ଶ୍ରୀମନ୍ଦିର ଚାରିପାଖରୁ ଉଚ୍ଛେଦ କାମ ଜାରି ରହିବ । ମାମଲାର ଶୁଣାଣି କରି ସବୁଜ ସଂକେତ ଦେଲେ ସୁପ୍ରିମକୋର୍ଟ ।
କନକ ବ୍ୟୁରୋ : ସୁପ୍ରିମକୋର୍ଟରେ ଖାରଜ ହୋଇଛି ଶ୍ରୀମନ୍ଦିର ମାମଲା । ଶ୍ରୀମନ୍ଦିର ଚାରିକଡ଼ରେ ଉଚ୍ଛେଦ କାମ ବନ୍ଦ କରିବା ପାଇଁ ସୁପ୍ରିମକୋର୍ଟରେ ୨ଟି ଆବେଦନ ହୋଇଥିଲା । ଦିଲ୍ଲୀ ଏବଂ ଚେନ୍ନାଇର ୨ଟି ସଂସ୍ଥା ଏହି ଆବେଦନ କରିଥିଲେ । ସୁପ୍ରିମକୋର୍ଟ ଏହି ମାମଲାକୁ ଖାରଜ କରିବା ସହ ଉଚ୍ଚେଦ କାମ ଜାରି ରହିବ ବୋଲି କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଶ୍ରୀମନ୍ଦିର ମେଘନାଦ ପାଚେରୀରୁ ୭୫ ମିଟର ଯାଏଁ ଯେଉଁ ଉଚ୍ଛେଦ ଅଭିଯାନ ଚାଲିଛି, ତା’ ଉପରେ ରହିତାଦେଶ ଜାରି କରିବା ପାଇଁ ହୋଇଥିବା ୨ଟି ମାମଲାକୁ ଖାରଜ କରିଦେଇଛନ୍ତି ସୁପ୍ରିମକୋର୍ଟ । ସୁପ୍ରିମକୋର୍ଟଙ୍କ ତିନି ଜଣିଆ ଖଣ୍ଡପୀଠ ଏହି ମାମଲାର ଶୁଣାଣି କରିବା ସହ ପୁରୀର ଉଚ୍ଛେଦ ଅଭିଯାନ ନେଇ ଆଡଭୋକେଟ୍ ଜେନେରାଙ୍କ ବୟାନକୁ ଶୁଣିଲା ପରେ ୨ଟି ମାମଲାକୁ ଖାରଜ କରିଛନ୍ତି ।
ଶ୍ରୀମନ୍ଦିର ସଂସ୍କାର ପାଇଁ ନିଯୁକ୍ତ ଜଷ୍ଟିସ୍ ବି.ପି ଦାସ କମିଶନଙ୍କ ସୁପାରିଶ ଏବଂ ରାଜ୍ୟ କ୍ୟାବିନେଟର ସ୍ୱୀକୃତି କ୍ରମେ ଉଚ୍ଛେଦ ପ୍ରକ୍ରିୟା ଚାଲିଥିବା ସର୍ବୋଚ୍ଚ ନ୍ୟାୟାଳୟ ଜାଣିବା ପରେ ଦୁଇଟି ମାମଲାକୁ ଖାରଜ କରିଦେଇଛନ୍ତି । ତେବେ ଶ୍ରୀମନ୍ଦିର ଭିତର ଏବଂ ବାହାରରେ କେଉଁ ସବୁ ନୂଆ ବିକାଶ ଯୋଜନା ରହିଛି, ସେ ସଂପର୍କରେ ଏକ ବିସ୍ତୃତ ରିପୋର୍ଟ ଦେବାକୁ ଆମିକସ୍ କ୍ୟୁରୀ ଏବଂ ସୋଲିସିଟର୍ ଜେନେରାଲଙ୍କୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ ।
ତେବେ ଜିଲ୍ଲା ଜଜଙ୍କ ନିର୍ଦ୍ଦେଶକ୍ରମେ ଶ୍ରୀମନ୍ଦିର ସଂସ୍କାର ନେଇ ପୂର୍ବରୁ ଏକ ବିସ୍ତୁତ ରିପୋର୍ଟ କୋର୍ଟଙ୍କ ସାମ୍ନାରେ ରଖିଛନ୍ତି ଆମିକସ୍ କ୍ୟୁରୀ । ଆସନ୍ତା ୧୭ ତାରିଖରେ ହେବ ଏହାର ପରବର୍ତୀ ଶୁଣାଣୀ । ଗତ ଅଗଷ୍ଟ ୧୬ ତାରିଖରେ ପୁରୀ ଶ୍ରୀମନ୍ଦିର ଚାରିପାଶ୍ୱର୍ରେ ବେଆଇନ ନିର୍ମାଣ ସବୁକୁ ଉଚ୍ଛେଦ କରିବା ପାଇଁ ନିର୍ଦ୍ଦେଶ ଦେଇଥିଲେ । ସେହିପରି ଶ୍ରୀମନ୍ଦିରର ସୁରକ୍ଷା ଏବଂ ଭକ୍ତଙ୍କ ଶୃଙ୍ଖଳିତ ଦର୍ଶନ ପାଇଁ ୭୫ ମିଟର ଯାଏଁ, ଉଚ୍ଛେଦ କରିବାକୁ ନିର୍ଦ୍ଦେଶ ଦେଇଥିଲେ ରାଜ୍ୟ ସରକାର ।