ଆଫଗାନିସ୍ତାନରେ ମାଡି ଚାଲିଛି ତାଲିବାନ । ଆମେରିକା ଗୁଇନ୍ଦା ସଂସ୍ଥାର ଚେତାବନୀ । ଆଗାମୀ ୯୦ ଦିନ ମଧ୍ୟରେ କାବୁଲ ଉପରେ କବଜା କରିପାରେ ତାଲିବାନ ।
କନକ ବ୍ୟୁରୋ: ଆଫଗାନିସ୍ତାନରେ ତାଲିବାନ ଆତଙ୍କ ବଢିବାରେ ଲାଗିଛି । ଆମେରିକା ସେନା ଧୀରେ ଧୀରେ ଆଫଗାନିସ୍ତାନ ଛାଡୁଥିବା ବେଳେ ଆଫଗାନ ସେନା ତାଲିବାନର ମୁକାବିଲା କରିପାରୁ ନାହାନ୍ତି । ସେଇଥିପାଇଁ ଆଫଗାନିିସ୍ତାନର ଗୋଟିଏ ପରେ ଗୋଟିଏ ସହର ତାଲିବାନ କବଜାକୁ ଚାଲିଯାଉଛି ଆଉ ତାଲିବାନ ଦଖଲରେ ଥିବା ସହର ତାଲିକାରେ ଏବେ ସାମିଲ ହୋଇଛି, ପୁଲ-ଇ-ଖୁମାରୀ, ଫୈଜାବାଦ, ଫରାହ, ସର-ଏ-ପୁଲ ।
Kanak News is now on WhatsApp
Join and get latest news updates delivered to you via WhatsApp
ସେହିପରି ପଶ୍ଚିମାଞ୍ଚଳରେ ଥିବା ନିମରୋଜ ବିଭିନ୍ନ ରାଜଧାନୀ ଜରଞ୍ଜ, ଉତ୍ତର ଜୌଜଜାନ ପ୍ରୋଭିନ୍ସର ରାଜଧାନୀ ଶେବରଗାନ, ଉତ୍ତର ସୁବେ ତାଲକାନ ପ୍ରାନ୍ତର ରାଜଧାନୀ ତାଲକାନ, ହେଲମଣ୍ଡ ପ୍ରାନ୍ତର ରାଜଧାନୀ ଲସ୍କରଗାହକୁ ମଧ୍ୟ ଦଖଲ କରିଛନ୍ତି ତାଲିବାନୀ । ବିଭିନ୍ନ ପ୍ରାନ୍ତର ଗ୍ରାମାଞ୍ଚଳକୁ କବଜା କରିଥିବା ତାଲିବାନ ଏବେ ପ୍ରାନ୍ତର ରାଜଧାନୀକୁ ଟାର୍ଗେଟ କରି ରକ୍ତାକ୍ତ ସଂଘର୍ଷ ଚଳାଇଛି । ଅଗଷ୍ଟ ୧୧ ସୁଦ୍ଧା ଉତ୍ତର କୁଣ୍ଡୁଜ ସମେତ ଉତ୍ତର ଆଫାଗାନିସ୍ତାନର ଏକାଧିକ ସହରକୁ ଦଖଲ କରିଛି ତାଲିବାନ ସଂଗଠନ ।
ଉତ୍ତର କୁଣ୍ଡୁଜ ପ୍ରାନ୍ତର ରାଜଧାନୀ କୁଣ୍ଡୁଜ ସହରକୁ କବଜା କରିବା ପରେ ତାଲିବାନ ଯୋଦ୍ଧା ପରସ୍ପରକୁ ଶୁଭେଚ୍ଛା ଜଣାଉଥିବା ଫଟୋ ସୋସିଆଲ ମିଡିଆରେ ଭାଇରାଲ ହେଉଛି । ସାମରିକ ଓ ପ୍ରଶାସନିକ ଦୃଷ୍ଟିରୁ କୁଣ୍ଡୁଜ ସହର ଆତଙ୍କୀଙ୍କ ପାଇଁ ସୁବିଧାଜନକ ହେବ । ସେହିପରି ବଦାଖସାନ ପ୍ରୋଭିନ୍ସର ରାଜଧାନୀ ଫୈଜାବାଦ ତାଲିବାନ ଦଖଲରେ ରହିବା ଆଫଗାନିସ୍ତାନ ପାଇଁ ବଡ ଝଟକା । କାରଣ ବଦାଖସାନ ତାଜକିସ୍ତାନ, ପାକିସ୍ତାନ ଓ ଚୀନ ବର୍ଡରକୁ ଲାଗିକି ରହିଛି । ଅଗଷ୍ଟ ପ୍ରଥମ ସପ୍ତାହରେ ତାଲିବାନ ୯ ରାଜ୍ୟର ରାଜଧାନୀକୁ କବଜା କରିଥିବା ସୂଚନା ମିଳିଛି । ସହରକୁ କବଜା କରିବା ପରେ ତାଲିବାନଙ୍କ ଲୁଟତରାଜ ଓ ହିଂସାକାଣ୍ଡକୁ ନେଇ ଭାରତ ସମେତ ସାରା ବିଶ୍ୱ ଉଦବେଗ ପ୍ରକାଶ କରିଛି ।