ଦ୍ରୌପଦୀଙ୍କୁ ‘ରାଷ୍ଟ୍ରପତ୍ନୀ’ କହିଲେ କଂଗ୍ରେସ ସାଂସଦ । ସଂସଦରେ ବିଜେପିର ଜୋରଦାର ବିରୋଧ, ସୋନିଆଙ୍କୁ କ୍ଷମା ମାଗିବାକୁ ଦାବି କଲେ ସ୍ମୃତି
କନକ ବ୍ୟୁରୋ : କଂଗ୍ରେସ ସାଂସଦ ଅଧୀର ରଞ୍ଜନ ଚୌଧୁରୀଙ୍କ ବିବାଦୀୟ ବୟାନକୁ ନେଇ ଗୁରୁବାର ସଂସଦରେ ଜୋରଦାର ବିରୋଧ କରିଛି ବିଜେପି । କଂଗ୍ରେସ ଇର୍ଷାପରାୟଣ ହୋଇ ରାଷ୍ଟ୍ରପତି ଦୌପଦୀ ମୁର୍ମୁଙ୍କୁ ଟାର୍ଗେଟ କରୁଥିବା ଅଭିଯୋଗ କରିବା ସହ କ୍ଷମା ମାଗିବାକୁ ଦାବି କରିଛନ୍ତି କେନ୍ଦ୍ରମନ୍ତ୍ରୀ ସ୍ମୃତି ଇରାନୀ । ରାଷ୍ଟପ୍ରତିଙ୍କୁ ରାଷ୍ଟ୍ରପତ୍ନୀ କହିବା କଂଗ୍ରେସର ମହିଳା ବିରୋଧୀ, ଦଳିତ ବିରୋଧୀ ନୀତି ବୋଲି କହିଛନ୍ତି ସ୍ମୃତି ଇରାନି । ସେଥିପାଇଁ କଂଗ୍ରେସର ଅନ୍ତରୀଣ ଅଧ୍ୟକ୍ଷ ସୋନିଆ ଗାନ୍ଧୀଙ୍କୁ କ୍ଷମା ମାଗନ୍ତୁ ବୋଲି ଦାବି କରିଛନ୍ତି ସ୍ମୃତିି । ଏପଟେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଏବଂ ବିଜେପିର ମହିଳା ସାଂସଦମାନେ ଲୋକସଭାରେ ପ୍ଲାକାର୍ଡ ଧରି ବିକ୍ଷୋଭ କରିଛନ୍ତି । ସୋନିଆ ନିଜେ ଜଣେ ମହିଳା ହୋଇ ବି ଦଳର ନେତାମାନଙ୍କୁ ଏଭଳି ମନ୍ତବ୍ୟ ଦେବାକୁ ଅନୁମତି ଦେଉଥିବାରୁ ଦଳ ତରଫରୁ ସେ କ୍ଷମା ମାଗନ୍ତୁ ବୋଲି ଦାବି କରିଛନ୍ତି ନିର୍ମଳା ।
Kanak News is now on WhatsApp
Join and get latest news updates delivered to you via WhatsApp
ବିଜେପି ସାଂସଦଙ୍କ ପ୍ରବଳ ବିରୋଧ ପରେ କଂଗ୍ରେସ ବିଧାୟକ ଦଳର ନେତା ଅଧୀର ରଞ୍ଜନ କହିଛନ୍ତି, ଭୁଲରେ ତାଙ୍କ ପାଟିରୁ ବାହାରି ଯାଇଛି । ସେ କ୍ଷମା ମାଗିବାର ପ୍ରଶ୍ନ ଉଠୁନାହିଁ । ସେ ବିଜେପିକୁ ଟାର୍ଗେଟ କରି କହିଛନ୍ତି, ଯଦି ତୁମେ ଚାହୁଁଛ ଏଥିପାଇଁ ମୋତେ ଫାଶୀ ଦେଇପାର । ତେବେ ଅଗ୍ନୀପଥ ଯୋଜନା, ବେରୋଜଗାରୀ, ଜିଏସଟି ଏବଂ ଅନ୍ୟ ସମସ୍ୟା ଉପରେ ଆଲୋଚନାରୁ ଦୃଷ୍ଟି ହଟାଇବା ପାଇଁ ବିଜେପି ଅଯଥାରେ ଏକଥାକୁ ବଢାଉଛି । ରାଷ୍ଟପ୍ରତି ବ୍ରାହ୍ମଣ ହୁଅନ୍ତୁ କି ଆଦିବାସୀ ଆମର ଏହି ପଦବୀ ପ୍ରତି ସମ୍ମାନ ରହିଛି ବୋଲି ସେ କହିଛନ୍ତି । ଏପଟେ ଏହା ଉପରେ ମନ୍ତବ୍ୟ ରଖି ଅଧୀର କ୍ଷମା ମାଗିସାରିଥିବା କହିଛନ୍ତି ସୋନିଆ ଗାନ୍ଧୀ ।
କହିରଖୁ କି, ମଙ୍ଗଳବାର କଂଗ୍ରେସ ସାଂସଦମାନେ ବିଜୟ ଚୌକ୍ରେ ବିକ୍ଷୋଭ କରୁଥିବା ବେଳେ ଗଣମାଧ୍ୟମ ପ୍ରତିନିଧିମାନେ ତାଙ୍କୁ କୁଆଡେ ଯିବେ ବୋଲି ପ୍ରଶ୍ନ କରି୍ଥିଲେ । ପ୍ରଶ୍ନର ଉତର ଦେଇ ସେମାନେ ରାଷ୍ଟ୍ରପତ୍ନୀ ଭବନ ଯିବେ ବୋଲି ଅଧୀର କହିଥିଲେ ।