କରୋନା ଭୟ: ଦେଶ ଛାଡି ବିଦେଶ ଅଭିମୁଖେ ଧନୀ ବ୍ୟକ୍ତି, କିଏ ପ୍ରାଇଭେଟ ଜେଟ୍ ବୁକ୍ କରୁଛି, କିଏ ଲକ୍ଷ ଲକ୍ଷ ଟଙ୍କା ଟିକେଟ କରି ବିଦେଶ ଯାଉଛି ।
କନକ ବ୍ୟୁରୋ : କରୋନା ସଂକ୍ରମଣ ହୁ ହୁ ହୋଇ ବଢୁଥିବା ବେଳେ ଅକ୍ସିଜେନ ଓ ବେଡର ଘୋର ଅଭାବ ଦେଖିବାକୁ ମିଳୁଛି । ଏଭଳି ସ୍ଥଳେ ଦେଶ ଛାଡି ବିଦେଶ ଅଭିମୁଖେ ଭାରତର ଧନୀ ଶ୍ରେଣୀର ବ୍ୟକ୍ତି । କିଛି ଦେଶ ଭାରତୀୟ ନାଗରିକଙ୍କ ପ୍ରବେଶ ଉପରେ କଟକଣା ଲଗାଇଥିବା ବେଳେ ଅନ୍ୟ କିଛି ଦେଶରେ ଏବେ ବି ଭାରତୀୟ ନାଗରିକଙ୍କୁ ପ୍ରବେଶ ଅନୁମତି ରହିଛି । ଯାହାର ସୁଯୋଗ ନେଇ ନିଜ ପରିବାର ସହ ବିଦେଶ ଚାଲିଯାଉଛନ୍ତି ଦେଶର ବଡ ବଡ ଧନୀକ ଶ୍ରେଣୀର ବ୍ୟକ୍ତି । ଏପରିକି ପ୍ରାଇଭେଟ ଜେଟ ବୁକ୍ କରି ବିଦେଶ ଚାଲିଯାଉଥିବାର ଖବର ଏବେ ସାମ୍ନାକୁ ଆସୁଛି ।
Kanak News is now on WhatsApp
Join and get latest news updates delivered to you via WhatsApp
କେବଳ ଧନୀ ବ୍ୟକ୍ତି ନୁହଁନ୍ତି ବରଂ ବଲିଉଡ କଳାକାର ମଧ୍ୟ ବିଦେଶ ଯିବା ପାଇଁ ବିମାନବନ୍ଦରରେ ଭିଡ ଜମାଉଥିବାର ଦେଖିବାକୁ ମିଳିଛି । ଖାସକରି ମାଳଦ୍ୱୀପକୁ ବାଛିଛନ୍ତି ବଲିଉଡର କଳାକାର । ଯେଉଁଥିପାଇଁ ମାଳଦ୍ୱୀପର କିଛି ସ୍ଥାନରେ ଭାରତୀୟଙ୍କ ବୁଲିବା ଉପରେ କଟକଣା ଲଗାଯାଇଛି । କିଛି ହୋଟେଲ ଓ ନିର୍ଦ୍ଦିଷ୍ଟ କିଛି ସ୍ଥାନକୁ ଛାଡିଦେଲେ ସବୁଆଡେ ଏହି କଟକଣା ଜାରି କରାଯାଇଛି । ଏହାସତ୍ତେ୍ୱ ମଧ୍ୟ ମାଳଦ୍ୱୀପ ଯିବାକୁ ବଲିଉଡ ଷ୍ଟାରଙ୍କ ମଧ୍ୟରେ ଯେପରି ପ୍ରତିଯୋଗିତା ଲାଗିଛି ।
କିଛି ବ୍ୟକ୍ତି ଦୁବାଇ ଯାତ୍ରା କରିବାକୁ ପ୍ରାଇଭେଟ ପ୍ଲେନର ବ୍ୟବହାର କରୁଥିବାର ସୂଚନା ମିଳିଛି । ଏପରିକି ଭାରତୀୟ ନାଗରିକଙ୍କ ଉପରେ ଦୁବାଇ କଟକଣା ଲଗାଇବା ପୂର୍ବରୁ ଅଧିକାଂଶ ଧନିକ ଶ୍ରେଣୀର ବ୍ୟକ୍ତି ଦୁବାଇ ଚାଲିଯାଇଛନ୍ତି । ଏପରିକି ଗୋଟିଏ ଟିକେଟ ପାଇଁ ୧୫ ଲକ୍ଷ ଟଙ୍କା ଦେବାକୁ ମଧ୍ୟ ପଛାଇନାହାନ୍ତି । ସେହିଭଳି ପ୍ରାଇଭେଟ ଜେଟ୍ ଗୁଡିକୁ ବୁକ୍ କଲେ ରିଟର୍ଣ୍ଣ ଦର ମଧ୍ୟ ଦେବାକୁ ପଡୁଛି । ଏହାସତ୍ତେ୍ୱ ମଧ୍ୟ ଦେଶ ଛାଡିବାକୁ ପଛାଇ ନାହାନ୍ତି ଧନୀକ ଶ୍ରେଣୀର ବ୍ୟକ୍ତି ।