ସନ୍ଦେହ ବଢ଼ୁଛି, ରହସ୍ୟ ବଢ଼ୁଛି । ପୋଲିସ କହିଲା, ସତ ମାନିଲା ସାଇକୋ କିଲର, କିନ୍ତୁ ତଥ୍ୟକୁ ନେଇ ଘନିଭୂତ ହେଉଛି ସନ୍ଦେହର ବାଦଲ ।
କନକ ବ୍ୟୁରୋ : ସତ ମାନିଲା ସାଇକୋ କିଲର୍ । କଟକର ତିନି-ତିନି ହତ୍ୟାକାଣ୍ଡ ଘଟଣାରୁ ୨ଟି ହତ୍ୟା ଘଟଣାରେ ନାରାୟଣ ସାହୁ ସଂପୃକ୍ତ ଥିବା ସ୍ୱୀକାର କରିଛି । ଓଏମପି ଛକର ୨ଟି ମର୍ଡର ଘଟଣାରେ ନାରାୟଣ ସଂପୃକ୍ତ ଥିବା ଡିସିପି ସ୍ପଷ୍ଟ କରିଥିବା ବେଳେ ରାଣୀହାଟ ମର୍ଡର ଘଟଣାରେ ଅଧିକ ପଚରାଉଚୁରା କରୁଛି । ଆଜି ଅଭିଯୁକ୍ତକୁ ନେଇ ରେକି କରିବା ବେଳେ ହତ୍ୟା ବେଳେ ବ୍ୟବହାର ହୋଇଥିବା ଗୋଟିଏ କୁରାଢ଼ି ଏବଂ ୨ଟି ଗାମୁଛାକୁ ଜବତ କରିଛି ପୁଲିସ୍ ।
Kanak News is now on WhatsApp
Join and get latest news updates delivered to you via WhatsApp
ସାମ୍ବାଦିକ ସମ୍ମିଳନୀରେ ଡିସିପି କହିଛନ୍ତି, ଯେଉଁ ଦୁଇ ଜଣଙ୍କୁ ହତ୍ୟା କରାଯାଇଛି, ସେମାନେ ନାରାୟଣଙ୍କୁ ସେ ରହୁଥିବା ଘରୁ ବାହାର କରିବା ପାଇଁ ଚେଷ୍ଟା କରିଥିଲେ । ଯେଉଁଥି ପାଇଁ ତାଙ୍କୁ ନାରାୟଣ ହତ୍ୟା କରିଛି । ତେବେ ଘଟଣାର ଗୁରୁତ୍ୱକୁ ଦେଖି ଆବଶ୍ୟକ ସ୍ଥଳେ ଡିଏନଏ ଏବଂ ପଲିଗ୍ରାଫି ଟେଷ୍ଟ ମଧ୍ୟ କରାଯିବ ବୋଲି କଟକ ଡିସିପି କହିଛନ୍ତି । ଆଉ ଏସବୁ ଭିତରେ କଟକ ହତ୍ୟାକାଣ୍ଡ ଘଟଣାରେ ସନ୍ଦିଗ୍ଧ ନାରାୟଣ ସାହୁକୁ ଆଜି କୋର୍ଟ ଚାଲାଣ କରିଛି ପୁଲିସ୍ । ଏହି ତମାମ୍ ସୂଚନା ଭିତରେ ବି, ସାଇକୋ କିଲରକୁ ନେଇ ଉଠୁଥିବା ସନ୍ଦେହ ଦୂର ହୋଇପାରିନି ।
ସାଇକୋ କିଲର୍ ଧରା ପଡ଼ିବା, ପଚରାଉଚୁରା ପରେ ସତ ମାନିବା ଏବଂ ସମସ୍ତ ଘଟଣା ନେଇ ଡିିସିପି ସାମ୍ବାଦିକ ସମ୍ମଳନୀରେ ସୂଚନା ଦେବା, ଏହି ତମାମ୍ ପ୍ରକ୍ରିୟା ଭିତରେ ଏଇୟା ଲାଗୁଛି ଯେ, ତଦନ୍ତର ଦିଗ ଠିକ୍ ବାଟରେ ଯାଉଛି । କିନ୍ତୁ ଏହାରି ଭିତରେ କିଛି ତଥ୍ୟକୁ ନେଇ ସନ୍ଦେହର ବାଦଲ ଘନିଭୂତ ହେବାରେ ଲାଗିଛି ।
ସନ୍ଦେହ ନମ୍ବର-୧ :
ହତ୍ୟାକାଣ୍ଡ ଘଟିବା ପରେ ଫରେନସିକ୍ ମେଡିସିନ୍ ବିଭାଗର ଅନୁଧ୍ୟାନ ପରେ ହତ୍ୟାକାରୀକୁ ସାଇକୋ ବୋଲି ଆଶଙ୍କା କରୁଥିଲା ପୁଲିସ । କିନ୍ତୁ ସାମ୍ବାଦିକ ସମ୍ମିଳନୀରେ ଆଜି ଡିପିସି କହୁଛନ୍ତି ନାରାୟଣ ସାହକୁ ଘରୁ ବାହାର କରିବା ଯୋଗୁଁ ସେ ଦୁଇଟି ହତ୍ୟାକାଣ୍ଡ ଘଟାଇଛି ।
ସନ୍ଦେହ ନମ୍ବର-୨ :
ହତ୍ୟାକାଣ୍ଡରେ ବ୍ୟବହାର ହୋଇଥିବା ଅସ୍ତ୍ର । ପୂର୍ବରୁ ଏକ ଧାରୁଆ ଅସ୍ତ୍ରରେ ଗଳାକାଟି ନାରାୟଣ ବା ସାଇକୋ କିଲର ୩ଜଣଙ୍କୁ ହତ୍ୟା କରିଥିବା ସୂଚନା ଦେଇଥିଲା ପୋଲିସ । କିନ୍ତୁ ଆଜି ଗୋଟିଏ କୁରାଢ଼ି ଜବତ କରିଛି । ଯଦିଓ କୁରାଢ଼ିକୁ ଧାରୁଆ ଅସ୍ତ୍ର ବୋଲି ଗ୍ରହଣ କରାଯାଏ, ତେବେ କୁରାଢ଼ିରେ ଗଳାକାଟି ହତ୍ୟା କରିବା ଘଟଣା ଆହୁରି ସନ୍ଦେହ ସୃଷ୍ଟି କରୁଛି ।
ସନ୍ଦେହ ନମ୍ବର-୩ :
ହତ୍ୟାପରର ଆଶଙ୍କା ଅନୁସାରେ ଅଭିଯୁକ୍ତ ଜଣକ ସାଇକୋ । ଅର୍ଥାତ୍ ତା’ର ମାନସିକ୍ ଅବସ୍ଥା ଠିକ୍ ନୁହେଁ । ତେବେ ଏଭଳି ଜଣେ ଅଭିଯୁକ୍ତକୁ କେମିତି ଡାକ୍ତରୀ ପରୀକ୍ଷା କରିବାର ଆବଶ୍ୟକତା ଅନୁଭବ କଲାନି ପୁଲିସ । କାରଣ ସଂପୃକ୍ତ ବ୍ୟକ୍ତି କହିପାରିବ ନା ନାହିଁ, ଜେରାକୁ ସମ୍ମୁଖୀନ ହୋଇପାରିବ ନା ନାହିଁ । ଏଦିଗରେ ବିଚାର କରିବା ପୂର୍ବରୁ କେମିତି ଘନଘନ ଜେରା କରାଗଲା ।
ସନ୍ଦେହ ନମ୍ବର-୪ :
ଅଭିଯୁକ୍ତ ନାରାୟଣ ସାହୁକୁ ଧରିବାର ତିନି ଦିନ ଯାଏଁ କାହିଁକି ଅପେକ୍ଷା କରିବାକୁ ପଡ଼ିଲା । ଆଉ ଆଜି କ୍ୟାମେରା ଆଗରେ ଘଟଣାସ୍ଥଳକୁ ଯାଇ କ୍ୟାମେରା ସାମ୍ନାରେ କୁରାଢ଼ି ଏବଂ ଗାମୁଛା ଜବତ କରିବା ବି ଘଟଣାକୁ ନେଇ ସନ୍ଦେହ ବଢ଼ାଉଛି ।
ସନ୍ଦେହ ନମ୍ବର-୫ :
ଅଭିଯୁକ୍ତ ନାରାୟଣଙ୍କ ଗାଁ ଲୋକ ତଥା ତାଙ୍କ ପରିବାର ଲୋକଙ୍କ ଯୁକ୍ତି ହେଉଛି, ନାରାୟଣ ମାଛିକୁ ମ’ କହିବା ବ୍ୟକ୍ତି ନୁହଁନ୍ତି । ଯଦି ଗାଁ ଲୋକଙ୍କ କଥାକୁ ବିଶ୍ୱାସକୁ ନିଆଯାଏ, ତେବେ ଏଭଳି ଜଣେ ବ୍ୟକ୍ତି ହଠାତ୍ କେମିତି ହତ୍ୟାକାଣ୍ଡ ଘଟାଇବ ।
ହତ୍ୟାକାରୀ କିଏ ଓ କାହିଁକି ହତ୍ୟା କଲା ଏହାର ଉତ୍ତର ପୁଲିସ୍ ହିଁ ଦେଇ ପାରିବ । କାରଣ ପୁଲିସ୍ ତଦନ୍ତ କରିବା ସହ ଘଟଣାକୁ ଅତି ନିକଟରୁ ଦେଖିଛି । କିନ୍ତୁ ଡିସିପି ଏବଂ ପୁଲିସ୍ କମିଶନରଙ୍କ ବୟାନରେ ତଫାତ୍ ଏବଂ ସାଧାରଣରେ ଆସୁଥିବା ସନ୍ଦେହ ଘଟଣାର ଗୁରୁତ୍ୱକୁ ବଢ଼ାଇ ଦେଇଛି ।