ବିହାର ଆରଜେଡିରେ ସଂକଟ । ତେଜ ପ୍ରତାପ କହିଲେ ଜଗଦାନନ୍ଦଙ୍କ ବିରୋଧରେ କାର୍ଯ୍ୟାନୁଷ୍ଠାନ ନହେଲେ ଦଳୀୟ କାର୍ଯ୍ୟକ୍ରମରେ ଦେବେ ନାହିଁ ଯୋଗ
କନକ ବ୍ୟୁରୋ : ବିହାର ଆରଜେଡିରେ ଏବେ ଦୁଇ ନେତାଙ୍କ ମଧ୍ୟରେ ବିବାଦ ଉଗ୍ରରୂପ ନେବାରେ ଲାଗିଛି । ଗୋଟିଏ ପଟେ ଦଳର ସଭାପତି ଜଗଦାନନ୍ଦ ସିଂ କହିଛନ୍ତି କି ସେ ତେଜ ପ୍ରତାପଙ୍କୁ ଜାଣି ନାହାନ୍ତି, ତାଙ୍କୁ ଯାହା ଜବାବ ଦେବାର ଅଛି ସେ ଲାଲୁ ଯାଦବଙ୍କୁ ଦେବେ । ଅନ୍ୟପଟେ ଜଗଦାନନ୍ଦ ସିଂଙ୍କର ଏଭଳି ବୟାନ ପରେ ତେଜ ପ୍ରତାପ କହିଛନ୍ତି କି ତାଙ୍କ ଉପରେ କାର୍ଯ୍ୟାନୁଷ୍ଠାନ ନହେଲେ ସେ ଦଳୀୟ କାର୍ଯ୍ୟକ୍ରମରେ ଯୋଗଦେବେ ନାହିଁ ।
Kanak News is now on WhatsApp
Join and get latest news updates delivered to you via WhatsApp
କହିରଖୁ କି ଛାତ୍ର ଆରଜେଡିର ପୂର୍ବତନ ରାଜ୍ୟ ସଭାପତି ଆକାଶ ଯାଦବଙ୍କୁ ଦଳରେ ଏକ ବରିଷ୍ଠ ପଦ ମିଳିଥିଲା । ଯାହାକୁ ନେଇ ଦଳ ଭିତରେ କନ୍ଦଳ ଆରମ୍ଭ ହୋଇଛି । ଦଳର ସଭାପତି ଜଗଦାନନ୍ଦ ଯାଦବ ଆକାଶଙ୍କୁ ପଦରୁ ହଟାଇବାକୁ ଦାବି କରିଥିଲେ । ଦଳ ଜଗଦାନନ୍ଦଙ୍କ ପ୍ରସ୍ତାବକୁ ସମ୍ମାନ ଦେଇ ଆକାଶଙ୍କୁ ପଦରୁ ହଟାଇବା ପରେ ଏବେ ଦଳ ବିରୋଧରେ ମୋର୍ଚ୍ଚା ଖୋଲିଛନ୍ତି ଲାଲୁ ଯାଦବଙ୍କ ବଡ ପୁଅ ତେଜ ପ୍ରତାପ । ତେଜ ପ୍ରତାପ ଦାବି କରିଛନ୍ତି କି ଯେ ପର୍ଯ୍ୟନ୍ତ ଜଗଦାନନ୍ଦ ସିଂଙ୍କ ଉପରେ ଦଳ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ ନକରିବ ସେପର୍ଯ୍ୟନ୍ତ ସେ ଦଳର କୌଣସି କାର୍ଯ୍ୟକ୍ରମରେ ଯୋଗ ଦେବେ ନାହିଁ ।
ସୂଚନା ଥାଉକି ଏହି ବିବାଦ ସେତେବେଳେ ବଢିଥିଲା ଯେତେବେଳେ ଆକାଶ ଯାଦବଙ୍କୁ ଛାତ୍ର ଆରଜେଡିର ରାଜ୍ୟ ସଭାପତି ପଦରୁ ହଟାଇ ଜଗଦାନନ୍ଦ ସିଂ ଗଗନ କୁମାରଙ୍କୁ ସେହି ପଦରେ ଅବସ୍ଥାପିତ କରିଥିଲେ ।
I urge my father Lalu Prasad Yadav also to act against him, if there is no action taken, I won’t be participating in any party activities: Tej Pratap Yadav, RJD
— ANI (@ANI) August 19, 2021
କହିରଖୁ କି ଆକାଶ ଯାଦବଙ୍କୁ ତେଜ ପ୍ରତାପଙ୍କ ଅତି ନିକଟତର କୁହାଯାଉଛି । ତାଙ୍କୁ ଗତବର୍ଷ ମେ’ ମାସରେ ରାଜ୍ୟ ଛାତ୍ର ଆରଜେଡିର ଅଧ୍ୟକ୍ଷ ପଦ ମିଳିଥିଲା । କିଛିଦିନ ପୂର୍ବରୁ ଆକାଶ ଯାଦବଙ୍କ ଅଧ୍ୟକ୍ଷତାରେ ପାଟନାରେ ହୋଇଥିବା ଛାତ୍ର ସମ୍ମିଳନୀରେ ଯେଉଁ ପୋଷ୍ଟର ଲଗାଯାଇଥିଲା ସେଥିରେ ନା ଥିଲା ତେଜସ୍ୱୀ ଯାଦବଙ୍କ ଫଟୋ, ନା ଲାଲୁଙ୍କ ଫଟୋ, ନା ଜଗଦାନନ୍ଦ ସିଂଙ୍କ ଫଟୋ । ପୋଷ୍ଟରରେ କେବଳ ତେଜ ପ୍ରତାପଙ୍କ ଫଟୋ ରହିଥିଲା । ଯାହାକୁ ନେଇ ବିବାଦ ଆରମ୍ଭ ହୋଇଥିଲା ।