ସିନ୍ଦେଙ୍କୁ ଉପ-ମୁଖ୍ୟମନ୍ତ୍ରୀ ସହ ୧୩ ମନ୍ତ୍ରୀ! ବିଜେପି ସହ ଏହି ଫର୍ମୁଲାରେ ସରକାର ଗଢିବେ କି ଏକନାଥ ସିନ୍ଦେ?
କନକ ବ୍ୟୁରୋ : ମହାରାଷ୍ଟ୍ର ରାଜନୀତିରେ ଏବେ ମହାସଙ୍କଟ । ବିଦ୍ରୋହୀ ଏକନାଥ ସିନ୍ଦେ ଗୋଷ୍ଠୀ ସମର୍ଥନ ପ୍ରତ୍ୟାହାର କରିବା ପରେ ଏବେ ଉଦ୍ଧବ ସରକାର ଅଳ୍ପମତକୁ ଚାଲି ଆସିଛି । ଆଉ ଏସବୁ ଭିତରେ ଏବେ ଫ୍ଲୋର ଟେଷ୍ଟକୁ ସମସ୍ତଙ୍କର ଅପେକ୍ଷା ରହିଛି । ତେବେ ଫ୍ଲୋର ଟେଷ୍ଟ ପାଇଁ କିଏ ରାଜ୍ୟପାଳଙ୍କୁ କହିବ ତାହା ଉପରେ ନଜର ରହିଛି । କିନ୍ତୁ ଅନ୍ୟପଟେ ଉଦ୍ଧବ ସରକାରରୁ ସମର୍ଥନ ପ୍ରତ୍ୟାହାର ପରେ ନୂଆ ସରକାର ଗଠନ ଦିଗରେ ସିନ୍ଦେଙ୍କ ଗୋଷ୍ଠୀ ପାଦ ବଢାଉଥିବା ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମରେ ହେଉଥିବା ଚର୍ଚ୍ଚା ଅନୁଯାୟୀ, ନୂଆ ସରକାର ଗଠନ ପାଇଁ ସିନ୍ଦେ ବିଜେପି କ୍ୟାମ୍ପ ସହ ଯୋଗାଯୋଗରେ ଥିବା କୁହାଯାଉଛି । ଉଭୟ ପକ୍ଷ ମଧ୍ୟରେ ଆଲୋଚନା ଚାଲିଥିବା ନେଇ ଖବର ସାମ୍ନାକୁ ଆସୁଛି । ଏପରିକି ଦିଲ୍ଲୀରେ ଉଭୟ ପକ୍ଷ ମଧ୍ୟରେ ଆଲୋଚନା ପରେ ଶେଷ ନିଷ୍ପତ୍ତି ନିଆଯିବ ବୋଲି ଚର୍ଚ୍ଚା ହେଉଛି । ନୂଆ ସରକାରରେ ଏକନାଥ ସିନ୍ଦେଙ୍କୁ ଉପ-ମୁଖ୍ୟମନ୍ତ୍ରୀ କରାଯାଇପାରେ ବୋଲି ଚର୍ଚ୍ଚା ଆରମ୍ଭ ହୋଇଛି । କେବଳ ଏତିକି ନୁହେଁ ନୂଆ ସରକାରରେ ଏକନାଥ ସିନ୍ଦେଙ୍କ ଗୋଷ୍ଠୀକୁ ୮ କ୍ୟାବିନେଟ ଓ ୫ ରାଷ୍ଟ୍ରମନ୍ତ୍ରୀ ମିଳିପାରେ ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି । ସେହିଭଳି ବିଜେପି ନିଜ କୋଟାରୁ ୨୯ ଜଣଙ୍କୁ ମନ୍ତ୍ରୀ କରିପାରେ । ଏପରିକି ସ୍ୱାଧୀନ ବିଧାୟକଙ୍କୁ ମଧ୍ୟ ବିଜେପି ନିଜ କୋଟାରୁ ମନ୍ତ୍ରୀ କରୁ ବୋଲି ଏକନାଥ ସିନ୍ଦେଙ୍କ ଗୋଷ୍ଠୀ ଦାବି କରିପାରନ୍ତି ।
ଏହାବ୍ୟତୀତ ନୂଆ ସରକାରରେ ପୁରୁଣା ମନ୍ତ୍ରାଳୟ ରଖିବାକୁ ଏକନାଥ ସିନ୍ଦେ ଗୋଷ୍ଠୀ ଚାହୁଁଥିବା ନେଇ ଚର୍ଚ୍ଚା ହେଉଛି । କାରଣ ଗତ ମାସକ ମଧ୍ୟରେ ନିଆଯାଇଥିବା ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଉପରେ ଉଦ୍ଧବ ଠାକରେ ରୋକ ଲଗାଇଛନ୍ତି ଏହାସହ ବିଦ୍ରୋହୀ ମନ୍ତ୍ରୀଙ୍କ ଠାରୁ ବିଭାଗ ଛଡାଇ ଆଣି ଅନ୍ୟ ମାନଙ୍କୁ ଦିଆଯାଇଛି । ଏସବୁ ଭିତରେ ଉଦ୍ଧବ ଠାକରେଙ୍କୁ ବଡ ଝଟକା ଦେଇପାରନ୍ତି ଦଳର ସାଂସଦ । କାରଣ ଦଳର ୧୮ ସାଂସଦଙ୍କ ମଧ୍ୟରୁ ୧୪ ଜଣ ସାଂସଦ ଏକନାଥ ସିନ୍ଦେଙ୍କ ସହ ସମ୍ପର୍କରେ ଥିବା କୁହାଯାଉଛି । ଆଉ ଯଦି ଏପରି ହୁଏ ତେବେ ଶିବସେନାରେ ଏକନାଥ ରାଜ ଆରମ୍ଭ ହେବ ।