ଆଇଆଇଟି ଭୁବନେଶ୍ୱରରେ ସାଧାରଣତନ୍ତ୍ର ଦିବସ ପାଳିତ । ସମ୍ବିଧାନର ଗୁରୁତ୍ୱ ବୁଝାଇଲେ ଶିକ୍ଷାନୁଷ୍ଠାନର ନିର୍ଦ୍ଦେଶକ ପ୍ରଫେସର ରାଜା କୁମାର ।
କନକ ବ୍ୟୁରୋ : ଆଇଆଇଟି ଭୁବନେଶ୍ୱରରେ ପାଳିତ ହୋଇଛି ସାଧାରଣତନ୍ତ୍ର ଦିବସ । ଆଇଆଇଟି ଭୁବନେଶ୍ୱରର ନିର୍ଦ୍ଦେଶକ ପ୍ରଫେସର ଆର.ଭି. ରାଜା କୁମାର ଶିକ୍ଷାନୁଷ୍ଠାନ ପରିସରରେ ପତାକା ଉତ୍ତୋଳନ କରିବା ପରେ ପରେଡ ଅନୁଷ୍ଠିତ ହୋଇଥିଲା । ସରକାରଙ୍କ କୋଭିଡ ଗାଇଡଲାଇନ ଅନୁଯାୟୀ, ଗଣତନ୍ତ୍ର ଦିବସ ପାଳନ ହୋଇଥିବା ବେଳେ ନିଜ ଅଭିଭାଷଣରେ ପ୍ରଫେସର ରାଜା କୁମାର ସାଧାରଣ ଲୋକଟିଏ ପାଇଁ ସମ୍ବିଧାନ କେତେ ଗୁରୁତ୍ୱପୂର୍ଣ୍ଣ ତାହା ବଖାଣିଥିଲେ । ଦେଶବାସୀଙ୍କୁ ଭ୍ରାତୃତ୍ୱଭାବରେ ଯୋଡି ରଖିବାର ସବୁଠୁ ବଡ ମାଧ୍ୟମ ହେଉଛି ସମ୍ବିଧାନ । ଦେଶର ପ୍ରତି ନାଗରିକ ନ୍ୟାୟ ଓ ସମାନତା ପାଇବେ ସେ ବିଶ୍ୱାସ ଆମକୁ ସମ୍ବିଧାନ ଦେଇଥାଏ ।
Kanak News is now on WhatsApp
Join and get latest news updates delivered to you via WhatsApp
ଏହାଛଡା କରୋନା ମହାମାରୀ କବଳରୁ କିଭଳି ଶିକ୍ଷାନୁଷ୍ଠାନକୁ ସୁରକ୍ଷିତ ରଖାଯାଇଥିଲା ସେ ବାବଦରେ ମଧ୍ୟ ନିଜ ଅଭିଭାଷଣରେ ସାମ୍ନାକୁ ଆଣିଥିଲେ ପ୍ରଫେସର ରାଜା କୁମାର । ମହାମାରୀ ଭଳି ସଙ୍କଟ ସମୟରେ ମଧ୍ୟ କ୍ୟାମ୍ପସର ଜରୁରୀକାଳୀନ ବିଭାଗ ଖୋଲା ରହିଥିଲା । ଆଉ ଏଥିପାଇଁ ଶିକ୍ଷାନୁଷ୍ଠାନର ସମସ୍ତ ଅଧ୍ୟାପକ ଓ କର୍ମଚାରୀ ସହଯୋଗର ହାତ ବଢାଇଥିଲେ । ଏହି ସମୟରେ କ୍ୟାମ୍ପସରେ ଅନେକ କିଛି ପରିବର୍ତ୍ତନ ହୋଇଛି । ଅନଲାଇନ ପାଠପଢା ପାଇଁ ନୂଆ ଟେକ୍ନୋଲୋଜିକୁ ବିକଶିତ କରିବା, ନୂଆ ନୂଆ ଦିଗ ଉପରେ ଫୋକସ କରିବା ଭଳି କାର୍ଯ୍ୟ କରାଯାଇଛି । ଏପରିକି ମହାମାରୀ ଭଳି ସଙ୍କଟ ସମୟରେ ପୂର୍ବଭଳି ଶିକ୍ଷାଦାନକୁ ଗୁରୁତ୍ୱ ଦେଇ ଶିକ୍ଷାନୁଷ୍ଠାନର ସମସ୍ତ ଅଧ୍ୟାପକ ଓ କର୍ମଚାରୀ ଅନ୍ୟ ମାନଙ୍କ ପାଇଁ ରୋଲମଡେଲ ସାଜିଛନ୍ତି ।
ମହାମାରୀ ଭିତରେ କରୋନା ଟିକା ଆଣି ଭାରତ ବାୟୋଟେକ ଓ ସେରମ ଇନଷ୍ଟିଚ୍ୟୁଟର ବୈଜ୍ଞାନିକ ପୂରା ଦେଶକୁ ଗର୍ବିତ କରିଛନ୍ତି । କରୋନା ଭ୍ୟାକସିନ ଆସିବା ଫଳରେ ଖୁବଶୀଘ୍ର ଦେଶରେ ପୂର୍ବ ଅବସ୍ଥା ଫେରି ଆସିବ ବୋଲି କହିଛନ୍ତି ପ୍ରଫେସର ରାଜା କୁମାର ।