ସୁପ୍ରିମକୋର୍ଟ ଶୁଣାଇଲେ ଗୀତାର ବାଣୀ! ଶ୍ରୀମନ୍ଦିରକୁ ଅଣ-ହିନ୍ଦୁ ପ୍ରବେଶ ନେଇ ଦେଲେ ପ୍ରସ୍ତାବ, କହିଲେ, ବିଶ୍ୱାସ ଓ ପୂଜାବିଧି ଅଲଗା ହେଲେ ଭଗବାନ ଗୋଟିଏ
କନକ ବ୍ୟୁରୋ : କୌଣସି ମନ୍ଦିରରେ କେବଳ ହିନ୍ଦୁ ହିଁ ପ୍ରବେଶ କରି ପାରିବେ କି? ଏହା ବିତର୍କର ବିଷୟ ହୋଇଥିବା ବେଳେ ସୁପ୍ରିମକୋର୍ଟରେ ବିଚାରପତି ଗୀତାର ଶ୍ଲୋକରୁ ଧର୍ମନିରପେକ୍ଷତାର ସଂଜ୍ଞା ନିର୍ଧାରଣ କରିଛନ୍ତି । ଏହା ସହ ମନ୍ଦିର ଭିତରକୁ ଅଣ ହିନ୍ଦୁ ପ୍ରବେଶ ନିଷେଧ ଉପରେ ଚିନ୍ତା କରିବାକୁ ଦୁଇ ଜଣିଆ ଖଣ୍ଡପୀଠ ପରାମର୍ଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
।। ୟେପେନ୍ନ ଦେବତା ଭକ୍ତା ୟଜନ୍ତେ ସରଧାୟାନବିତାଃ
ତେପି ମାମେବ କୌନ୍ତେୟ ୟଜନ୍ତ୍ୟବିଧିପୂର୍ବକମ୍ ।।
ଅର୍ଥାତ “ହେ କୁନ୍ତି ପୁତ୍ର, ପୂର୍ଣ୍ଣ ବିଶ୍ୱାସର ସହ ଯିଏ ଯୋଉ ଠାକୁରଙ୍କୁ ବି ପୂଜା କରନ୍ତୁ ନା କାହିଁକି ସେମାନେ ମୋତେ ହିଁ ପୂଜା କରୁଛନ୍ତି” । ଭଗବତ ଗୀତାର ଏହି ପଂକ୍ତି ସହ ସୁପ୍ରିମକୋର୍ଟର ପୂର୍ବତନ ମୁଖ୍ୟ ବିଚାରପତି ଜଷ୍ଟିସ ପିବି ଗଜେନ୍ଦ୍ରଗଡକରଙ୍କ ଏକ ବହି ‘ଟୁ ଦ ବେଷ୍ଟ ଅଫ ମାଇଁ ମେମୋରି’ର କିଛି ଲାଇନକୁ ଉଦ୍ଧାର କରିଥିଲେ ସୁପ୍ରିମକୋର୍ଟଙ୍କ ଦୁଇ ଜଣିଆ ଖଣ୍ଡପୀଠ । କୋର୍ଟ କହିଥିଲେ ଯେ, ଧର୍ମନିରପେକ୍ଷତା ଅର୍ଥ ଧାର୍ମିକ ସ୍ୱାଧୀନତାରେ କୌଣସି ଗୋଟିଏ ଧର୍ମର ଏକାଧିପତ୍ୟ ଚଳିବ ନାହିଁ । ଆମ ଧର୍ମନିରପେକ୍ଷତା ଭଗବତ ଗୀତାର ଏହି ଦୁଇଧାଡି ଉପରେ ପର୍ଯ୍ୟବେସିତ । ଅର୍ଥାତ ଉପାସନାସ୍ଥଳ ଓ ପୂଜା କରିବାର ବିଧି ଅଲଗା ଅଲଗା ହୋଇଥିଲେ ମଧ୍ୟ ଭଗବାନ ଏକ । ଯେଉଁ ଆଧାରରେ ପୁରୀ ଶ୍ରୀମନ୍ଦିରରେ ଅଣହିନ୍ଦୁଙ୍କ ପ୍ରବେଶ ନେଇ ପ୍ରସ୍ତାବ ଦେଇଛନ୍ତି ଦେଶର ସର୍ବୋଚ୍ଚ ନ୍ୟାୟାଳୟ ।
ସୁପ୍ରିମକୋର୍ଟଙ୍କ ଏଭଳି ପ୍ରସ୍ତାବ ଏକ ବଡ ବିତର୍କ ଆଡକୁ ମୁହାଁଉଛି । କାରଣ ସାରା ବିଶ୍ୱରେ ଅନ୍ୟାନ୍ୟ ମନ୍ଦିର ଓ ଆରାଧନା ପୀଠ ଅପେକ୍ଷା ପୁରୀ ଶ୍ରୀମନ୍ଦିରର ପୂଜାବିଧି ଓ ପରମ୍ପରା ଭିନ୍ନ ଏବଂ ବର୍ଷବର୍ଷ ଧରି ଏହା ଅପରିବର୍ତିତ ରହିଆସିଛି । ପୁରୀ ଶ୍ରୀମନ୍ଦିର ବିଧି ବ୍ୟବସ୍ଥା ଅନୁସାରେ ଅଣ ହିନ୍ଦୁମାନେ ମନ୍ଦିର ଭିରତକୁ ପ୍ରବେଶ କରିପାରିବେ ନାହିଁ । ଯେଉଁଥିପଇଁ କୁହାଯାଏ ବର୍ଷକୁ ଥରେ ମହାପ୍ରଭୁ ଶ୍ରୀଜଗନ୍ନାଥ ଗୁଣ୍ଡିଚା ଯାତ୍ରା ସମୟରେ ସମଗ୍ର ବିଶ୍ୱର ଭକ୍ତଙ୍କୁ ଦର୍ଶନ ଦେବାପାଇଁ ବଡ ଦାଣ୍ଡକୁ ଓହ୍ଲାଇ ଆସନ୍ତି । ଯେଉଁଠି ଜାତି ଧର୍ମ ବର୍ଣ୍ଣ କିମ୍ବା ବର୍ଗର କୌଣସି ବାଛବିଚାର ନଥାଏ । ଯେ କୌଣସି ଧର୍ମବିଶ୍ୱାସୀ ଠାକୁରଙ୍କୁ ଆଖି ପୁରାଇ ଦେଖିବାର ସୌଭାଗ୍ୟ ପାଆନ୍ତି । ଯାହା ପୃଥିବୀରେ ଅନ୍ୟ କୌଣସି ମନ୍ଦିର ପରମ୍ପରାରେ ଦେଖିବାକୁ ମିଳେନାହିଁ । ତେବେ ସୁପ୍ରିମକୋର୍ଟଙ୍କ ଏଭଳି ପ୍ରସ୍ତାବକୁ ବିରୋଧ କରିଛନ୍ତି ସେବାୟତ । କିନ୍ତୁ ଜ୍ଞାନପୀଠ ପୁରସ୍କାର ବିଜେତା ପ୍ରତିଭା ରାୟ ସୁପ୍ରିମକୋର୍ଟଙ୍କ ଏଭଳି ପ୍ରସ୍ତାବକୁ ସମର୍ଥନ କରିଛନ୍ତି । ତେଣୁ ସୁପ୍ରିମକୋର୍ଟଙ୍କ ଏଭଳି ଏକ ପ୍ରସ୍ତାବ କେତେଦୂର ଗ୍ରହଣୀୟ ହୋଇପାରିବ ତାହା ବଡ ପ୍ରଶ୍ନବାଚୀ ।