ରାଞ୍ଚି ବିମାନବନ୍ଦରରେ ଓୱେସିଙ୍କୁ କରାଗଲା ସ୍ୱାଗତ । ଭିଡ ଭିତରେ ପଡିଲା, ପାକିସ୍ତାନ ଜିନ୍ଦାବାଦ ନାରା ।
କନକ ବ୍ୟୁରୋ : ଏଆଇଏମଆଇଏମ ମୁଖ୍ୟ ଅସଦୁଦ୍ଦିନ ଓୱେସିଙ୍କୁ ରାଞ୍ଚି ବିମାନବନ୍ଦରରେ ସ୍ୱାଗତ କଲା ବେଳେ ଶୁଭିଲା ପାକିସ୍ତାନ ଜିନ୍ଦାବାନ୍ଦ ନାରା । ମାଣ୍ଡର ବିଧାନସଭା ଆସନରେ ଉପ-ନିର୍ବାଚନରେ ପ୍ରଚାର ପାଇଁ ଝାଡଖଣ୍ଡରେ ପହଞ୍ଚିଥିଲେ ଅସଦୁଦ୍ଦିନ । ଦଳର ବିଧାୟକ ପ୍ରାର୍ଥୀ ଦେବ କୁମାର ଧାନଙ୍କ ପାଇଁ ପ୍ରଚାର ମୈଦାନକୁ ଓହ୍ଲାଇଥିଲେ ଅସଦୁଦ୍ଦିନ ।
Kanak News is now on WhatsApp
Join and get latest news updates delivered to you via WhatsApp
ପ୍ରଚାର ମୈଦାନକୁ ଓହ୍ଲାଇବା ପୂର୍ବରୁ ଝାଡଖଣ୍ଡ ବିମାନବନ୍ଦରରେ ଅସଦୁଦ୍ଦିନଙ୍କୁ ଦଳୀୟ କାର୍ଯ୍ୟକର୍ତ୍ତା ସ୍ୱାଗତ କରିବା ସହ ପାଛୋଟି ନେଇଥିଲେ । ଏହି ସମୟରେ ପ୍ରଂଶସକ ମାନେ ଅସଦୁଦ୍ଦିନ ଜିନ୍ଦାବାଦ ନାରା ପକାଉଥିଲେ । ଆଉ ଏହା ଭିତରେ କିଛି ବ୍ୟକ୍ତି ପାକିସ୍ତାନ ଜିନ୍ଦାବାଦ ନାରା ପକାଉଥିବାର ଦେଖିବାକୁ ମିଳିଥିଲା । ତେବେ ପାକିସ୍ତାନ ଜିନ୍ଦାବାଦ ନାରା କିଏ ଓ କାହିଁକି ପକାଇଲା ସେ ବାବଦରେ କୌଣସି ସ୍ପଷ୍ଟ ସୂଚନା ମିଳିପାରିନାହିଁ । ତେବେ ଏଭଳି ନାରା ପଡିବା ପରେ ଅସଦୁଦ୍ଦିନଙ୍କ ପ୍ରଚାରକୁ ନେଇ ବିବାଦ ଆରମ୍ଭ ହୋଇଛି ।
ଏଭଳି ଘଟଣା ପରେ ରାଞ୍ଚିର ପୋଲିସ ଅଧିକାରୀ କହିଛନ୍ତି, ଅସଦୁଦ୍ଦିନ ଆସିବା ସମୟର ଭିଡ଼ିଓ ଓ ଅଡିଓର ଯାଞ୍ଚ ଚାଲିଛି । ପ୍ରମାଣ ମିଳିବା ପରେ କାର୍ଯ୍ୟାନୁଷ୍ଠାନ ନିଆଯିବ । ତେବେ ଏହା ପ୍ରଥମଥର ନୁହେଁ ଯେତେବେଳେ ଅସଦୁଦ୍ଦିନଙ୍କ କୌଣସି କାର୍ଯ୍ୟକ୍ରମରେ ପାକିସ୍ତାନ ଜିନ୍ଦାବାଦର ନାରା ପଡିଛି । ଏହାପୂର୍ବରୁ ସିଏଏକୁ ନେଇ ବିରୋଧ ପ୍ରଦର୍ଶନ ବେଳେ ମଧ୍ୟ ଓୱେସିଙ୍କ ମଞ୍ଚରେ ଜଣେ ଯୁବତୀ ଏଭଳି ନାରା ଦେଇଥିଲେ । ଯେଉଁଥିରୁ ପରବର୍ତ୍ତୀ ସମୟରେ ନିଜକୁ ଦୂରେଇ ରଖିଥିଲେ ଓୱେସି ।