କନକ ବ୍ୟୁରୋ: ଗାଡ଼ି କୁ ଯାଞ୍ଚ କରୁଥିବା ଅଧିକାରୀ ଖୋଦ୍ ଯାଞ୍ଚର ଜାଲ ଭିତରେ । ଖାକିକୁ ତଦନ୍ତ କରୁଛି ଖାକି । ନିୟମ ଭାଙ୍ଗୁଥିବା ଗାଡ଼ି ଚାଳକକୁ ନିୟମ ଶିଖାଉଥିବା ପରିବହନ ଅଧିକାରୀ ନିଜେ ଏବେ ନିୟମ ଭାଙ୍ଗି ବିବାଦରେ ଫଶିଯାଇଛନ୍ତି । ଚୋର ଚଲାଉଛି ଚୋରି ଗାଡ଼ି । ହେଲେ ଚୋରି ଗାଡ଼ିର ମାଲିକାନାକୁ ବଦାଳାଇ ଦେଇଛି ଖୋଦ୍ ଆରଟିଓ କାର୍ଯ୍ୟାଳୟ । ଆଉ ଆରଟିଓ ବାବୁ କରିଥିବା ଦୋଷକୁ ଏବେ ଜଣ ମୁଣ୍ଡରେ ଲଦିଦେଇ ନିଜ ଦୋଷ ଝାଡ଼ୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପୂରା ଘଟଣା ଏମିତି ଥିଲା ଯେ, ଗତ ବର୍ଷ ସେପ୍ଟେମ୍ବର ୨୫ ତାରିଖରେ ଜଗୁ ହନ୍ତାଲ ନାମକ ଜଣେ ବ୍ୟକ୍ତିଙ୍କ ଅଲଟୋ କାର କୋରାପୁଟ ସେମିଳି ଗୁଡ଼ା କଲେଜ ଛକ ନିକଟରୁ ଚୋରି ହୋଇଗଲା । ଚୋରି ଘଟଣାକୁ ନେଇ ସେ ଥାନାରେ ଏତଲା ମଧ୍ୟ ଦେଇଥିଲେ । ଏହି ଘଟଣାକୁ ନେଇ ପୋଲିସ ଛାନଭିନ୍ କରୁଥିବା ବେଳେ ଗାଡ଼ିର ସନ୍ଧାନ ପାଇ ଖୋଦ୍ ପୋଲିସ ମଧ୍ୟ ଆଶ୍ଚର୍ଯ୍ୟ ହୋଇ ପଡ଼ିଛି ।
ଚୋରି ଗାଡ଼ିର ମାଲିକାନା ବଦଳି ଯାଇଛି । ଗାଡ଼ି ମାଲିକ ଆରଟିଓ କାର୍ଯ୍ୟାଳୟକୁ ଯାଇନଥିବା କଥା କହୁଥିବା ବେଳେ କିପରି ମାଲିକାନା ପରିବର୍ତନ ହେଲା ତାହା ଏବେ ପ୍ରଶ୍ନବାଚୀ ସୃଷ୍ଟି କରିଛି । ଏପଟେ ମାଲାକାନା ଠିକ୍ ନିୟମରେ ପରିବର୍ତ୍ତନ ହୋଇଥିବା ଆରଟିଓ କହୁଥିବା ବେଳେ ଏହି ଘଟଣାରେ ପୋଲିସ ଅଧିକାରୀ ଆରଟିଓ ଅଫିସକୁୁ ଦୋଷ ଦେଉଛନ୍ତି । ହେଲେ ପାଲଟା ଜବାବରେ ଆରଟିଓ କହୁଛନ୍ତି ଏଥିରେ ପୋଲିସର ଭୁଲ ।
ତେବେ ଏ ରୋଚକ ଘଟଣାରେ ପୋଲିସ ୫ ଜଣଙ୍କୁ ଗିରଫ କରିଥିବା ବେଳେ ସତ୍ୟତା ଜାଣିବା ପାଇଁ ଆରଟିଓର କାଗଜ ପତ୍ରକୁ ଯାଞ୍ଚ କରିବା ସହ ସିସିଟିଭି ଫୁଟେଜକୁ ମାଗିଛନ୍ତି । କେଉଁଠି ନା କେଉଁଠି ଆରଟିଓ କାର୍ଯ୍ୟାଳୟର କିଛି ଅଧିକାରୀ ଏଥିରେ ସାମିଲ ଥିବା ଅଭିଯୋଗ ହୋଇଛି । ତେବେ କିଏ କହୁଛି ସତ ଆଉ କିଏ କହୁଛି ମିଛ? ପରିବହନ ବିଭାଗ ନା ପୋଲିସ । ଦୁହିଁଙ୍କ କାର୍ଯ୍ୟାକଳାପ ଓ ତଥ୍ୟକୁ ନେଇ ସାଧାରଣରେ ଦ୍ୱନ୍ଦ ସୃଷ୍ଟି ହୋଇଛି । ତେବେ ତଦନ୍ତ ପରେ ପ୍ରକୃତ ସତ ସାମ୍ନାକୁ ଆସିବ ଆଉ ଏହି ଘଟଣା ପଛରେ ଥିବା ଅସଲ ଖଳନାୟକର ଖୁଲାସା ହେବ…