ବିଶ୍ୱ ବକ୍ସ ଅଫିସରେ ସ୍ପାଇଡର୍-ମ୍ୟାନ୍ର ରେକର୍ଡ : ୨୦୧୯ ପରେ ପ୍ରଥମ ଥର ୧୦୦ କୋଟି ଡଲାର୍ ଆୟ !
କନକ ବ୍ୟୁରୋ : ମାତ୍ର ୧୧ ଦିନ ତଳେ ସାରା ବିଶ୍ୱରେ ବଡ଼ପରଦାରେ ମୁକ୍ତିଲାଭ କରିଥିବା ‘ସ୍ପାଇଡର୍-ମ୍ୟାନ୍: ନୋ ୱେ ହୋମ୍’ ୨୦୨୧ ମସିହାର ସର୍ବାଧିକ ଆୟକାରୀ ଚଳଚ୍ଚିତ୍ରର ମାନ୍ୟତା ହାସଲ କରିଛି । ଶେଷ ଥର ୨୦୧୯ରେ ମୁକ୍ତିଲାଭ କରିଥିବା ‘ଷ୍ଟାର୍ ଵାର୍ସ: ଦି ରାଇଜ୍ ଅଫ୍ ସ୍କାଇଓ୍ୱାକର୍’ ୧୦୦ କୋଟି ଡଲାର୍ ଆୟର ମାଇଲ୍ଖୁଣ୍ଟ ଅତିକ୍ରମ କରିଥିଲା । ଏହା ପରେ ମହାମାରୀ ଆରମ୍ଭ ହୋଇଯିବାରୁ ସିନେମା ପ୍ରେକ୍ଷାଳୟ ବ୍ୟବସାୟ ଏକପ୍ରକାର ଠପ୍ ହୋଇଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଇତିମଧ୍ୟରେ ଇଣ୍ଟରନେଟ୍ରେ ଓଟିଟି ମଞ୍ଚର ବିପୁଳ ପ୍ରସାରଲାଭ ଏକପ୍ରକାର ଆଶଙ୍କା ସୃଷ୍ଟି କରିଥିଲା ଯେ ଦର୍ଶକ ଅଭାବରୁ ପ୍ରେକ୍ଷାଳୟଗୁଡ଼ିକ ସବୁଦିନ ପାଇଁ ବନ୍ଦ ହୋଇଯିବ । ତେବେ ‘ସ୍ପାଇଡର୍-ମ୍ୟାନ୍..’ ଏହି ଆଶଙ୍କାକୁ ଭୁଲ୍ ପ୍ରମାଣିତ କରିଛି । ଭାରତୀୟ ପ୍ରେକ୍ଷାଳୟରେ ଏହା ପାଖାପାଖି ୧୭୫ କୋଟି ଟଙ୍କା ଆୟ କରିସାରିଲାଣି । ଏଥିରେ ଟମ୍ ହଲାଣ୍ଡ୍ ସ୍ପାଇଡର୍-ମ୍ୟାନ୍ର ଭୂମିକାରେ ଅବତୀର୍ଣ୍ଣ ହୋଇଥିବା ବେଳେ ଅଭିନେତ୍ରୀ ଜେଣ୍ଡେୟା ତାଙ୍କ ବାନ୍ଧବୀ ଭାବେ ଅଭିନୟ କରିଛନ୍ତି । ଡକ୍ଟର୍ ଷ୍ଟ୍ରେଞ୍ଜ୍ଙ୍କ ସମେତ ପୁରୁଣା ସ୍ପାଇଡର୍-ମ୍ୟାନ୍ ଚଳଚ୍ଚିତ୍ରର ନାୟକ ଓ ଖଳନାୟକମାନେ ଅନ୍ୟତମ ଆକର୍ଷଣୀୟ ଭୂମିକାରେ ବାହାରି ଦର୍ଶକଙ୍କୁ ଚମତ୍କୃତ କରୁଛନ୍ତି ।