ରବୀନ୍ଦ୍ର ଜାଡେଜା ବିଜେପି କାର୍ଯ୍ୟକର୍ତ୍ତା, ତାଙ୍କ ପାଇଁ ଚେନ୍ନାଇ ହେଲା ଆଇପିଏଲ ଚାମ୍ପିୟନ । ତାମିଲନାଡୁର ବିଜେପି ସଭାପତିଙ୍କ ବୟାନକୁ ନେଇ ଚର୍ଚ୍ଚା ।
କନକ ବ୍ୟୁରୋ : ଆଇପିଏଲରେ ଚେନ୍ନାଇର ବିଜୟକୁ ନେଇ ବଡ ବୟାନ ଦେଇଛନ୍ତି ତାମିଲନାଡୁ ବିଜେପି ଅଧ୍ୟକ୍ଷ କେ. ଅନ୍ନମଲ୍ଲାଇ । ପଞ୍ଚମ ଥର ଚାମ୍ପିୟନ ହୋଇଥିବା ଚେନ୍ନାଇ ସୁପର କିଙ୍ଗସ ଓ ରବୀନ୍ଦ୍ର ଜାଡେଜାଙ୍କୁ ଶୁଭେଚ୍ଛା ଜଣାଇବା ସହ ଜାଡେଜାଙ୍କୁ ବିଜେପି କାର୍ଯ୍ୟକର୍ତ୍ତା ବୋଲି କହିଛନ୍ତି । ତାମିଲନାଡୁ ବିଜେପିର ଅଧିକାରିକ ଟ୍ୱିଟର ହ୍ୟାଣ୍ଡେଲରୁ ହୋଇଥିବା ଟ୍ୱିଟରେ ଅନ୍ନମଲ୍ଲାଇଙ୍କ ବୟାନକୁ ଦର୍ଶାଯାଇଛି । କ୍ରିକେଟର ରବୀନ୍ଦ୍ର ଜାଡେଜା ବିଜେପି କାର୍ଯ୍ୟକର୍ତ୍ତା । ତାଙ୍କ ପତ୍ନୀ ରିଭାଭା ଜାମନଗର ବିଧାନସଭାରୁ ବିଜେପି ବିଧାୟିକା । ଜାଡେଜା ନିଜେ ଗୁଜୁରାଟୀ । ବିଜେପି କର୍ମୀ ଜାଡେଜା ହିଁ ସିଏସକେକୁ ବିଜୟୀ କରାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗଣମାଧ୍ୟମ ସହ ଆଲୋଚନା ବେଳେ ଅନ୍ନମଲ୍ଲାଇ କହିଛନ୍ତି, ସିଏସକେ ପୁଣିଥରେ ଚାମ୍ପିୟନ ହେଲା ଏହା ଆମ ପାଇଁ ଗର୍ବ । ଗୁଜୁରାଟ ଟାଇଟନ୍ସ ବି ଉତ୍ସବ ମନାଇବା କଥା । କାରଣ ତାଙ୍କ ପାଖରେ ସିଏସକେ ଅପେକ୍ଷା ଅଧିକ ତାମିଲ ଅଛନ୍ତି । ସାଇ ସୁଦର୍ଶନ ୯୬ ରନ୍ ଗୁଜୁରାଟ ପାଇଁ କରିଥିଲେ । ତେଣୁ ସେଥିପାଇଁ ମଧ୍ୟ ଆମେ ଖୁସି । ଆମେ ଏଥିପାଇ ଖୁସି କାରଣ ବିଜେପି କାର୍ଯ୍ୟକର୍ତ୍ତା ହିଁ ବିଜୟୀ ରନ୍ କରିଥିଲେ । ଯାହାର ଭିଡ଼ିଓ କ୍ଲିପ୍ ଏବେ ଭାଇରାଲ ହେବାରେ ଲାଗିଛି । ଗତବର୍ଷ ଗୁଜୁରାଟ ବିଧାନସଭା ନିର୍ବାଚନରେ ଜାଡେଜାଙ୍କ ପତ୍ନୀ ରିଭାଭା ବିଜେପି ଟିକେଟରେ ନିର୍ବାଚନ ଲଢିଥିଲେ ଏବଂ ଜାଡେଜା ତାଙ୍କ ପାଇଁ ପ୍ରଚାର କରିଥିବାର ନଜର ଆସିଥିଲେ ।
ଚଳିତ ଆଇପିଏଲରେ ଚେନ୍ନାଇ ସୁପର କିଙ୍ଗସ ଚାମ୍ପିୟନ ହୋଇଛି । ବର୍ଷା ବାଧାପ୍ରାପ୍ତ ମ୍ୟାଚରେ ଗୁଜୁରାଟ ପ୍ରଥମେ ବ୍ୟାଟିଂ କରି ୨୦ ଓଭରରେ ୨୧୪ ରନ କରିଥିଲା । ତେବେ ଡିଏଲଏସ ନିୟମ ଅନୁଯାୟୀ ଚେନ୍ନାଇକୁ ୧୫ ଓଭରରେ ୧୭୧ ରନର ବିଜୟ ଲକ୍ଷ୍ୟ ମିଳିଥିଲା । ଏହି ବିଜୟଲକ୍ଷ୍ୟକୁ ଶେଷ ବଲରେ ହାସଲ କରି ଚାମ୍ପିୟନ ହୋଇଥିଲା ଚେନ୍ନାଇ ।