କନକ ବ୍ୟୁରୋ : ପୃଥିବୀ ପୃଷ୍ଠକୁ ଖୁବ ଦ୍ରୁତ ଗତିରେ ଏକ ସୌରଝଡ ମାଡି ଆସୁଛି । ଘଂଟା ପ୍ରତି ଏହା ପ୍ରାୟ ୧୬ ଲକ୍ଷ କିଲୋମିଟର ଗତିରେ ଅଗ୍ରସର ହେଉଛି । ଆମେରିକା ମହାକାଶ ଗବେଷଣା ସଂସ୍ଥା- ନାସାର ସୂଚନା ଅନୁସାରେ ଏହା ଆଜି କିମ୍ବା ଆସନ୍ତାକାଲି ପୃଥିବୀର ଚୁମ୍ବକୀୟ କ୍ଷେତ୍ର ମଧ୍ୟରେ ପ୍ରବେଶ କରିବା ସମ୍ଭାବନା ରହିଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ପୃଥିଥୀର ଚୁମ୍ବକୀୟ କ୍ଷେତ୍ର ମଧ୍ୟକୁ ପ୍ରବେଶ କଲେ ଏହାର ପ୍ରଭାବ କଣ ରହିବ, ସେନେଇ ସୂଚନା ଦେଇଛନ୍ତି ପଠାଣି ସାମନ୍ତ ପ୍ଲାନେଟାରିୟମର ନିର୍ଦ୍ଦେଶକ ଶୁଭେନ୍ଦୁ ପଟ୍ଟନାୟକ । ତାଙ୍କ କହିବା ହେଲା ସୂର୍ଯ୍ୟରେ ଅନବରତ ଏକ ଆଣବିକ ପ୍ରକ୍ରିୟା ଜାରି ରହିଛି । ତେଣୁ ପ୍ରଚୁର ଶକ୍ତି ଉତ୍ପନ ହେଉଛି । ସେହିପରି ବେଳେବେଳେ ଏଠାରେ ବିସ୍ଫୋରଣ ଘଟି କଣିକାଗୁଡିକ ବିକରଣ ହୋଇଥାଏ । ବର୍ତ୍ତମାନ ଏହିଭଳି ଏକ ବିସ୍ଫୋରଣ ଫଳରେ, ଏକ ଇଲେକଟ୍ରୋ ମ୍ୟାଗନେଟିକ ୱେଭ ବା ବିଦ୍ୟୁତ ଚୁମ୍ବକୀୟ ତରଙ୍ଗ ପୃଥିବୀ ଆଡକୁ ମାଡିଆସୁଛି । ତେଣୁ ଏହା ପୃଥିବୀର ଚୁମ୍ବକୀୟ କ୍ଷେତ୍ର ମଧ୍ୟକୁ ପ୍ରବେଶ କଲେ ଚୁମ୍ବକୀୟ ଶକ୍ତି ଦ୍ୱାରା ପରିଚାଳିତ ଉପକରଣଗୁଡିକ ଉପରେ ପ୍ରଭାବ ପକାଇବ ।
ତେଣୁ ବିଦ୍ୟୁତ ସରବରାହ, ମୋବାଇଲ ଫୋନ ସେବା କିମ୍ବା ଜିପିଏସ ସିଷ୍ଟମ ଉପରେ ଏହାର ସାମାନ୍ୟ ପ୍ରଭାବ ରହିପାରେ । ସ୍ପେସ ଷ୍ଟେସନ ଓ ଉପଗ୍ରହଗୁଡିକ ଉପରେ ମଧ୍ୟ ପ୍ରଭାବ ପକାଇପାରେ । କିନ୍ତୁ ମଣିଷ ଓ ଜୀବଜନ୍ତୁଙ୍କ ଉପରେ ଏହାର କୌଣସି ପ୍ରଭାବ ପଡିବ ନାହିଁ ବୋଲି ସହିଛନ୍ତି ସୁଭେନ୍ଦୁ ପଟ୍ଟନାୟକ । ୧୯୯୨ ମସିହାରେ ଏହିଭଳି ଏକ ବିଦ୍ୟୁତ ଚୁମ୍ବକୀୟ ତରଙ୍ଗ ଆସିବା ଫଳରେ କାନାଡାରେ ୧୨ ଘଂଟା ପାଇଁ ବିଦୁତ ସରବରାହ ବନ୍ଦ ହୋଇଯାଇଥିଲା । କିନ୍ତୁ ଏଥର ବିସ୍ଫୋରଣ ସେତେ ବଡ ନୁହେଁ, ତେଣୁ ଏହାର ପ୍ରଭାବ କମ ରହିବ ବୋଲି ସେ ଆକଳନ କରିଛନ୍ତି ।