ଜନତାଙ୍କ ହୃଦୟ ଜିଣି ଲଗାତାର ୫ଥର ରାଜ୍ୟର ରାଜମୁକୁଟ ପିନ୍ଧିଛନ୍ତି ବିଜୁଙ୍କ ଦାୟାଦ । ସେଥିପାଇଁ ତ ଗାଁରୁ ଗ୍ଲୋବାଲ ଖାଲି ନବୀନ, ନବୀନ ଆଉ ନବୀନ ।
ରାଜନୀତିକୁ ଆସିବା ପୂର୍ବରୁ ଓଡ଼ିଶାରେ ନବୀନଙ୍କ ପରିଚୟ ଥିଲା ଜନନେତା ବିଜୁ ପଟ୍ଟନାୟକଙ୍କ ପୁଅ ଭାବେ । ଓଡ଼ିଶା ବାହାରେ ଜଣେ ଲେଖକ ଭାବେ ସେ ନିଜର ପରିଚୟ ସୃଷ୍ଟି କରିଥିଲେ । ହେଲେ ରାଜନୀତିରେ ପ୍ରବେଶ କରିବା ପରେ ଦେଶର ରାଜନୀତିରେ ସ୍ୱତନ୍ତ୍ର ସ୍ଥାନ ଅଧିକାର କରିଥିଲେ ନବୀନ । ସେ ଏପରି କିଛି କାର୍ଯ୍ୟ କରି ଦେଖାଇଛନ୍ତି, ଯାହା ତାଙ୍କୁ ଅନ୍ୟ ନେତାଙ୍କ ଠାରୁ ଭିନ୍ନ କରିଛି ।
କନକ ବ୍ୟୁରୋ: ନବୀନ ଦେଶର ରାଜନୀତିରେ ଏପରି ଜଣେ ରାଜନେତା, ଯିଏ କ୍ରମାଗତ ଭାବେ ୫-୫ ଥର ମୁଖ୍ୟମନ୍ତ୍ରୀ ହେବାର ଗୌରବ ଲାଭ କରିଛନ୍ତି । ଓଡ଼ିଶାର ଲୋକପ୍ରିୟ ଜନନେତା ବିଜୁ ପଟ୍ଟନାୟକଙ୍କ ଦେହାନ୍ତ ପରେ ଏକ ନାଟକୀୟ ଘଟଣାକ୍ରମରେ ରାଜନୀତିରେ ପ୍ରବେଶ କରିବା ପରେ ବିଜୁ ଲିଗାସିକୁ ବେଶ୍ ଆଗକୁ ନେଇଛନ୍ତି ନବୀନ । ରାଜ୍ୟର ବିକାଶ ଲାଗି ତାଙ୍କର ଦୂରଦୃଷ୍ଟି ଏବଂ ଅସହାୟ, ଅବହେଳିତ ବର୍ଗ ପ୍ରତି ଥିବା ସମ୍ବେଦନଶୀଳତା ଯୋଗୁଁ ଦେଶର ଏକ ନିଆରା ରାଜନୈତିକ ବ୍ୟକ୍ତିତ୍ୱ ଭାବେ ସେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି । ଦେଶର ଏକ ନମ୍ବର ମୁଖ୍ୟମନ୍ତ୍ରୀ, ଆଦର୍ଶ ମୁଖ୍ୟମନ୍ତ୍ରୀ, ଶ୍ରେଷ୍ଠ ପ୍ରଶାସକ ଭଳି ଅନେକ ସମ୍ମାନରେ ସମ୍ମାନିତ ହୋଇଛନ୍ତି ନବୀନ ।
Kanak News is now on WhatsApp
Join and get latest news updates delivered to you via WhatsApp
୧୯୯୯ ମହାବାତ୍ୟାରେ ହଜାର ହଜାର ଲୋକଙ୍କ ଅକାଳ ମୃତ୍ୟୁ ତାଙ୍କୁ ଏପରି ବିଚଳିତ କରିଥିଲା ଯେ ରାଜ୍ୟରେ ଏହାର ପୁନରାବୃତି କରାଇ ଦେଇନାହାନ୍ତି ନବୀନ । ଫାଇଲିନ୍, ତିତ୍ଲି ଏବଂ ନିକଟରେ ଧ୍ୱଂସଲୀଳା ରଚିଥିବା ଫୋନି ଭଳି ବଡ଼ ବାତ୍ୟାରେ ଲକ୍ଷ ଲକ୍ଷ ଲୋକଙ୍କ ଜୀବନ ରକ୍ଷା କରିବାରେ ସଫଳ ହୋଇଛି ତାଙ୍କ ସରକାର । ଫୋନି ମାଡ଼ ହେବା ପୂର୍ବରୁ ୧୦ ଲକ୍ଷ ଲୋକଙ୍କୁ ସ୍ଥାନାନ୍ତର କରି ଦେଶ ଓ ବିଦେଶରେ ନବୀନ ପ୍ରଶଂସିତ ହୋଇଛନ୍ତି । ପ୍ରାକୃତିକ ବିପର୍ଯ୍ୟୟର ମୁକାବିଲା ଏବଂ ଲୋକଙ୍କ ଜୀବନ ରକ୍ଷା କରିବା ପାଇଁ ତାଙ୍କର ଭୂମିକାକୁ ଜାତିସଂଘ ମଧ୍ୟ ପ୍ରଶଂସା କରିଛି । ନାସନାଲ ଜିଓଗ୍ରାଫି ଭଳି ଅନ୍ତର୍ଜାତୀୟ ଖ୍ୟାତି ସଂପନ୍ନ ଟିଭି ଚ୍ୟାନେଲରେ ଏ ନେଇ ସ୍ୱତନ୍ତ୍ର କାର୍ଯ୍ୟକ୍ରମ ପ୍ରସାରିତ ହୋଇଛି ।
ମହିଳା ସଂରକ୍ଷଣ ବିଲ୍ ସପକ୍ଷରେ ବଳିଷ୍ଠ ଯୁକ୍ତି ଓ ଆନ୍ତରିକ ଉଦ୍ୟମ ଯୋଗୁଁ ସାରା ଦେଶରେ ବେଶ ପ୍ରଶଂସିତ ହୋଇଛନ୍ତି ନବୀନ । ଏପରିକି ଗତ ସାଧାରଣ ନିର୍ବାଚନରେ ୨୧ଟି ଲୋକସଭା ଆସନରୁ ୭ଟି ରେ ମହିଳାଙ୍କୁ ଦଳୀୟ ପ୍ରାର୍ଥୀ କରି ନିଜ ଆଭିମୁଖ୍ୟ ସ୍ପଷ୍ଟ କରିଥିଲେ ନବୀନ । ସେହିପରି ଗାନ୍ଧୀଙ୍କ ଆଦର୍ଶ ଓ ଅହିଂସା ନୀତି ହିଁ ଦେଶର ବିକାଶକୁ ଆଗେଇ ନେବ ଏବଂ ଗରିବ ମୁହଁରେ ହସ ଫୁଟାଇବ ବୋଲି ଯୁକ୍ତି ବାଢ଼ିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଗାନ୍ଧୀଙ୍କ ଅହିଂସା ନୀତିକୁ ସମ୍ବିଧାନର ମୁଖବନ୍ଧରେ ସ୍ଥାନିତ କରିବାକୁ କେନ୍ଦ୍ର ସରକାରଙ୍କ ନିକଟରେ ଦାବି କରିଛନ୍ତି ନବୀନ ।
ଜଣେ ଦୂରଦୃଷ୍ଟି ସମ୍ପନ୍ନ ଏବଂ ଲୋକପ୍ରିୟ ରାଜନେତା ଭିତରେ ରହିଛି ଜଣେ ଲେଖକର ପ୍ରାଣ । କଲମ ଧରି ନୂଆ ସୃଜନ ସୃଷ୍ଟି କରିବାରେ ସେ ସିଦ୍ଧହସ୍ତ । ‘ଏ ସେକେଣ୍ଡ ପାରାଡାଇଜ’, ‘ଦି ଗାର୍ଡେନ ଅଫ ଲାଇଫ’, ‘ଡେଜର୍ଟ କିଙ୍ଗଡମ୍’ ହେଉଛି ତାଙ୍କର ଅନବଦ୍ୟ କୃତି । ଜଣେ ଲେଖକ ଭାବେ ତାଙ୍କର ଯେପରି ଖ୍ୟାତି ରହିଛି, ସେମିତି ସେ ଜଣେ ବିଦଗ୍ଧ ପାଠକ । କଳାସଂସ୍କୃତି, ଜୀବନଧାରା ଓ ଔଷଧୀୟ ଗୁଳ୍ମ ସଂପର୍କରେ ଗଭୀର ଅଧ୍ୟୟନ ରହିଛି ତାଙ୍କର ।