ବହିଷ୍କାର ପରେ ବିଷ ଓଗାଳିଲେ ଶ୍ରୀକାନ୍ତ । କହିଲେ, ନବୀନ ଓ ରାହୁଲଙ୍କ ଭିତରେ ହୋଇଛି ଗଠବନ୍ଧନ, କଂଗ୍ରେସକୁ ଚଳାଉଛନ୍ତି ଖଣି ମାଫିଆ ।
କନକ ବ୍ୟୁରୋ : ବରିଷ୍ଠ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନା ଏବଂ ପୂର୍ବତନ ବିଧାୟକ କୃଷ୍ଣ ସଗରିଆଙ୍କୁ କଂଗ୍ରେସ ଦଳରୁ ବହିଷ୍କାର କରିବା ପରେ ସରଗରମ ହୋଇଛି ରାଜନୀତି । ନିଜ ନାଁରୁ ଦଳୀୟ ବ୍ରାଣ୍ଡ ଚାଲିଯିବା ପରେ ଜଣେ ନେତାଙ୍କ ଯେଉଁ ଅବସ୍ଥା ହୁଏ, ବର୍ତମାନ ସେହି ସମାନ ଅବସ୍ଥା ଦେଇ ଗତି କରୁଛନ୍ତି ପୂର୍ବତନ କେନ୍ଦ୍ରମନ୍ତ୍ରୀ ତଥା କଂଗ୍ରେସରୁ ସଦ୍ୟ ବହିଷ୍କୃତ ହୋଇଥିବା ନେତା ଶ୍ରୀକାନ୍ତ ଜେନା । ନିଜ ଗୋଡ଼ରେ କୁରାଢ଼ି ମାରି ଦଳରୁ ବିଦା ହୋଇଥିବା ଶ୍ରୀକାନ୍ତ ଜେନା ଏବେ ତାଙ୍କୁ ଗଢ଼ିଥିବା ଦଳ ଉପରେ ଗଳା ଫଟାଇ ବର୍ଷିଛନ୍ତି । କଂଗ୍ରେସ ଖଣିମାଫିଆଙ୍କ ଦ୍ୱାରା ଚାଲିଛି ଏବଂ ରାହୁଲ ଗାନ୍ଧୀ ମଧ୍ୟ ମୁଣ୍ଡ ନୁଆଇଁ ଆତ୍ମସମର୍ପଣ କରିଛନ୍ତି ବୋଲି ଶ୍ରୀକାନ୍ତ ଅଭିଯୋଗ ଆଣିଛନ୍ତି । ଏପଟେ ପିସିସି ସଭାପତି ନିରଞ୍ଜନ ପଟ୍ଟନାୟକ କହିଛନ୍ତି- ଶ୍ରୀକାନ୍ତ ଜେନାଙ୍କ ମୁହଁରୁ ଏସବୁ କଥା ଶୋଭା ପାଏନି । ଲୋକ ବିଚାର କରିବେ କିଏ ଠିକ୍ କିଏ ଭୁଲ ।
Kanak News is now on WhatsApp
Join and get latest news updates delivered to you via WhatsApp
ଦଳ ବିରୋଧୀ କାର୍ଯ୍ୟ ପାଇଁ କଂଗ୍ରେସରୁ ବହିଷ୍କୃତ ହେବା ପରେ ବରିଷ୍ଠ ନେତା ଶ୍ରୀକାନ୍ତ ଜେନାଙ୍କ ରାଜନୈତିକ ଭବିଷ୍ୟତ ଅନ୍ଧାର ଭିତରକୁ ଠେଲି ହୋଇଯାଇଛି । ଯେଉଁ ଦଳ ଶ୍ରୀକାନ୍ତଙ୍କୁ କେନ୍ଦ୍ରରେ ମନ୍ତ୍ରୀ ହେବା ପାଇଁ ସୁଯୋଗ ଦେବା ସହ ତାଙ୍କର ରାଜନୈତିକ କ୍ୟାରିୟର ଗଠନରେ ମୁଖ୍ୟ ଭୂମିକା ନେଇଥିଲା, ସେହି ଦଳ ଭିତରେ ରହି ଅନ୍ତର୍ଘାତୀ କାର୍ଯ୍ୟ ଆରମ୍ଭ କରି ଦେଇଥିଲେ ଶ୍ରୀକାନ୍ତ । ଆଉ ଦଳ ଏହାକୁ ବରଦାସ୍ତ ନକରି ତାଙ୍କୁ ବହିଷ୍କାର କରିଦେଲା । ଆଉ ଏହି ଘଟଣା ଶ୍ରୀକାନ୍ତଙ୍କୁ ବିବ୍ରତ କରି ପକାଇଛି ।
ରାଜ୍ୟ ରାଜନୀତିରେ ସବୁଠୁ ଧୁର୍ତ ରାଜନେତା ଭାବେ ପରିଚିତ ଶ୍ରୀକାନ୍ତଙ୍କ ପାଦ ତଳୁ ମାଟି ଏପରି ଭାବେ ଖସିଯିବ, ତାହାକୁ ସେ ସହଜରେ ଗ୍ରହଣ କରିପାରୁନାହନ୍ତି । ଖଣି ମାଫିଆ, ନବୀନଙ୍କ ସହ ଅଘୋଷିତ ବୁଝାମଣା, ରାହୁଲ ଗାନ୍ଧୀଙ୍କ ଆତ୍ମ ସମର୍ପଣ ଓ ଓଡ଼ିଶାକୁ ପଟ୍ଟନାୟକ ପରିବାର ଲୁଣ୍ଠନ କରୁଥିବା – ଏସବୁ ଅଭିଯୋଗ ଆଣି ଲୋକଙ୍କ ପାଖକୁ ଯିବେ ବୋଲି କହିଛନ୍ତି ଶ୍ରୀକାନ୍ତ ।
୧୯୯୬ରେ ବିଜୁ ପଟ୍ଟନାୟକଙ୍କ ବିରୋଧରେ ଦିଲ୍ଲୀରେ ଅପପ୍ରଚାର କରି ଜଣେ ଓଡ଼ିଆ ନେତାଙ୍କୁ ପ୍ରଧାନମନ୍ତ୍ରୀ ହେବାରୁ ବଂଚିତ କରିବାକୁ ଉଦ୍ୟମ କରୁଥିବା ଭଳି ଅପବାଦ ରହିଛି ଶ୍ରାକାନ୍ତଙ୍କ ମୁଣ୍ଡରେ । ଓଡ଼ିଶା ରାଜନୀତିରେ ଚକ୍ରାନ୍ତ ଜେନା ଭାବେ ପରିଚିତ ଏହି ନେତାଙ୍କ ଭାଗ୍ୟ ଅନ୍ଧାର ଭିତରକୁ ଠେଲି ହୋଇଯିବା ପରେ ସେ ବିଳିବିଳେଇ ଉଠିଛନ୍ତି । ତେବେ ଏହାକୁ ।ନେଇ ନିରଂଜନ କହିଛନ୍ତି, କଂଗ୍ରେସରେ ନଥିବା ବେଳେ ସେ ଦଳ ବିରୋଧରେ ବିଭିନ୍ନ କଥା କହିଛନ୍ତି । ପରବର୍ତ୍ତୀ ସମୟରେ ଜ୍ଞାନ ଉଦୟ ହେବା ପରେ ପୁଣିଥରେ କଂଗ୍ରେସରେ ଯୋଗ ଦେଇଛନ୍ତି । ତେଣୁ ସେ ଦଳରୁ ବିଦା ହେବା ପରେ ଏଭଳି ହେବା ସ୍ୱାଭାବିକ ।ତେଣୁ ତାଙ୍କ ପ୍ରତିକ୍ରିୟାରେ ମୁଁ କାହିଁକି ପ୍ରତିକ୍ରିୟା ଦେବି ବୋଲି କହିଛନ୍ତି ନିରଞ୍ଜନ ।
ସବୁବେଳେ ଜାତି ରାଜନୀତିର ମଂଜି ବୁଣୁଥିବା ଶ୍ରୀକାନ୍ତ, ବହିଷ୍କାର ପରେ ପୁଣିଥରେ ପଟ୍ଟନାୟକ ପରିବାର ଉପରକୁ ଆଙ୍ଗୁଳି ଉଠାଇ ଓଡ଼ିଶା ରାଜନୀତିକୁ ପଟ୍ଟନାୟକ ମୁକ୍ତ କରିବାକୁ କହିଛନ୍ତି । ବିଜେଡି ଓ କଂଗ୍ରେସର ଗୁପ୍ତ ବୁଝାମଣା ଅଭିଯୋଗ ଉପରେ ବିଜେଡି କହିଛି ଶ୍ରୀକାନ୍ତଙ୍କ କଥାରେ ତାଳମେଳ ନାହିଁ । ୨୦୧୪ରେ କଂଗ୍ରେସ ଟିକେଟ୍ ବିକ୍ରି ଅଭିଯୋଗ ମଧ୍ୟ ଆସିଥିଲା ଶ୍ରୀକାନ୍ତଙ୍କ ବିରୋଧରେ । ଏବେ ଦଳରୁ ବିଦା ହେବା ପରେ ୨୦୧୯ ନିର୍ବାଚନରେ ତାଙ୍କ ପାଇଁ ପ୍ରାୟ ସବୁ ଦ୍ୱାର ବନ୍ଦ ହୋଇଯାଇଛି ।