ସୁରକ୍ଷା ଦୁର୍ବଳ ନା ଷଡଯନ୍ତ୍ର, ଅଧରାତିରେ ମମତାଙ୍କ ବାସଭବନରୁ ଗିରଫ ହେଲେ ଅଜଣା ବ୍ୟକ୍ତି
କନକ ବ୍ୟୁରୋ : ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ କାଳୀଘାଟ ବାସଭବନରୁ ଗତ ରାତିରେ ଜଣେ ଅଜଣା ବ୍ୟକ୍ତିଙ୍କୁ ଗିରଫ କରାଯାଇଛି । କୁହାଯାଉଛି କି ସୁରକ୍ଷା କବଚ ଭେଦ କରି ବ୍ୟକ୍ତିଜଣଙ୍କ କବାଟ ବନ୍ଧ ଫାଙ୍କରେ ମମତାଙ୍କ ବାସଭବନରେ ପ୍ରବେଶ କରିଥିଲେ । ସୁରକ୍ଷା ଅଧିକାରୀଙ୍କ କହିବା ମୁତାବକ ବ୍ୟକ୍ତି ଜଣଙ୍କ ସାରା ରାତି ମମତାଙ୍କ ବାସଭବନ ଭିତରେ ରହିଥିଲେ । ଏକଥା ଜାଣିବା ପରେ ସେହି ରାତିରେ ପୋଲିସ କର୍ମୀ ସଂପୃକ୍ତ ବ୍ୟକ୍ତି ଜଣଙ୍କୁ ଗିରଫ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀ ମମତା ବାର୍ନାର୍ଜୀଙ୍କ ବାସଭବନରେ ଅଜଣା ବ୍ୟକ୍ତି ଅନୁପ୍ରବେଶ କରିଥିବା ନେଇ ସୂଚନା ପାଇବା ପରେ ବରିଷ୍ଠ ପୋଲିସ ଅଧିକାରୀମାନେ ସେଠାରେ ପହଂଚିଥିଲେ । ଅଧିକାରୀଙ୍କ କହିବା କଥା କି ସଂପୃକ୍ତ ବ୍ୟକ୍ତିଙ୍କୁ ଗିରଫ କରାଯାଇ ଏବେ ଯାଂଚ କରାଯାଉଛି ।
ପୋଲିସ ଅଧିକାରୀମାନେ ଯାଂଚ ବେଳେ ଏହି କଥାକୁ ପ୍ରାଥମିକତା ଦେଉଛନ୍ତି କି ଜେଡ ବର୍ଗର ସୁରକ୍ଷା ଭେଦ କରି କିଭଳି ଭାବେ ଏହି ଅଜଣା ବ୍ୟକ୍ତି ମୁଖ୍ୟମନ୍ତ୍ରୀଙ୍କ ବାସଭବନରେ ପ୍ରବେଶ କଲେ । ଏହାସହ ବ୍ୟକ୍ତି ଜଣଙ୍କ ଅପରାଧୀ, ଚୋର କିମ୍ବା ମାନସିକ ବିକୃତ ଶ୍ରେଣୀର ବୋଲି କିଛି ସ୍ପଷ୍ଟ ହୋଇନାହିଁ । ଏହାସହ ପୋଲିସ ଅନ୍ୟକିଛି ଦୃଷ୍ଟିକୋଣ ଆଧାରରେ ଏହାର ଯାଂଚ ଆରମ୍ଭ କରିଛି ।
କହିରଖୁ କି ଗତମାସ ବି ମୁଖ୍ୟମନ୍ତ୍ରୀଙ୍କ ବାସଭବନ ନିକଟରେ ଏକ ହତ୍ୟାକାଣ୍ଡ ଘଟିଥିଲା । ଏହାପରେ ମୁଖ୍ୟମନ୍ତ୍ରୀଙ୍କ ସୁରକ୍ଷାକୁ ନେଇ ପ୍ରଶ୍ନ ଉଠିଥିଲା । ଏହି ଘଟଣାରେ ବ୍ୟବସାୟୀ ଅଶୋକ ଶାହାଙ୍କୁ କିଛିଲୋକ ଛୁରୀମାରି ହତ୍ୟା କରିଥିଲେ ଓ ତାଙ୍କ ପତ୍ନୀ ରଶ୍ମୀତା ଶାହାଙ୍କୁ ଗୁଳିକରି ହତ୍ୟା କରାଯାଇଥିଲା । ହେଲେ ସବୁଠାରୁ ବଡକଥା କି ଏହି ୨ ଟି ହତ୍ୟାକାଣ୍ଡ ମୁଖ୍ୟମନ୍ତ୍ରୀଙ୍କ ବାସଭବନ ନିକଟରେ ଘଟିଥିଲେ ବି ସେତେବେଳେ ସେଠିକାର ସିସିଟିଭି ଖରାପ ଥିଲା ।