ପ୍ରାୟ ୧୦ ବର୍ଷ ପରେ ପୁଣି ଏମାର ମଠରୁ ଉଦ୍ଧାର ହେଲା ରୂପା ଇଟା । ମଠ ଭିତରେ ଥିବା ଏକ ବନ୍ଦ କୋଠରୀ ଚଟାଣରୁ ବାହାରିଲା ୪୫ଟି ଇଟା ।
କନକ ବ୍ୟୁରୋ: ପ୍ରାୟ ଦଶବର୍ଷ ପରେ ପୁଣି ଥରେ ପୁରୀର ଏମାର ମଠ ଖବରର ଶିରୋନାମାକୁ ଆସିଛି, ଯେତେବେଳେ ମଠରୁ ୪୫ ଖଣ୍ଡ ରୂପା ଇଟାକୁ ଉଦ୍ଧାର କରାଯାଇଛି । ମଠ ପରିସରରେ ଥିବା ଏକ ବନ୍ଦ କୋଠରୀର ମାଟି ତଳୁ ବାହାରିଛି ରୂପା ଇଟା । ଉଦ୍ଧାର ହୋଇଥିବା ଏହି ଇଟା, କେବଳ ମଠର ମାହାତ୍ମ୍ୟର କଥା ବୟାନ କରୁନି ବରଂ ମଠରେ ଲୁଚି ରହିଥିବା ଏକାଧିକ ରହସ୍ୟକୁ ସାମ୍ନାକୁ ଆଣିଛି ।
Kanak News is now on WhatsApp
Join and get latest news updates delivered to you via WhatsApp
ଏମାର ମଠର ନୂଆ ଟ୍ରଷ୍ଟକୁ ଦାୟିତ୍ୱ ହସ୍ତାନ୍ତର ଆଗରୁ ମଠର ସମ୍ପତି ନେଇ ଯାଂଚ ଚାଲିଥିବା ବେଳେ ଏମିତି ରୂପା ଇଟା ମିଳିିଛି । ୨୦୧୦ ମସିହାରେ ଦେବୋତର ବିଭାଗ ପକ୍ଷରୁ ଯେଉଁ ଯାଂଚ ହୋଇଥିଲା ସେଥିରେ ୪୫ ଖଣ୍ଡ ରୂପା ଇଟା ଥିବାର ହିସାବ ଥିଲା । ସେହି ରୂପା ଇଟା ଏବେ ବାହାରିଥିବା କୁହାଯାଇଛି । ତେବେ ମଠରୁ ମିଳିଥିବା ପ୍ରତ୍ୟକ ରୂପା ଇଟାର ଓଜନ ୩୦ କେଜି ହେବ ।
ମିଳିଥିବା ସୂଚନା ଅନୁସାରେ ମଠ ଧିରେ ଧିରେ ଅସୁରକ୍ଷିତ ହେବାର ମଠର ତକ୍ରାଳୀନ ମହନ୍ତ ରାଜଗୋପାଳ ରାମାନୁଜ ଦାସ୍ ଏହାକୁ ମାଟି ଚଟାଣ ତଳେ ପୋତି ଦେଇଥିଲେ । ଆଉ ଦେବୋତର ବିଭାଗର ତନାଘନା ପରେ ଏହାକୁ ଉଦ୍ଧାର କରାଯାଇଛି ।
୨୦୧୧ ମସିହାରେ ଯେତେବେଳେ ଏହି ମଠରୁ ୫୨୨ ଖଣ୍ଡ ରୁପା ଇଟା ବାହାରିଥିଲା ସେତେବେଳେ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲା । ୧୮ ଟନ୍ର ୫୨୨ଟି ରୁପା ଇଟାର ମୂଲ୍ୟ ଥିଲା ୯୦ କୋଟି । ତେବେ ଏତେ ପରିମାଣର ରୁପା ଇଟା କେଉଁଠୁ ଆସିଲା, ତାକୁ ନେଇ ସେତେବେଳେ ଚର୍ଚ୍ଚା ହୋଇଥିଲା । ଆଉ କିଛି ଗବେଷଣା ଓ ପୁସ୍ତକରୁ ଜଣାପଡ଼ିଥିଲା, ନଅଙ୍କ ଦୁର୍ଭିକ୍ଷ ସମୟରେ ମଠରୁ ଚାଉଳ ତଥା ଖାଦ୍ୟଶସ୍ୟ ବଦଳରେ ବିଟ୍ରିଶ୍ ସରକାର ମଠକୁ ଏହି ସବୁ ଇଟା ଦେଇଥିଲେ ।