କନକ ବ୍ୟୁରୋ : ଉତ୍ତରାଖଣ୍ଡ ହିମସ୍ଖଳନ ଘଟଣାରେ ଗୋଟିଏ ପରେ ଗୋଟିଏ ମୃତଦେହ ମିଳିବାରେ ଲାଗିଛି । ଦ୍ୱିତୀୟ ଦିନରେ ତପୋବନ ଟନେଲରେ ଆଗେଇ ଚାଲିଛି ଉଦ୍ଧାର କାମ । ନିର୍ମାଣାଧୀନ ଦ୍ୱିତୀୟ ଟନେଲ ଭିତରେ ଉଦ୍ଧାର କାମକୁ ତ୍ୱରାନ୍ୱିତ କରିଛନ୍ତି ଆଇଟିବିପି ଜବାନ । ନିଜେ ଆଇଟିବିପି ଡିଜି ପହଁଚି ଉଦ୍ଧାରକାମ ତଦାରଖ କରିଛନ୍ତି । ୨.୫ କିଲୋମିଟରର ଏହି ଟନେଲକୁ ଦେଖନ୍ତୁ । କିଛି ଲୋକଙ୍କୁ ଉଦ୍ଧାର କରାଯାଇଛି । ଆଉ କିଛି ଲୋକ ଏବେ ବି ଫଶି ରହିଛନ୍ତି । ସେମାନଙ୍କୁ ଉଦ୍ଧାର କରିବାର ପ୍ରକ୍ରିୟା ଜାରି ରହିଛି ।
Kanak News is now on WhatsApp
Join and get latest news updates delivered to you via WhatsApp
ଉତରାଖଣ୍ଡ ମୁଖ୍ୟମନ୍ତ୍ରୀ ତ୍ରିଭେନ୍ଦ୍ର ସିଂ ରାୱତ ମଧ୍ୟ ତପୋବନ ଟନେଲର ଉଦ୍ଧାର କାମ ଚାଲିଥିବା ଅଂଚଳରେ ପହଁଚି ନିଜେ ଏହାର ସମୀକ୍ଷା କରିଛନ୍ତି । ଉଦ୍ଧାର କାମରେ ଜେସିବି ଲଗାଯାଇଛି । ମାଟି ତଳେ ଫସିଥିବା ଶ୍ରମିକଙ୍କୁ ଠାବ କରିବାକୁ ସନ୍ଧାନୀ କୁକୁରଙ୍କ ସହାୟତା ନିଆଯାଇଛି । ଏଥିପାଇଁ ଦିଲ୍ଲୀରୁ ସ୍ୱତନ୍ତ୍ର ଭାବେ ଡଗ୍ ସ୍କୁଆଡ୍ ଆସି ପହଁଚିଛି । ଫସିଥିବା ଲୋକଙ୍କୁ ବଂଚାଇବାକୁ ହେଲେ ୨୪ ଘଂଟା ସମୟ ସବୁଠାରୁ ଗୁରୁତ୍ୱପୂର୍ଣ୍ଣ । ରବିବାର ସକାଳୁ ହିମସ୍ଖଳନ ପରେ ଏହି ଟନେଲ ଗୁଡିକରେ ଭର୍ତି ହୋଇଯାଇଥିଲା ମାଟି ଓ ପାଣି । ଯାହା ଭିତରେ ଫସିଥିଲେ ଶ୍ରମିକ । ଦ୍ୱିତୀୟ ଟନେଲରେ ପ୍ରାୟ ୩୬ ଜଣ ଶ୍ରମିକ ଫସି ରହିଥିବା ଅନୁମାନ କରାଯାଉଛି । ଶ୍ରମିକଙ୍କ ମଷ୍ଟର ରୋଲ୍ ଅନୁସାରେ ଏହି ଆକଳନ କରାଯାଉଛି ।
ଆଇଟିବିପି ଜବାନ , ଏସଡିଆରଏଫ୍ ଟିମ୍ ମଧ୍ୟ ଉଦ୍ଧାରକାମରେ ଲାଗିଛି । ରବିବାରର ଏହି ଲୋମଟାଙ୍କୁରା ପ୍ରାକୃତିକ ବିପର୍ଯ୍ୟୟ ପରେ ପ୍ରାୟ ଦେଢ ଶହ ଲୋକଙ୍କ ପତାମିଳୁନି । ପ୍ରଥମ ଟନେଲ ଭିତରେ ଫସିଥିବା ୧୬ ଜଣ ଶ୍ରମିକଙ୍କୁ ସଫଳତାର ସହିତ ଉଦ୍ଧାର କରିଛନ୍ତି ଆଇଟିବିପି ଜବାନ । ମୃତ୍ୟୁର ଟନେଲ ଭିତରୁ ସୁରକ୍ଷିତ ବାହାରି ଆସିବା ପରେ କିଛି ଏହିଭଳି ଖୁସିରେ ଆତ୍ମହରା ହୋଇପଡିଛନ୍ତି ଶ୍ରମିକ । ତେବେ ଆଉ ଏକ ଟନେଲ ଭିତରେ କିଛି ଶ୍ରମିକ ଫସି ରହିଥିବା କୁହାଯାଉଛି । ସେମାନଙ୍କୁ ଉଦ୍ଧାର କରିବା ପାଇଁ ଜାରି ରହିଛି ଉଦ୍ୟମ ।
ଅନ୍ୟପଟେ ଉଦ୍ଧାର କାର୍ଯ୍ୟରେ ବାୟୁସେନାର ଭୂମିକା ବେଶ ଗୁରୁତ୍ୱ ବହନ କରୁଛି । ଉଦ୍ଧାର କାର୍ଯ୍ୟରେ ସାମିଲ ହୋଇଛନ୍ତି, ୩ଏମଆଇ-୧୭, ଚିନୁକ, ୧ଏଏଲଏଚ । ଉତରାଖଣ୍ଡରେ ଆସିଥିବା ଏହି ପ୍ରଳୟ ଗୋଟିଏ କଥା କହୁଛି, ଯେତେବେଳେ ପ୍ରାକୃତିକ ବିପର୍ଯ୍ୟୟ, କାହାକୁ କହି ଆସେନି ଆଉ ଥରେ ଆସିଲେ ଏମିତି ଚିହ୍ନ ଛାଡେ ଯାହାକୁ ଭୁଲିହୁଏନି ।