ଭାରତ-ଦକ୍ଷିଣ ଆଫ୍ରିକା ମଧ୍ୟରେ ଆଜି ତୃତୀୟ ଦିନିକିଆ : କେପଟାଉନରେ ଖେଳାଯିବ ମ୍ୟାଚ୍; ସମ୍ମାନ ରକ୍ଷା ପାଇଁ ଉଦ୍ୟମ କରିବ ଟିମ ଇଣ୍ଡିଆ
କନକ ବ୍ୟୁରୋ : ଭାରତ-ଦକ୍ଷିଣ ଆଫ୍ରିକା ମଧ୍ୟରେ ଆଜି ଖେଳାଯିବ ତୃତୀୟ ଦିନିକିଆ । କେପଟାଉନରେ ଖେଳାଯିବ ଏହି ମୁକାବିଲା । ୨-୦ରେ ସିରିଜ ଆଗୁଆ ଥିବା ଦକ୍ଷିଣ ଆଫ୍ରିକା ଆଜି ସିରିଜ ମୂଳପୋଛ ଲକ୍ଷ୍ୟରେ ପଡିଆକୁ ଓହ୍ଲାଇବ । ସେପଟେ ଦକ୍ଷିଣଆଫ୍ରିକା ବିପକ୍ଷରେ କ୍ରମାଗତ ୪ଟି ପରାଜୟ ପରେ ଚାପରେ ରହିଛି ଭାରତୀୟ ଦଳ ।
Kanak News is now on WhatsApp
Join and get latest news updates delivered to you via WhatsApp
କ୍ୟାପଟେନ କେ ଏଲ ରାହୁଲଙ୍କ ନେତୃତ୍ୱରେ ବିଦେଶ ମାଟିରେ ଭାରତୀୟ ଦଳ ପୁରା ଚମକ ହରାଇବା ପରି ମନେ ହେଉଛି । ଟେଷ୍ଟ ସିରିଜ ପରାଜୟ ପରେ ଦିନିକିଆ ସିରିଜରେ ଏହାର ପ୍ରତିଶୋଧ ନେବ ବୋଲି ଭାରତୀୟ ଦଳ ଉପରେ ଭରସା ରଖିଥିଲେ କ୍ରିକେଟ ଫ୍ୟାନ । ସେହି ଆଶା ଧୂଳିସାତ ହୋଇଯାଇଛି । ଦଳର ମଧ୍ୟକ୍ରମ ବ୍ୟାଟିଂ ଏବଂ ପ୍ରଭାବହୀନ ବୋଲିଂ ଚିନ୍ତାର କାରଣ ହୋଇଛି । ଭାରତ ସିରିଜ ହାରି ସାରିଥିବାରୁ ଏହି ତୃତୀୟ ଦିନିକିଆରେ କିଛି ବରିଷ୍ଠ ଖେଳାଳିଙ୍କୁ ବିଶ୍ରାମ ଦେଇପାରେ ଭାରତ ।
ବୁମରା କିଂବା ଶାର୍ଧୁଳ ଠାକୁରଙ୍କ ମଧ୍ୟରୁ ଜଣଙ୍କୁ ବିଶ୍ରାମ ମିଳିପାରେ । ତାଙ୍କ ସ୍ଥାନରେ ଦୀପକ ଚହରଙ୍କୁ ଦଳରେ ସ୍ଥାନ ମିଳିବା ସଂଭାବନା ରହିଛି । ସେହିପରି ଶୀର୍ଷ ବ୍ୟାଟିଂକ୍ରମରେ ଋତୁରାଜ ଗାଏକ୍ୱାଡଙ୍କୁ ମଧ୍ୟ ଦଳରେ ସ୍ଥାନ ମିଳିବା ସଂଭାବନା ରହିଛି । ଏପରି ସ୍ଥିତିରେ କ୍ୟାପଟେନ କେଏଲ ରାହୁଲଙ୍କ ନେତୃତ୍ୱରେ ଭାରତୀୟ ଦଳ ଆଜି କେପଟାଉନରେ ସମ୍ମାନ ରକ୍ଷା ଉଦ୍ଦେଶ୍ୟରେ ଖେଳିବାକୁ ପଡିଆକୁ ଓହ୍ଲାଇବ ।