ରାଉରକେଲାର ଓଜସ୍ ନ୍ୟୁଜିଲାଣ୍ଡରେ ସମ୍ମାନିତ! ଜଣେ ସଫଳ ଓଡିଆଙ୍କ କାହାଣୀ
ପୁଣି ଓଡିଶା ପାଇଁ ଗର୍ବ ଏବଂ ଗୌରବ ଆଣିଦେଇଛନ୍ତି ଆଉ ଜଣେ ଓଡିଆ । ରାଉରକେଲାର ଯୁବ ଉଦ୍ୟୋଗପତି ଓଜସ୍ ମହାପାତ୍ରଙ୍କୁ ସମ୍ମାନଜନକ ବିଜନେସ୍ ସ୍କଲାରସିପ୍ ଆୱାର୍ଡରେ ସମ୍ମାନିତ କରିଛି ନ୍ୟୁଜିଲାଣ୍ଡ । ଓଜସଙ୍କୁ ଏହି ଆୱାର୍ଡ ଦେଇଛନ୍ତି ନିଜେ ନ୍ୟୁଜିଲାଣ୍ଡ ପ୍ରଧାନମନ୍ତ୍ରୀ ସିମୋନ୍ ୱିଲିୟମ୍ ବିଲ୍ । ତେବେ ସବୁଠାରୁ ବଡ଼ ତଥା ଗୁରୁତ୍ୱପୂର୍ଣ୍ଣ କଥା ହେଲା ଏହି ଆୱାର୍ଡ ପାଇବାରେ ଓଜସ୍ ନା କେବଳ ପ୍ରଥମ ଓଡିଆ ବରଂ ପ୍ରଥମ ଭାରତୀୟ ମଧ୍ୟ ।
Kanak News is now on WhatsApp
Join and get latest news updates delivered to you via WhatsApp
ଫିଜିକ୍ସରେ ପିଏଚଡି ଶେଷ କରିବା ପରେ ଓଜସ୍ ମାତ୍ର ୨୯ ବର୍ଷ ବୟସରେ ଏବେ ଫୋଟୋନିକ୍ ଇନୋଭେସନ ଲିମିଟେଡରେ ସିଇଓ ଅଛନ୍ତି । ଖାଲି ଏତିକି ନୁହେଁ, ୨୦୧୬ରେ ନ୍ୟୁଜିଲାଣ୍ଡ ଅଫ୍ ଦ ଇୟର ଆୱାର୍ଡର ତୃତୀୟ ସ୍ଥାନରେ ଥିଲା ଓଜସଙ୍କ ଫଟୋନିକ୍ ଇନୋଭେସନ୍ । ନ୍ୟୁଜିଲାଣ୍ଡରରେ ଦିଆଯାଉଥିବା ବିଜନେସ୍ ସ୍କଲାରସିପ୍ ଆୱାର୍ଡର ଲକ୍ଷ୍ୟ ହେଲା, ବ୍ୟବସାୟିକ କ୍ଷମତାକୁ ବଢ଼ାଇବା ସହ ନ୍ୟୁଜିଲାଣ୍ଡର ଯୁବ ଉଦ୍ୟୋଗୀଙ୍କୁ ଉତ୍ସାହିତ କରିବା । ସରକାର, ଉତ୍ପାଦନ କ୍ଷମତାକୁ ବଢ଼ାଇବା ଓ ନ୍ୟୁଜିଲାଣ୍ଡ ଅର୍ଥନୀତିକୁ ଦୃଢ଼ କରିବା ପାଇଁ ଏପରି ଅଭିନବ ଉପାୟରେ ଚେଷ୍ଟା ଜାରି ରଖିଛନ୍ତିା
ଏହି ପ୍ରତିଯୋଗିତାରେ ସଫଳ ଆବେଦକଙ୍କୁ ନିଜର ଅନ୍ତରାଷ୍ଟ୍ରୀୟ ସୁଯୋଗକୁ ବଢ଼ାଇବା ଏବଂ ନ୍ୟୁଜିଲାଣ୍ଡ ବ୍ୟବସାୟକୁ ବିକଶିତ କରିବା ପାଇଁ ସୁଯୋଗ ପ୍ରଦାନ କରାଯାଉଛି । ଓଜସଙ୍କ ବ୍ୟତୀତ ଆଉ ୧୩ ଜଣ ଯୁବ ଉଦ୍ୟୋଗୀଙ୍କୁ ନ୍ୟୁଜିଲାଣ୍ଡ ପ୍ରଧାନମନ୍ତ୍ରୀ ଏହି ସମ୍ମାନରେ ସମ୍ମାନିତ କରିଛନ୍ତି ।
ଏବେ ଓଜସ୍, କମ୍ପାନୀର ବିସ୍ତାର କ୍ଷେତ୍ରରେ ମନପ୍ରାଣ ଦେଇ କାମ କରୁଛନ୍ତି । କିନ୍ତୁ ଏଥିରେ ଗୋଟିଏ କଥା ନିଶ୍ଚିତ ଯେ ରାଉରକେଲାରେ କେବଳ ବିଶ୍ୱସନୀୟ ଷ୍ଟିଲ ନିର୍ମାଣ ହେଉନି, ଏଠାରେ ବିଶ୍ୱସ୍ତରୀୟ ତଥା ଅନ୍ତଃରାଷ୍ଟ୍ରୀୟ ପ୍ରତିଭା ମଧ୍ୟ ତିଆରି ହେଉଛନ୍ତି । ଓଜସ୍ ଏହା ପୂର୍ବରୁ ଭାରତର ପୂର୍ବତନ ରାଷ୍ଟ୍ରପତି ଏ.ପି.ଜେ ଅବଦୁଲ କାଲାମଙ୍କ ଠାରୁ ମଧ୍ୟ ପୁରସ୍କୃତ ହୋଇ ସାରିଛନ୍ତି ।