କନକ ବ୍ୟୁରୋ : ହତ୍ୟା, ଆତଙ୍କବାଦ, ଦାରିଦ୍ରତା ଭଳି ପ୍ରସଙ୍ଗକୁ ନେଇ ପାକିସ୍ତାନ ବିଶ୍ୱ ଦରବାରରେ ସବୁବେଳେ ସମାଲୋଚିତ ହୋଇଛି । ଏହାରି ଭିତରେ ପୁଣି ଏକ ନୂଆ ମାମଲା ପାକିସ୍ତାନର ଛବିକୁ ବିଶ୍ୱ ଦରବାରରେ ନିନ୍ଦିତ କରିଛି । ଏକ ନିନ୍ଦା ଅଭିଯୋଗ ନେଇ ଜଣେ ଶ୍ରୀଲଙ୍କା ନାଗରିକଙ୍କୁ ପାକିସ୍ତାନରେ ହତ୍ୟା କରି ତାଙ୍କର ଶବକୁ ପୋଡିଦେବା ଘଟଣା ଏବେ ପାକିସ୍ତାନ ରାଜନୀତିକୁ ସରଗରମ କରିଛି । ଏହି ମାମଲାରେ ପାକ୍ ସରକାର ପାକିସ୍ତାନର ୮୦୦ ନାଗରିକଙ୍କ ଉପରେ ଆତଙ୍କବାଦ ମାମଲା ରୁଜୁ କରିଛନ୍ତି । କେବଳ ସେତିକି ନୁହେଁ ଏହି ମାମଲାରେ ସଂପୃକ୍ତ ଦର୍ଶାଇ ୧୧୮ ଜଣ ଲୋକଙ୍କୁ ବି ଗିରଫ କରିଛି ପାକ୍ ପୋଲିସ । ଏହି ମାମଲାରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ ଶ୍ରୀଲଙ୍କା ସରକାରଙ୍କୁ ଆଶ୍ୱସନା ଦେଭଇଛନ୍ତି କି ଦୋଷୀଙ୍କୁ କଠୋରେ ଦଣ୍ଡରେ ଦଣ୍ଡିତ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ଶୁକ୍ରବାର ଦିନ ଏକ ନିର୍ମମ ଘଟଣା କ୍ରମରେ କଟ୍ଟରପନ୍ଥୀ ଇସଲାମିକ ପାର୍ଟିର ସମର୍ଥକମାନେ ଜଣେ ଶ୍ରୀଲଙ୍କା ନାଗରିକ ପ୍ରିୟନ୍ତା କୁମାର ଦିୟାବଦାନାଙ୍କୁ ପିଟି ପିଟି ହତ୍ୟା କରିଥିଲେ । ଏହାପରେ ସେମାନେ ପ୍ରିୟନ୍ତାଙ୍କ ଶବକୁ ଲୋକ ଗହଳି ଭିତରେ ପୋଡି ଦେଇଥିଲେ । ଏକ ନିନ୍ଦା ଘଟଣାକୁ ନେଇ ପାକିସ୍ତାନର ପଞ୍ଜାବ ପ୍ରାନ୍ତରେ ଥିବା ଏକ କପଡା କାରଖାନାରେ ଆକ୍ରମଣ କରିଥିଲେ ଇସଲାମିକ ପାର୍ଟିର ସମର୍ଥକ ମାନେ । ଏହାପରେ ସେମାନେ ଏହି କପଡା ଦୋକାନର ମହାପ୍ରବନ୍ଧକ ପ୍ରିୟନ୍ତାଙ୍କୁ ପିଟି ପିଟି ହତ୍ୟା କରିଥିଲେ ।
ପୋଲିସର କହିବା ମୁତାବକ ପ୍ରିୟନ୍ତା କୁମାରା କଟ୍ଟରପନ୍ଥୀ ସଂଗଠନ ଟିଏଲପି ପାର୍ଟିର ଏକ ପୋଷ୍ଟରକୁ ଚିରି ଦେଇଥିଲେ । ଏହାପରେ କଟ୍ଟରପନ୍ଥୀମାନେ ପୁଣିଥରେ ସେହି କପଡା ଦୋକାନରେ ପାର୍ଟିର ପୋଷ୍ଟର ଲଗାଇଥିଲେ । ପୁଣିଥରେ ପ୍ରିୟନ୍ତା ଏହି ପୋଷ୍ଟରକୁ ସେଠାରୁ ଖୋଲିଦେବା ପରେ ଘଟଣା ପ୍ରଘଟ ହୋଇଥିଲା । ଏହାପରେ ଟିଏଲପିର ସମର୍ଥକମାନେ ସେଠାରେ ପହଂଚି ପ୍ରିୟନ୍ତାଙ୍କ ଉପରେ ଆକ୍ରମଣ କରିଥିଲେ । ତାଙ୍କୁ ଦୋକାନରୁ ବାହାରକୁ ନେଇ ପିଟି ପିଟି ହତ୍ୟା କରିଥିଲେ । ଏହାପରେ ପୋଲିସ ଘଟଣା ସ୍ଥଳରେ ପହଂଚିବା ପୂର୍ବରୁ ଟିଏଲପି ସମର୍ଥକମାନେ ପ୍ରିୟନ୍ତାଙ୍କ ଶବକୁ ପୋଡି ଦେଇଥିଲେ ।
କହିରଖୁ କି ପାକ୍ ପ୍ରଧାନମନ୍ତ୍ରୀ ଇମ୍ରାନ ଖାନ କିଛିଦିନ ପୂର୍ବରୁ ଟିଏଲପି ସଂଗଠନ ସହ ବୁଝାମଣା କରିଥିଲେ । ଏହାପରେ ଏହି କଟ୍ଟରପନ୍ଥୀ ସଂଗଠନ ଉପରେ ଲାଗିଥିବା ସମସ୍ତ ପ୍ରତିବନ୍ଧକ ହଟାଇ ଦିଆଯାଇଥିଲା । କେବଳ ସେତିକି ନୁହେଁ ପ୍ରଧାନମନ୍ତ୍ରୀଙ୍କ ସହ ବୁଝାମଣା ପରେ ଟିଏଲପି ସଂଗଠନର ମୁଖ୍ୟ ସା ରିଜବୀ ଓ ୧୫୦୦ରୁ ଅଧିକ କାର୍ଯ୍ୟକର୍ତ୍ତାଙ୍କୁ ଜେଲରୁ ବାହାର କରାଯାଇଥିଲା ।