ପେଟ୍ରୋଲ କିଣିଲେ ପୋଡୁଛି ପକେଟ୍, ଖୁବଶୀଘ୍ର ମାରିପାରେ ସେଂଚୁରୀ । ଜାଣିଲେ ଆଶ୍ଚର୍ଯ୍ୟ ହେବେ, ପେଟ୍ରୋଲର ମୂଳଦର ହେଉଛି ୩୨ ଟଙ୍କା ୪୫ ପଇସା ।
କନକ ବ୍ୟୁରୋ: ବେଲଗାମ ତୈଳ ଦର । ଲଗାତାର ଭାବେ ସପ୍ତମ ଦିନ ପାଇଁ ଦେଶରେ ବଢିଛି ପେଟ୍ରୋଲ ଓ ଡିଜେଲ ଦର । ସୋମବାର ତୈଳ କମ୍ପାନୀ ଗୁଡିକ ପେଟ୍ରୋଲ ଓ ଡିଜେଲ ଉପରେ ଯଥାକ୍ରମେ ୨୯ ପଇସା ଓ ୩୫ ପଇସା ବୃଦ୍ଧି କରିଛନ୍ତି । ଫଳରେ ଦେଶର ଅନେକ ସ୍ଥାନରେ ପେଟ୍ରୋଲ ଦର ୯୫ ଟଙ୍କା ଟପିଯାଇଛି । ରାଜଧାନୀ ଭୁବନେଶ୍ୱରରେ ସୋମବାର ପେଟ୍ରୋଲ ଦର ୮୯ ଟଙ୍କା ୬୮ ପଇସା ରହିଥିବା ବେଳେ, ଡିଜେଲ ୮୬ ଟଙ୍କା ୪୫ ପଇସାରେ ବିକ୍ରି ହେଉଛି । ଆପଣ ଜାଣି ଆଶ୍ଚର୍ଯ୍ୟ ହେବେ ଯେ, ରାଜଧାନୀ ଭୁବନେଶ୍ୱରରେ ପାଖାପାଖି ୯୦ ଟଙ୍କା ଦେଇ ଆମେ ଯେଉଁ ପେଟ୍ରୋଲ ଓ ଡିଜେଲ କିଣୁଛେ, ତାର ପ୍ରକୃତ ମୁଲ୍ୟ ୩୦ରୁ ୩୫ ଟଙ୍କା । ବାକି ଟଙ୍କା ଟିକସ ବାବଦରେ ନେଇଛନ୍ତି ରାଜ୍ୟ ଓ କେନ୍ଦ୍ର ସରକାର ।
Kanak News is now on WhatsApp
Join and get latest news updates delivered to you via WhatsApp
ଏବେ ନଜର ପକାନ୍ତୁ ଭୁବନେଶ୍ୱରରେ ବିକ୍ରି ହେଉଥିବା ତୈଳ ଦରର ଗଣିତ ଉପରେ । ସୋମବାର ଭୁବନେଶ୍ୱରରେ ବିକ୍ରି ହେଉଥିବା ପେଟ୍ରୋଲର ମୌଳିକ ମୂଲ୍ୟ ହେଉଛି ୩୨.୪୩ ଟଙ୍କା । ଏହା ଉପରେ କେନ୍ଦ୍ର ସରକାରଙ୍କ ଏକସାଇଜ୍ ଡ୍ୟୁଟି ରହିଛି ୩୨.୯୮ ଟଙ୍କା । ସେହିପରି ରାଜ୍ୟ ସରକାର ୩୨% ହିସାବରେ ନେଉଛନ୍ତି ଭାଟ, ଯାହା ୨୦.୯୧ ଟଙ୍କା । ତାସହ ଡିଲର କମିଶନ ୩.୩୬ ଟଙ୍କା । ଏହିପରି ଲିଟର ପିଛା ଗ୍ରାହକ ଗଣୁଛି ମୋଟ୍ ୮୯ ଟଙ୍କା ୬୮ ପଇସା ।
ସେହିପରି ଡିଜେଲର ମୌଳିକ ମୂଲ୍ୟ ୩୪ ଟଙ୍କା । ଏହାଉପରେ କେନ୍ଦ୍ରୀୟ ଏକସାଇଜ୍ ଡ୍ୟୁଟି ୩୧.୮୩ ଟଙ୍କା । ତାଉପରେ ରାଜ୍ୟର ଭାଟ ବାବଦରେ ୧୮.୪୧ ଟଙ୍କା ଏବଂ ଡିଲର କମିଶନ ୨.୨୧ ଟଙ୍କା । ଏ ସବୁକୁ ମିଶାଇଲେ ଡିଜେଲ ଲିଟର ପିଛା ଗ୍ରାହକକୁ ଦେବାକୁ ପଡୁଛି ମୋଟ୍ ୮୬ ଟଙ୍କା ୪୫ ପଇସା ।
ଗତ ସାଧାରଣ ବଜେଟରେ କୃଷିର ବିକାଶ ପାଇଁ ତୈଳ ଦର ଉପରେ ସେସ ବସାଇଛନ୍ତି କେନ୍ଦ୍ର ସରକାର । କିନ୍ତୁ ଏହି ଅତିରିକ୍ତ କୃଷି ସେସ ଯୋଗୁଁ ଗ୍ରାହକଙ୍କୁ ଅଧିକ ଦର ଦେବାକୁ ପଡିବ ନାହିଁ ବୋଲି କୁହାଯାଇଥିଲା । ସେଥିପାଇଁ କେନ୍ଦ୍ର ତେଲ ନେଉଥିବା ଏକସାଇଜ ଡ୍ୟୁଟିରେ ସଂଶୋଧନ କରିଥିଲେ ସରକାର ।
ଏକସାଇଜ୍ ଡ୍ୟୁଟିରେ ସଂଶୋଧନ..
- ବେସିକ ଏକସାଇଜ ଟିକସ ୧.୪୮ ଟଙ୍କା, ପୂର୍ବରୁ ଥିଲା ୨.୯୮ ଟଙ୍କା
- ଅତିରିକ୍ତ ଏକସାଇଜ ଟିକସ ୧୧.୦୦ଟଙ୍କା, ପୂର୍ବରୁ ଥିଲା ୧୨.୦୦ ଟଙ୍କା
- ରୋଡ୍ ସେସ୍ ୧୮.୦୦ ଟଙ୍କା
- ନୂତନ କୃଷି ସେସ୍ ୨.୫୦ଟଙ୍କା
ସେହିପରି ଡିଜେଲରେ
- ବେସିକ ଏକସାଇଜ ଟିକସ ୧.୮୩ ଟଙ୍କା, ପୂର୍ବରୁ ଥିଲା ୪.୮୩ ଟଙ୍କା
- ଅତିରିକ୍ତ ଏକସାଇଜ ଟିକସ ୮.୦୦ଟଙ୍କା, ପୂର୍ବରୁ ଥିଲା ୯.୦୦ ଟଙ୍କା
- ରୋଡ୍ ସେସ୍ ୧୮.୦୦ ଟଙ୍କା
- ନୂତନ କୃଷି ସେସ୍ ୪.୦୦ଟଙ୍କା
ତୈଳ ଦର କ୍ରମାଗତ ଭାବେ ବୃଦ୍ଧି ପାଉଥିବାବେଳେ ରୋଷେଇ ଗ୍ୟାସର ଦର ମଧ୍ୟ ବଢିଚାଲିଛି । ଫେବ୍ରୁଆରୀରେ ଦ୍ୱିତୀୟ ଥର ପାଇଁ ସୋମବାର ୫୦ ଟଙ୍କା ବଢ଼ି ଭୁବନେଶ୍ୱରରେ ସିଲିଣ୍ଡର ପିଛା ଦର ୮ଶହ ଟଙ୍କାରେ ପହଁଚିଯାଇଛି ।