ୟୁପି ନିର୍ବାଚନ ପୂର୍ବରୁ କଂଗ୍ରେସକୁ ମିଳିପାରେ ବଡ ଝଟକା । ବିଜେପିରେ ସାମିଲ ହୋଇପାରନ୍ତି ଆରପିଏନ୍ ସିଂହ ।
କନକ ବ୍ୟୁରୋ: ୟୁପି ନିର୍ବାଚନ ପାଇଁ ଏବେ ସେଠାରେ ଚାଲିଛି ଦଳବଦଳ ଋତୁ । ଏକାଧିକ ନେତା ଦଳ ପରିବର୍ତ୍ତନ କରି ନୂଆ ଦଳରେ ସାମିଲ ହେଉଥିବାବେଳେ, କାହାକୁ କେଉଁଠୁ ଟିକେଟ୍ ମିଳୁଛି ତାକୁ ନେଇ ମଧ୍ୟ ଚର୍ଚ୍ଚା ବଢିବାରେ ଲାଗିଛି । ଏହାରି ଭିତରେ କଂଗ୍ରେସକୁ ଏକ ବଡ ଝଟକା ମିଳିପାରେ ବୋଲି ଆଶଙ୍କା ପ୍ରକାଶ ପାଉଛି । କାହିଁକି ନା ଦଳର ଦିଗଜ୍ଜ ନେତା ଆରପିଏନ୍ ସିଂହ ଖୁୁବଶୀଘ୍ର ହାତ ଛାଡି ପଦ୍ମ ଶିବିରରେ ପ୍ରବେଶ କରିବେ ବୋଲି ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମରୁ ମିଳିଥିବା ରିପୋର୍ଟ ମୁତାବକ, ଆରପିଏନ୍ ସିଂହ ଖୁବଶୀଘ୍ର କଂଗ୍ରେସ ଦଳକୁ ବାଏ ବାଏ କହି ବିଜେପିରେ ସାମିଲ ହୋଇପାରନ୍ତି । ଖାଲି ସେତିକି ନୁହେଁ ଦଳ ତାଙ୍କୁ କୁଶୀନଗର ସ୍ଥିତ ପଡରୌନା ଆସନରୁ ଟିକେଟ୍ ମଧ୍ୟ ଦେଇପାରେ । ଏହି ଆସନରୁ ସମାଜବାଦୀ ପାର୍ଟି ସ୍ୱାମୀ ପ୍ରସାଦ ମୌର୍ଯ୍ୟଙ୍କୁ ଠିଆ କରୁଛି, ତେଣୁ ବିଜେପି ସ୍ୱାମୀଙ୍କୁ ପରାସ୍ତ କରିବାକୁ ଆରପିଏନଙ୍କୁ ନିଜ ଦଳରେ ସାମିଲ କରିପାରେ ବୋଲି କୁହାଯାଉଛି ।
ବର୍ତ୍ତମାନ ପର୍ଯ୍ୟନ୍ତ ଆରପିଏନ୍ ସିଂହଙ୍କ ତରଫରୁ କିନ୍ତୁ ଏନେଇ କୌଣସି ବିଧିବଦ୍ଧ ଘୋଷଣା କରାଯାଇନାହିଁ । ହେଲେ ସୂତ୍ରରୁ ମିଳିଥିବା ସୂଚନା ମୁତାବକ ସେ କଂଗ୍ରେସ ଛାଡି ଖୁବଶୀଘ୍ର ବିଜେପିରେ ସାମିଲ ହୋଇପାରନ୍ତି ।
ଆରପିଏନ୍ ସିଂହ ବିଜେପିରେ ସାମିଲ ହେବା ଚର୍ଚ୍ଚା ଏବେ ନୁହେଁ ଦୀର୍ଘ ଦିନ ହେଲା ଚାଲିଆସୁଛି । ଆରପିଏନ୍ ପଛୁଆ ବର୍ଗର ନେତା ହୋଇଥିବାବେଳେ, କୁର୍ମି ଜାତିରୁ ଆସୁଛନ୍ତି । ଏଥିସହିତ ପୂର୍ବାଞ୍ଚଳରେ ମଧ୍ୟ ତାଙ୍କର ଭଲ ସଙ୍ଗଠନ ଅଛି । ତେଣୁ ବିଜେପି ତାଙ୍କୁ ଦଳରେ ସାମିଲ କରି ସିଟ୍ ହାତେଇବାକୁ ଅଙ୍କ କଷୁଛି ।
ସୂଚନାଯୋଗ୍ୟ ଯେ, ୟୁପି ନିର୍ବାଚନ ପାଇଁ ସୋମବାର କଂଗ୍ରେସ ନିଜର ଷ୍ଟାର କ୍ୟାମ୍ପେନର ତାଲିକା ଘୋଷଣା କରିଛି । ଏଥିରେ ୩୦ ଜଣ ନେତାଙ୍କୁ ସାମିଲ କରାଯାଇଛି । ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କ ସହିତ ଗୁଲାମ ନବୀ ଆଜାଦ୍, ରାଜ ବବର, ସଚ୍ଚିନ ପାଇଲଟ, କହ୍ନେୟା କୁମାରଙ୍କ ନାଁ ଏହି ଲିଷ୍ଟରେ ସାମିଲ ଅଛି । ୟୁପିର ୪୦୩ ଆସନ୍ ପାଇଁ ମୋଟ ୭ଟି ପର୍ଯ୍ୟାୟରେ ଭୋଟ୍ ପଡିବାକୁ ଅଛି । ଯାହାର ଫଳାଫଳ ମାର୍ଚ୍ଚ ୧୦ରେ ଆସିବ । ତେବେ ଏହା ପୂର୍ବରୁ ଫେବ୍ରୁଆରୀ ୧୦ରେ ପ୍ରଥମ, ୧୪ରେ ଦ୍ୱିତୀୟ, ୨୦ରେ ତୃତୀୟ,୨୩ରେ ଚତୁର୍ଥ ଓ ୨୭ରେ ପଂଚମ ପର୍ଯ୍ୟାୟଭୋଟ୍ ପଡିବ । ତା ସହିତ ମାର୍ଚ୍ଚ ୩ରେ ଷଷ୍ଠ ଓ ମାର୍ଚ୍ଚ ୭ରେ ସପ୍ତମ ପର୍ଯ୍ୟାୟ ମତଦାନ ହେବ ।