କନକ ବ୍ୟୁରୋ : ସଂସଦର ଶୀତ ଅଧିବେଶନର ପ୍ରଥମ ଦିନରେ କୃଷି ଆଇନ ପ୍ରତ୍ୟାହାର ବିଲ୍ ପାରିତ । ଲୋକସଭାରେ କୃଷିମନ୍ତ୍ରୀ ନରେନ୍ଦ୍ର ସିଂ ତୋମାର ଆଣିଥିବା କୃଷି ଆଇନ ପ୍ରତ୍ୟାହାର ବିଲ୍ ପାରିତ ହୋଇଛି । ବାଚନିକ ଭୋଟରେ ବିଲ୍ ପାରିତ ହୋଇଥିବା ବେଳେ ବିରୋଧୀଙ୍କ ପ୍ରବଳ ହଟ୍ଟଗୋଳ ଦେଖିବାକୁ ମିଳିଛି । କାରଣ ଏହି ପ୍ରତ୍ୟାହାର ବିଲ୍ ପାରିତ ହେବା ପରେ ଏହା ବାବଦରେ ଆଲୋଚନା କରିବାକୁ ଦାବି କରିଥିଲେ ବିରୋଧୀ । କଂଗ୍ରେସ, ତୃଣମୂଳ କଂଗ୍ରେସ ସମେତ ଅନ୍ୟ ବିରୋଧୀ ଏହି ପ୍ରତ୍ୟାହାର ବିଲ ସମ୍ପର୍କରେ ଆଲୋଚନା କରିବାକୁ ଦାବି କରିଥିଲେ । କିନ୍ତୁ ଏ ବାବଦରେ କୌଣସି ଆଲୋଚନା ନହେବାରୁ ବିରୋଧୀ ହଟ୍ଟଗୋଳ କରିଥିଲେ । ଯେଉଁଥିପାଇଁ ଲୋକସଭାକୁ ଦିନ ୨ଟା ଯାଏଁ ମୁଲତବୀ କଲେ ବାଚସ୍ପତି ।
Kanak News is now on WhatsApp
Join and get latest news updates delivered to you via WhatsApp
ଏହି କୃଷି ଆଇନ ପ୍ରତ୍ୟାହାର ବିଲ୍ ଲୋକସଭାରେ ପାରିତ ହେବା ପରେ ଚାଷୀ ନେତା ରାକେଶ ଟିକାୟତ କହିଛନ୍ତି, ଯେଉଁ ୭୫୦ ଜଣ ଚାଷୀ ଏହି ଆଇନ ଉଚ୍ଚେଦ ପାଇଁ ନିଜର ଜୀବନ ହାରିଛନ୍ତି ସେମାନଙ୍କ ପାଇଁ ଏହା ଶ୍ରେଷ୍ଠ ଶ୍ରଦ୍ଧାଞ୍ଜଳି । କିନ୍ତୁ ଏହି ଚାଷୀ ଆନ୍ଦୋଳନ ଆଗକୁ ମଧ୍ୟ ଜାରି ରହିବ ଯେତେବେଳେ ଯାଏଁ ଏମଏସପି ବାବଦରେ ସରକାର କୌଣସି ନିଷ୍ପତ୍ତି ନେଇନାହାନ୍ତି ।
ଏହାପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗତ ୧୯ ନଭେମ୍ବରରେ ୩ କୃଷି ଆଇନ ପ୍ରତ୍ୟାହାର କରିବା ନେଇ ଘୋଷଣା କରିଥିଲେ ।ଏହି ଆଇନ ବାବଦରେ କିଛି ଚାଷୀଙ୍କୁ ଆମେ ବୁଝାଇ ପାରିଲୁ ନାହିଁ ବୋଲି କହିଥିଲେ ମୋଦୀ । ଆଉ ଆଇନ ପ୍ରତ୍ୟାହାର ଘୋଷଣା ସହ ଚାଷୀ ମାନେ ନିଜ ନିଜର ଘରକୁ ଯାଆନ୍ତୁ ବୋଲି ମୋଦୀ କହିଥିଲେ । ଏଠାରେ ସୂଚନାଯୋଗ୍ୟ ଯେ, ଗତ ବର୍ଷେ ହେବ କୃଷି ଆଇନ ପ୍ରତ୍ୟାହାର ଦାବିରେ ଆନ୍ଦୋଳନରେ ବସିଥିଲେ ହଜାର ହଜାର ଚାଷୀ । ଶୀତ, କାକର, ଖରା, ବର୍ଷାକୁ ଖାତିର ନକରି ଚାଷୀ ଆନ୍ଦୋଳନ ଜାରି ରଖିଥିଲେ । ଏପରିକି ଚଳିତ ଶୀତକାଳୀନ ଅଧିବେଶନରେ ସଂସଦ ପର୍ଯ୍ୟନ୍ତ ମାର୍ଚ୍ଚ କରିବେ ବୋଲି ଚାଷୀ ସଙ୍ଗଠନ ପକ୍ଷରୁ ଘୋଷଣା କରାଯାଇଥିଲା । କିନ୍ତୁ ଏହାପୂର୍ବରୁ କୃଷି ଆଇନ ପ୍ରତ୍ୟାହାର ନେଇ ଘୋଷଣା କରିଥିଲେ ମୋଦୀ ସରକାର ।