କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀଙ୍କ ‘ରାଷ୍ଟ୍ରପତ୍ନୀ’ ବୟାନକୁ ଜୋରଦାର ବିରୋଧ । ମୁହାଁମୁହିଁ ହେଲେ ସୋନିଆ ଓ ସ୍ମୃତି ଇରାନୀ ।
କନକ ବ୍ୟୁରୋ: ଲୋକସଭାର ବିରୋଧୀ ଦଳ ନେତା ଅଧୀର ରଞ୍ଜନ ଚୌଧୁରୀଙ୍କ ଏକ ବୟାନକୁ ନେଇ ସଂସଦରେ ଉଠିଲା ଝଡ । ଲୋକସଭାରେ କଂଗ୍ରେସ ନେତାଙ୍କ ଆଚରଣକୁ ନେଇ ବର୍ଷିଛନ୍ତି କେନ୍ଦ୍ରମନ୍ତ୍ରୀ ସ୍ମୃତି ଇରାନୀ । ସଂସଦ ବାହାରେ ମଧ୍ୟ ପ୍ଲାକାର୍ଡ ଧରି କଂଗ୍ରେସ ନେତାଙ୍କୁ ଘେରିଛନ୍ତି କେନ୍ଦ୍ରମନ୍ତ୍ରୀ ନିର୍ମଳା ସୀତାରମଣ । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ରାଷ୍ଟ୍ରପତ୍ନୀ କହି ସମ୍ବୋଧନ କରିଥିଲେ କଂଗ୍ରେସ ନେତା ଅଧିର ରଞ୍ଜନ ।
Kanak News is now on WhatsApp
Join and get latest news updates delivered to you via WhatsApp
ସୋନିଆ ଗାନ୍ଧୀଙ୍କୁ ନ୍ୟାସନାଲ ହେରାଲ୍ଡ ମାମଲାରେ ଇଡି ଜେରା କରିବା ବେଳେ କଂଗ୍ରେସ ସାଂସଦ ଅଧୀର ରଞ୍ଜନ ଚୌଧୁରୀଙ୍କ ଏହି ପ୍ରତିକ୍ରିୟା ରଖଥିଲେ । ତେବେ ଏହା ଭୁଲବଶତଃ ଥିଲା ନା ଜାଣିଶୁଣି ସେ କହିଥିଲେ ତାକୁ ନେଇ ବିବାଦ ବଢିଛି ।
ଆଜି ସଂସଦ ଭିତରେ ଏବଂ ବାହାରେ ଦୁଇଟି ଚିତ୍ର ଦେଖିବାକୁ ମିଳିଥିଲା । ଗୋଟିଏ ପଟେ ଲୋକସଭାରେ କେନ୍ଦ୍ରମନ୍ତ୍ରୀ ସ୍ମୃତି ଇରାନୀ କଂଗ୍ରେସ ନେତାଙ୍କ ଆଚରଣକୁ ନେଇ ବର୍ଷିଛନ୍ତି । ଅନ୍ୟପଟେ ପ୍ଲାକାର୍ଡ ଧରି କେନ୍ଦ୍ରମନ୍ତ୍ରୀ ନିର୍ମଳା ସୀତାରମଣ ଏବଂ କିଛି ସାଂସଦ କଂଗ୍ରେସ ନେତାଙ୍କୁ ଘେରିଛନ୍ତି । ଅଧୀରଙ୍କ ବୟାନ ଦେଶର ସର୍ବୋଚ୍ଚ ପଦବୀରେ ବସିଥିବା ବ୍ୟକ୍ତିଙ୍କୁ ଅପମାନ । ଏପରି ଅଶୋଭନୀୟ ବୟାନକୁ ଦେଶ କେବେ ସହିବ ନାହିଁ ବୋଲି ବିଜେପିି କହିଛି । କଂଗ୍ରେସ ନେତା ଯାହା କହିଛନ୍ତି ସେଥିପାଇଁ ଦଳର ଅଧ୍ୟକ୍ଷା ସୋନିଆ ଗାନ୍ଧୀ କ୍ଷମା ମାଗନ୍ତୁ ବୋଲି ଦାବି ହୋଇଛି ।
- ବିବାଦ ପରେ ଅଧୀର ରଞ୍ଜନଙ୍କ ସଫେଇ
- ‘ରାଷ୍ଟ୍ରପତିକୁ ରାଷ୍ଟ୍ରପତ୍ନୀ ଭୁଲରେ ବାହାରିଯାଇଛି’
- ‘ମୂଳ ପ୍ରସଙ୍ଗରୁ ଧ୍ୟାନ ହଟାଇବାକୁ ଚାଲ କରୁଛି ବିଜେପି’
କେନ୍ଦ୍ରମନ୍ତ୍ରୀ ସ୍ମୃତି ଇରାନୀ ଏହାକୁ ନେଇ ସଂସଦରେ ଘେରିବା ପରେ କଂଗ୍ରେସ ମଧ୍ୟ ଜବାବ ରଖଛି । ଅଧୀର କହିଛନ୍ତି, ଭୁଲରେ ତାଙ୍କ ପାଟିରୁ ବାହାରି ଯାଇଛି । ସେ ବିଜେପିକୁ କ୍ଷମା ମାଗିବାର ପ୍ରଶ୍ନ ଉଠୁନି । ଅଗ୍ନିପଥ ଯୋଜନା, ବେରୋଜଗାରୀ, ଜିଏସଟି ଏବଂ ଅନ୍ୟ ସମସ୍ୟା ଉପରୁ ଧ୍ୟାନ ହଟାଇବାକୁ ବିଜେପି ଏହାକୁ ଅଯଥାରେ ବଢାଉଛି । ରାଷ୍ଟପତି ବ୍ରାହ୍ମଣ ହୁଅନ୍ତୁ କି ଆଦିବାସୀ ତାଙ୍କ ପ୍ରତି ସମ୍ମାନ ରହିଛି ବୋଲି ସେ କହିଛନ୍ତି । ସେପଟେ ସ୍ମୃତି ଇରାନୀ ଏହାକୁ ନେଇ ସୋନିଆ ଗାନ୍ଧୀଙ୍କୁ ଟାର୍ଗେଟ କରିବା ପରେ ବିବାଦ ଆହୁରି ତେଜିଛି । ଆଉ ତାଙ୍କ ସହ କଥା ନ ହେବାକୁ ସ୍ମୃତି ଇରାନୀଙ୍କୁ ସୋନିଆ କହିଛନ୍ତି ।
ଅନ୍ୟପଟେ ବିଧାନସଭାରେ ଏ ପ୍ରସଙ୍ଗରେ ଗୃହର ମଧ୍ୟଭାଗରେ ପ୍ଲାକାର୍ଡ ଧରି ବିଜେପି ବିଧାୟକ ଜୋରଦାର ହଙ୍ଗାମା କରିଥିଲେ । ବିଜେପିର ହଟ୍ଟଗୋଳ ପାଇଁ ଅପରାହ୍ନ ୪ଟା ଯାଏଁ ଗୃହ ମୁଲତବି ଘୋଷଣା କରିଥିଲେ ବାଚସ୍ପତି ।