରିଖ ଦିନ କଂଗ୍ରେସ ବିଧାୟକ ଜୈନ କୁମାର ବିଧାନସଭା ସଦସ୍ୟତା ପଦରୁ ଇସ୍ତଫା ଦେଇଥିଲେ । ଏହା ପୂର୍ବରୁ ବି ୩ ଜଣ କଂଗ୍ରେସ ବିଧାୟକ ସେମାନଙ୍କ ବିଧାୟକ ପଦରୁ ଇସ୍ତଫା ଦେଇଥିଲେ । ପୁଡୁଚେରୀ ବିଧାନସଭାରେ ମୋଟ ୩୩ ଟି ଆସନ ଥିବା ବେଳେ ଏମାନଙ୍କ ଇସ୍ତଫା ପରେ କଂଗ୍ରେସ ଓ ଡିଏମକେ ମେଣ୍ଟ ସରକାର ପାଖରେ ମାତ୍ର ୧୪ ଜଣ ବିଧାୟକ ରହିଛନ୍ତି ।
ଗୁରୁବାର ଦିନ ପୁଡୁଚେରୀ ରାଜ୍ୟ ବିଜେପିର ଅଧ୍ୟକ୍ଷ ବି. ସ୍ୱାମୀନାଥନ୍ କହିଥିଲେ କି ବର୍ତ୍ତମାନ କଂଗ୍ରେସ ସରକାର ବହୁମତ ହରାଇ ସାରିଛି । ତେଣୁ ମୁଖ୍ୟମନ୍ତ୍ରୀ ନୈତିକତା ଦୃଷ୍ଟିରୁ ତୁରନ୍ତ ଇସ୍ତଫା ଦେବା ଦରକାର । ଏହାସହ ସରକାର ବହୁମତ ପ୍ରମାଣ କରିବାକୁ ସେ ଦାବି କରିଥିଲେ ।