ନିଜ ଟଙ୍କାକୁ ସୁରକ୍ଷିତ ରଖିବାକୁ ଲୋକମାନେ ବ୍ୟାଙ୍କରେ ଟଙ୍କା ଡିପୋଜିଟ୍ କରି ରଖିଥାନ୍ତି । କିନ୍ତୁ ଯଦି ବ୍ୟାଙ୍କରୁ ହିଁ ଆପଣଙ୍କ ଟଙ୍କା ଗାୟବ ହୋଇଯିବ, ତେବେ ଆପଣ କଣ କରିବେ । ଏଭଳି ଏକ ଘଟଣା ପଶ୍ଚିମବଙ୍ଗ ମେମାରି ସ୍ଥିତ ଏସବିଆଇ ବ୍ରାଞ୍ଚରେ ଘଟିଛି । ବ୍ୟାଙ୍କର ଜଣେ ସିନିୟର ଆସିଷ୍ଟାଣ୍ଟ ମ୍ୟାନେଜର୍ ସାଜିଛନ୍ତି ଚୋର । ମ୍ୟାନେଜର ଜଣଙ୍କ ୮୪ ଲକ୍ଷ ଟଙ୍କାର କଏନ୍ ଚୋରି କରିନେଇଛନ୍ତି । କିନ୍ତୁ ୮ ବର୍ଷ ଧରି ଏସବିଆଇରେ କାର୍ଯ୍ୟ କରୁଥିବା ଏହି ମ୍ୟାନେଜରଙ୍କ ଉପରେ କାହାର ହେଲେ ମଧ୍ୟ ସନ୍ଦେହ ହେଲା ନାହିଁ । ଅଡିଟ୍ ହେବା ପରେ ମାମଲାର ଖୁଲାସା ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମରୁ ମିଳିଥିବା ସୂଚନା ଅନୁଯାୟୀ, ଅଭିଯୋଗ ରହିଛି ଯେ, ୩୫ ବର୍ଷୀୟ ତାରକ ଜାୟସୱାଲ୍ ଲଟେରୀ ଖେଳରେ ଚୋରି କରାଯାଇଥିବା ଟଙ୍କାର ବ୍ୟବହାର କରିଥିଲେ । ଏହି ଚୋରି ସେ ଗତ ୧୭ ମାସ ମଧ୍ୟରେ କରିଥିବା ଜଣାପଡିଛି । ରିପୋର୍ଟ ଅନୁଯାୟୀ, ସେ ୮୪ ଲକ୍ଷ ଟଙ୍କା ଚୋରି କରିଛନ୍ତି । ଆଉ ଏହି ସବୁ ଟଙ୍କା କଏନ୍ ଥିଲା ବୋଲି ଜଣାପଡିଛି ।
ତେବେ ଯଦି କୁହାଯିବ ଯେ, ସେ କେବଳ ୧୦ ଟଙ୍କିଆ କଏନ୍ ଚୋରି କରିଛନ୍ତି ବୋଲି, ତେବେ ୧୭ ମାସ ପର୍ଯ୍ୟନ୍ତ ସେ ପ୍ରତିଦିନ ୨ ହଜାର ଟଙ୍କାର କଏନ୍ ଚୋରି କରିଛନ୍ତି । ଯାହାକି ପାଖାପାଖି ୮୪ ଲକ୍ଷ ଟଙ୍କା ହେବ । ଶନିବାର ସ୍ଥାନୀୟ ଅଦାଲତ ତାଙ୍କୁ ୫ ଦିନିଆ ପୋଲିସ ରିମାଣ୍ଡରେ ପଠାଇଦେଇଛି । ଜଣେ ପୋଲିସ ଅଧିକାରୀଙ୍କ ସୂଚନା ଅନୁଯାୟୀ, ଜାୟସୱାଲ ନିଜେ ତାଙ୍କ ଦୋଷ ସ୍ୱୀକାର କରିବା ସହ ସବୁ ଟଙ୍କା ଲଟେରୀ ଟିକେଟ୍ କିଣିବାରେ ଲଗାଇ ଦେଇଛନ୍ତି ବୋଲି ଅଦାଲତରେ ମାନିଛନ୍ତି ।