୫-ଟି ସଚିବ ଭି.କେ ପାଣ୍ଡିଆନଙ୍କ ନିଆରା ଦୀପାବଳି ପାଳନ । ସ୍ପୋଟର୍ସ ହଷ୍ଟେଲ ଅନ୍ତେବାସୀଙ୍କ ସହ ଦୀପାବଳି ପାଳିଲେ, ମିଠା ବାଣ୍ଟିବା ସହ ଭଲମନ୍ଦ ପଚାରି ବୁଝିଲେ । ଫେରିବା ବେଳେ ସାଥୀରେ ବସି ଖାଇବାକୁ ଭୁଲିଲେନି ।
କନକ ବ୍ୟୁରୋ : ଦୀପାବଳିରେ ମନ ଜିଣିଲେ ୫-ଟି ସଚିବ ଭି.କେ ପାଣ୍ଡିଆନ୍ । ଆଲୋକର ପର୍ବ ଦୀପାବଳିରେ କୁନି ପିଲାଙ୍କ ମୁହଁରେ ହସ ଫୁଟାଇଛନ୍ତି ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ । ଅସହାୟ ଓ କୁନି କୁନି ପିଲାଙ୍କ ସହ ଦୀପାବଳି ପାଳନ କରିବାକୁ ମୁଖ୍ୟମନ୍ତ୍ରୀ ଆହ୍ୱାନ ଦେବା ପରେ ଆଜି କଳିଙ୍ଗ ଷ୍ଟାଡିୟମରେ ଥିବା ସ୍ପୋଟର୍ସ ହଷ୍ଟେଲରେ ପହଞ୍ଚିଥିଲେ ଭି.କେ ପାଣ୍ଡିଆନ୍ । ସାଙ୍ଗରେ ଥିଲେ କ୍ରୀଡା ସଚିବ ଭିନିଲ କ୍ରିଷ୍ଣା । ରାଜ୍ୟ ସରକାରଙ୍କ ଏହି ଦୁଇ ଅଧିକାରୀ ସ୍ପୋଟର୍ସ ହଷ୍ଟେଲର ଅନ୍ତେବାସୀଙ୍କ ସହ ବେଶ କିଛି ସମୟ କାଟିଥିଲେ । ଦୀପାବଳିର ଶୁଭେଚ୍ଛା ଜଣାଇବା ସହ ଅନ୍ତେବାସୀଙ୍କୁ ମିଠା ଓ ଲଡୁ ଦେଇ ନିଆରା ଢଙ୍ଗରେ ଦୀପାବଳି ସେଲିବ୍ରେସନ କରିଥିଲେ । ଆଉ ଶେଷରେ ଅନ୍ତେବାସୀଙ୍କ ସହ ବସି ଖାଇବାକୁ ଭୁଲିନଥିଲେ ପାଣ୍ଡିଆନ ଓ ଭିନିଲ କ୍ରିଷ୍ଣା । ଏପରିକି ରାଜ୍ୟ ସରକାରଙ୍କ ମୋ ସରକାର କାର୍ଯ୍ୟକ୍ରମ ଅନୁଯାୟୀ, ହଷ୍ଟେଲ ବାବଦରେ ଅନ୍ତେବାସୀଙ୍କ ଠାରୁ ମତାମତ ନେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
କେବଳ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ନୁହଁନ୍ତି ବରଂ ମୁଖ୍ୟ ଶାସନ ସଚିବ ଅସିତ ତ୍ରିପାଠୀ ମଧ୍ୟ ନିଆରା ଢଙ୍ଗରେ ଦୀପାବଳି ପାଳନ କରିଥିଲେ । ଅସିତ ଭୁବନେଶ୍ୱରରେ ଥିବା ଚେତନା ଗୃହକୁ ଯାଇ ମିଠା ବାଣ୍ଟିବା ସହ ଶବ୍ଦ ବିହୀନ ବାଣ ଫୁଟାଇ ଦୀପାବଳି ପାଳନ କରିଥିଲେ । ଏହାଛଡା ରାଜ୍ୟର କୋଣ ଅନୁକୋଣରେ ଜିଲ୍ଲାପାଳ ଓ ଏସପି ଶିଶୁ ସୁରକ୍ଷା କେନ୍ଦ୍ର ସହ ସ୍ଵଧାର ଗୃହରେ କୁନି ଶିଶୁ, ଭିନ୍ନକ୍ଷମ ଓ ଅସହାୟ ମହିଳାଙ୍କ ସହ ଦୀପାବଳି ପାଳନ କରି ଅନ୍ୟ ମାନଙ୍କ ପାଇଁ ନିଆରା ଉଦାହରଣ ସୃଷ୍ଟି କରିଛନ୍ତି ।
ସେହିଭଳି ସନ୍ଧ୍ୟାରେ କୁନି କୁନି କଅଁଳ କଢ଼ିଙ୍କ ଗହଣରେ ବେଶ୍ ହସଖୁସି ସହ ଦୀପାବଳି ପାଳନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆଉ ଭୁବନେଶ୍ୱର ଏସଓଏସ ଭିଲେଜରେ ରହୁଥିବା ଅନାଥ ଶିଶୁଙ୍କ ମୁହଁରେ ହସ ଭରିଛନ୍ତି । କଅଁଳ ଶିଶୁଙ୍କୁ ଉପହାର ଦେବାସହ ସେମାନଙ୍କୁ ସେବା, ଓ ଉଜ୍ଜ୍ୱଳ ଭବିଷ୍ୟତ ଗଢ଼ିବା ନେଇ ନୀତିବାଣୀ ଦେଇଛନ୍ତି ନବୀନ ।