କନକ ନ୍ୟୁଜରେ ମତ ରଖିଲେ ତାଲିବାନୀ ମୁଖପାତ୍ର । କହିଲେ, ଭାରତୀୟଙ୍କୁ ଅଟକ ରଖିବା ଖବର ମିଛ, ନୀରିହ ଲୋକଙ୍କୁ ହତ୍ୟା ପ୍ରସଙ୍ଗରେ ରହିଲେ ଚୁପ୍ ।
କନକ ବ୍ୟୁରୋ : କାବୁଲ ବିମାନବନ୍ଦରରେ ବିଚିତ୍ର ସ୍ଥିତି ଲାଗି ରହିଛି । ହଜାର ହଜାର ସଂଖ୍ୟାରେ ଲୋକ ଦେଶ ବାହାରକୁ ଚାଲିଯିବା ପାଇଁ ଅପେକ୍ଷା କରି ରହିଛନ୍ତି । କାବୁଲ ବିମାନ ବନ୍ଦରର ଦୃଶ୍ୟ ଚାରିଆଡେ ଭାଇରାଲ ହେବାରେ ଲାଗିଛି । ହଜାର ହଜାର ଲୋକ ଅପେକ୍ଷା କରି ରହିଛନ୍ତ, କାଳେ ବିମାନରେ ବସିଯିବା ପାଇଁ ତାଙ୍କୁ ସୁଯୋଗ ମିଳିଯିବ । କିନ୍ତୁ କେହି ଜାଣି ନାହାନ୍ତି ତାଙ୍କ ପାଇଁ ଏ ସୁଯୋଗ ଆସିବ କି ନାହିଁ । ଏମାନଙ୍କ ମଧ୍ୟରେ ଅଧିକାଂଶ ଆମେରିକୀୟ ସେନାକୁ ବିଭିନ୍ନ ବାଟରେ ସହାୟତା କରିଥିବା ଆଫଗାନ ନାଗରିକ । ସେମାନଙ୍କର ଭୟ ହେଉଛି ଯେ କୌଣସି ସମୟରେ ତାଲିବାନୀମାନେ ତାଙ୍କୁ ମାରିଦେଇ ପାରନ୍ତି । ସେମାନେ ଆଶା ରଖିଛନ୍ତି ଯେ, ଆମେରିକା ସେନା ସେମାନଙ୍କୁ ଦେଶ ବାହାରକୁ ଚାଲିଯିବା ପାଇଁ ବାଟ ବାହାର କରିବ । ଗତ ସାତ ଦିନ ଭିତରେ କାବୁଲ ଏୟାରପୋର୍ଟରେ ଏ ଭଳି ଭିଡ ଯୋଗୁ ଦଳାଚକଟାରେ ୨୦ ଜଣଙ୍କର ମୃତ୍ୟୁ ହୋଇଗଲାଣି ।
Kanak News is now on WhatsApp
Join and get latest news updates delivered to you via WhatsApp
କାବୁଲର ଏକ ଉତେଜନାପ୍ରବଣ ଅଂଚଳରୁ ଆସିଥିବା ଭିଡ଼ିଓରେ ଜଣେ ସାମ୍ବାଦିକା ସୁମେଇରା ଖାନ ଲାଇଭ ରିପୋର୍ଟିଂ କରୁଥିବା ବେଳେ ପଛପଟେ ଆଖିବୁଜା ଗୁଳି ଫୁଟୁଛି । ଏହି ଦୃଶ୍ୟରେ ଦେଖିବାକୁ ମିଳୁଛି, ସାମ୍ବାଦିକାଙ୍କ ପଛରେ ଥିବା ଲୋକ ଧାଁ ଧପଡ କରିବା ଆରମ୍ଭ କରିଦେଲେଣି କିନ୍ତୁ ସାମ୍ବାଦିକା ଜଣକ ନିର୍ଭିକ ଭାବେ ରିପୋର୍ଟିଂ କରିଚାଲିଛନ୍ତି । ଏଭଳି ବିପଦପୂର୍ଣ୍ଣ ସ୍ଥାନରୁ ରିପୋର୍ଟିଂ ପାଇଁ ଟୁଇଟରରେ ବେଶ୍ ପ୍ରଶଂସା କରାଯାଇଛି । ପ୍ରଥମ ଥର ପାଇଁ ଓଡିଶାର ଏକ ନ୍ୟୁଜ୍ ଚ୍ୟାନେଲ, କନକ ନ୍ୟୁଜ୍କୁ ପ୍ରତିକ୍ରିୟା ଦେଇଛନ୍ତି ତାଳିବାନ ମୁଖପାତ୍ର ଜାବିବୁଲା ମୁଜାହିଦ୍ । ସେ କହିଛନ୍ତି, ଭାରତୀୟ ମାନେ ଆଦୌ ତାଲିବାନର ଟାର୍ଗେଟରେ ନାହାନ୍ତି । ୧୫୦ ଜଣ ଭାରତୀୟଙ୍କୁ ଅଟକ ରଖିବା ଖବର ମିଛ ବୋଲି କହିଛନ୍ତି ।
ଆମ ପ୍ରତିନିଧି କଳିଙ୍ଗଶ୍ରୀ ପଣ୍ଡାଙ୍କୁ ଏହି ତାଲିବାନୀ ମୁଖପାତ୍ର କହିଛନ୍ତି, ସେଠାରେ ସରକାର ଗଠନ ହୋଇନଥିବାରୁ ଓ ଶାସନ ଲାଗୁ ହୋଇନଥିବାରୁ ଏଭଳି ଅସ୍ୱାଭାବିକ ସ୍ଥିତି ରହିଛି । କିନ୍ତୁ ତାଙ୍କର ନିଜ ସୈନିକ ମାନେ କାହିଁକି ନୀରିହ ଲୋକଙ୍କୁ ମାରୁଛନ୍ତି ବୋଲି ଆମେ ପ୍ରଶ୍ନ କରିଥିଲୁ ସେ ଏହାର କୈାଣସି ଉତର ଦେଇନଥିଲେ । ତାଲିବାନୀ ମାନେ ପ୍ରତିଶୃତି ଦେଉଛନ୍ତି ଯେ, ୧୯୯୬ ରୁ ୨୦୦୧ ପର୍ଯ୍ୟନ୍ତ ଯେଉଁ କଠୋର ନୀତିରେ ସେମାନେ ଶାସନ କରୁଥିଲେ, ଏବେ ସେଭଳି କରିବେ ନାହିଁ ଏବଂ ସେମାନେ ନରମ ଆଭିମୁଖ୍ୟ ପୋଷଣ କରିବେ । କିନ୍ତୁ ଆଫଗାନିସ୍ତାନରେ ଯେଉଁ ଘଟଣା ସବୁ ଘଟୁଛି ତାହା ସମ୍ପୂର୍ଣ୍ଣ ଭିନ୍ନ କଥା ବୟାନ କରୁଛି ।