ବିଜେପୁରରେ ଲେଖାହେଲା ଓଡ଼ିଶା ରାଜନୀତିର ନୂଆ ଇତିହାସ । ପ୍ରାୟ ୯୮ ହଜାର ଭୋଟ୍ ବ୍ୟବଧାନରେ ବାଜି ମାରିଲେ ରୀତା ସାହୁ, ଅମାନତ ହରାଇଲା କଂଗ୍ରେସ, କମିଲା ବିଜେପି ଭୋଟ୍ ।
କନକ ବ୍ୟୁରୋ : ଆଜି ଥିଲା ଅଗ୍ନିପରୀକ୍ଷାର ଦିନ । ମହାରାଷ୍ଟ୍ର ଓ ହରିୟାଣାରେ ବାଜି ଲାଗିଥିଲା ମୋଦିଙ୍କ ମ୍ୟାଜିକ । ଆଉ ଏପଟେ ଓଡିଶାର ବିଜେପୁର ବିଧାନସଭା ନିର୍ବାଚନମଣ୍ଡଳୀରେ ଥିଲା ନବୀନଙ୍କ ଲୋକପ୍ରିୟତାର ଆଉ ଏକ ପରୀକ୍ଷା । ବିଜେପୁରରେ ରେକର୍ଡ ରଚିଛନ୍ତି ରୀତା ସାହୁ । ୧ ଲକ୍ଷ ୩୫ ହଜାର ୯୫୭ ଖଣ୍ଡ ଭୋଟ୍ ପାଇ ୯୮ ହଜାରର ବୃହତ ବ୍ୟବଧାନରେ ବିଜୟୀ ହୋଇ ରେକର୍ଡ କରିଛନ୍ତି ରୀତା । ତାଙ୍କ ପଛକୁ ବିଜେପି ପ୍ରାର୍ଥୀ ସନତ ଗଡତିଆ ୩୭ ହଜାର ୯୬୭ ଖଣ୍ଡ ଭୋଟ୍ ପାଇ ଦ୍ୱିତୀୟ ସ୍ଥାନରେ ରହିଛନ୍ତି । କଂଗ୍ରେସ ପ୍ରାର୍ଥୀ ଦିଲ୍ଲୀପ ପଣ୍ଡା ମାତ୍ର ୫ ହଜାର ୮୭୩ ଖଣ୍ଡ ଭୋଟ ପାଇ ତୃତୀୟ ସ୍ଥାନରେ ରହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିଜେଡିର ଏହି ବିଜୟ ଉତ୍ସବ ଏବଂ ରୀତା ସାହୁଙ୍କ ନିର୍ବାଚନୀ ସଫଳତା, ଓଡ଼ିଶା ରାଜନୈତିକ ଇତିହାସରେ ହୁଏତ ସବୁବେଳେ ମନେ ରହିବ । ଯେତେବେଳେ ବି କୌଣସି ପ୍ରାର୍ଥୀ ଅଧିକ ଭୋଟ୍ ବ୍ୟବଧାନରେ ନିର୍ବାଚିତ ହେବେ ଏହି ସଫଳତାର କାହାଣୀ ନିଶ୍ଚିତ ସାମ୍ନାକୁ ଆସିବ । କାରଣ ଓଡ଼ିଶାର ନିର୍ବାଚନୀ ଇତିହାସରେ ସର୍ବାଧିକ ଭୋଟ୍ ବ୍ୟବଧାନରେ ନିର୍ବାଚିତ ହୋଇଛନ୍ତି ରୀତା ସାହୁ ।
ବିଜେପୁର ଉପ-ନିର୍ବାଚନରେ ରୀତା ସାହୁଙ୍କୁ ମିଳିଛି ୧ ଲକ୍ଷ ୩୫ ହଜାର ୯୫୭ ଭୋଟ୍ । ଆଉ ଏଠି ବିଜୟ ବ୍ୟବଧାନ ୯୭ ହଜାର ୯୯୦ ଭୋଟ୍ । କୌଣସି ପ୍ରାର୍ଥୀ ଏତେ ସଂଖ୍ୟକ ଭୋଟ୍ ବ୍ୟବଧାନରେ ବିଜୟୀ ହେବାରେ ଏହା ଏକ ବିରଳ ରେକର୍ଡ । ଏହା ପୂର୍ବରୁ
-୨୦୦୦ ବିଧାନସଭା ନିର୍ବାଚନରେ ବିଶ୍ୱଭୂଷଣ ହରିଚନ୍ଦନ ୯୪, ହଜାର ୫୫୫ ଭୋଟ୍ ବ୍ୟବଧାନରେ ବିଜୟୀ ହୋଇଥିଲେ
-୨୦୧୯ ସାଧାରଣ ନିର୍ବାଚନରେ ସୌମ୍ୟରଂଜନ ପଟ୍ଟନାୟକ ୮୧ ହଜାର ୪୩୦ ଭୋଟ ବ୍ୟବଧାନରେ ବିଜୟୀ ହୋଇଥିଲେ ।
ଯଦି ବିଜେପୁରର ଗତ ୩ଟି ନିର୍ବାଚନକୁ ଦେଖାଯାଏ-
-୨୦୧୮ ଉପ-ନିର୍ବାଚନରେ ୪୨ ହଜାର ଭୋଟ୍ ବ୍ୟବଧାନରେ, ବିଜେପି ପ୍ରାର୍ଥୀଙ୍କଠାରୁ ବିଜୟୀ ହୋଇଥିଲେ ବିଜେଡି ପ୍ରାର୍ଥୀ ରୀତା ସାହୁ ।
-୨୦୧୯ ସାଧାରଣ ନିର୍ବାଚନରେ ୫୭ ହଜାର ଭୋଟ୍ ବ୍ୟବଧାନରେ, ବିଜେପି ପ୍ରାର୍ଥୀଙ୍କଠାରୁ ବିଜୟୀ ହୋଇଥିଲେ ବିଜେଡି ପ୍ରାର୍ଥୀ ନବୀନ ପଟ୍ଟନାୟକ ।
-ଆଉ ୨୦୧୯ ଉପ-ନିର୍ବାଚନରେ ବିଜୟ ବ୍ୟବଧାନ ପହଂଚିଛି ୯୭ ହଜାର ୯୯୦ ଭୋଟରେ
ଅର୍ଥାତ ଓଡ଼ିଶାର ସବୁଠାରୁ ଲୋକପ୍ରିୟ ମୁଖ୍ୟମନ୍ତ୍ରୀଙ୍କୁ ମଧ୍ୟ ପଛରେ ପକାଇ ଦେଇଛନ୍ତି ରୀତା ସାହୁ । ଅନ୍ୟପଟେ ବିରୋଧୀଙ୍କ ଭୋଟ୍ ସଂଖ୍ୟା ଦିନକୁ ଦିନ କମିବାରେ ଲାଗିଛି ।
-୨୦୧୮ ଉପ-ନିର୍ବାଚନରେ ବିଜେପି ପ୍ରାର୍ଥୀ ପାଇଥିଲେ ୬୦ ହଜାର ୯୩୯ ଖଣ୍ଡ ଭୋଟ୍
-୨୦୧୯ ସାଧାରଣ ନିର୍ବାଚନରେ ବିଜେପି ପ୍ରାର୍ଥୀଙ୍କୁ ମିଳିଥିଲା ୫୩ ହଜାର ୪୮୨ ଭୋଟ୍
-ଆଉ ୨୦୧୯ ନିର୍ବାଚନରେ ବିଜେପିର ଭୋଟ୍ ସୀମିତ ରହିଛି ୩୭ ହଜାର ୯୬୭ ଭୋଟରେ
-ସେହିପରି କଂଗ୍ରେସ ପ୍ରାର୍ଥୀ ୨୦୧୮ ଉପ-ନିର୍ବାଚନରେ ପାଇଥିଲେ ୧୦ ହଜାର ୨୭୪ ଭୋଟ୍
-୨୦୧୯ ସାଧାରଣ ନିର୍ବାଚନରେ କଂଗ୍ରେସ ପ୍ରାର୍ଥୀଙ୍କୁ ମିଳିଥିଲା ୧୪ ହଜାର ୩୪୪
-ଆଉ ୨୦୧୯ ନିର୍ବାଚନରେ କଂଗ୍ରେସ ପ୍ରାର୍ଥୀଙ୍କୁ ମିଳିଛି ମାତ୍ର ୫ ହଜାର ୮୭୩ ଭୋଟ୍
ଆଉ ଏସବୁ ଭିତରେ ୨୦୧୯ ଉପ-ନିର୍ବାଚନରେ ବିପୁଳ ଭୋଟ୍ ସହ ବିଜେପୁର କବଜା କରିଛି ବିଜୁ ଜନତା ଦଳ ।