ଶ୍ରୀମନ୍ଦିର ଭିତରେ ଅଣହିନ୍ଦୁ ପ୍ରବେଶ ନେଇ ଶଙ୍କରାଚାର୍ଯ୍ୟଙ୍କ ମତ ! କହିଲେ ଏହା ଶାସ୍ତ୍ରୀୟ ମର୍ଯ୍ୟାଦାର ଉଲଂଘନ, ବିବାଦୀୟ ପ୍ରସଙ୍ଗକୁ ନେଇ ନେତାଙ୍କ ଭିତରେ ଦ୍ୱନ୍ଦ୍ୱ ।
କନକ ବ୍ୟୁରୋ : ଶ୍ରୀମନ୍ଦିର ଭିତରକୁ ଅଣହିନ୍ଦୁ ପ୍ରବେଶ କରି ପାରିିବେ କି ନାହିଁ, ବଂଶାନୁକ୍ରମିକ ସେବାୟତ ପରମ୍ପରା ବନ୍ଦ ହେବ କି ନାହିଁ, ସୁପ୍ରିମକୋର୍ଟଙ୍କ ପ୍ରସ୍ତାବ ପରେ ସୃଷ୍ଟି ହୋଇଛି ବଡ଼ ଧରଣର ବିତର୍କ । ଏଥିସହ ସୃଷ୍ଟି ହୋଇଛି ଧର୍ମ ଓ ଆଇନ୍ ମଧ୍ୟରେ ଦ୍ୱନ୍ଦ୍ୱ । ଏହି ପ୍ରସଙ୍ଗରେ ଶଙ୍କରାଚାର୍ଯ୍ୟ ଓ ପୁରୀ ଗଜପତି କହିଛନ୍ତି, ପରମ୍ପରାକୁ ବଦଳାଇବା ଗ୍ରହଣୀୟ ନୁହେଁ । ଆଜି ପୁରୀ ଗୋବର୍ଦ୍ଧନ ପୀଠ, ପ୍ରେସମିଟ୍ କରି ଶଙ୍କରାଚାର୍ଯ୍ୟଙ୍କ ମତକୁ ଦୋହରାଇଛି । ସେପଟେ ଏହାକୁ ନେଇ ରାଜନୈତିକ ମହଲରେ ଆସିଛି ଭିନ୍ନ ଭିନ୍ନ ମତ । ବରିଷ୍ଠ ବିଜେପି ନେତା ବିଜୟ ମହାପାତ୍ର କହିଛନ୍ତି, ସୁପ୍ରିମକୋର୍ଟଙ୍କ ନିଷ୍ପତି ପାଳନ କରିବା କଷ୍ଟକର । ଆଇନ ମନ୍ତ୍ରୀ ପ୍ରତାପ ଜେନା କହିଛନ୍ତି, ସୁପ୍ରିମକୋର୍ଟଙ୍କ କପି ମିଳିବା ପରେ ପ୍ରସ୍ତାବ ଉପରେ ବିଚାର ବିମର୍ଶ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ଶ୍ରୀମନ୍ଦିର ଭିତରକୁ ଅଣହିନ୍ଦୁ ପ୍ରବେଶ ନେଇ ବିଚାର କରିବା ପାଇଁ ସୁପ୍ରିମକୋର୍ଟଙ୍କ ଆହ୍ୱାନ ପରେ ଆରମ୍ଭ ହୋଇଛି ବଡ଼ ଧରଣର ବିତର୍କ । ଏହି ପରିପ୍ରେକ୍ଷୀରେ ସାମ୍ନାକୁ ଆସିଛି ଶଙ୍କରାଚାର୍ଯ୍ୟ ନିଶ୍ଚଳାନନ୍ଦ ସରସ୍ୱତୀଙ୍କ ମତ । ଶଙ୍କରାଚାର୍ଯ୍ୟଙ୍କ ମତ ହେଉଛି ଶ୍ରୀମନ୍ଦିରରେ ପ୍ରବେଶ ସମ୍ପର୍କରେ ସନାତନ ଶାସ୍ତ୍ରୀୟ ମର୍ଯ୍ୟାଦା ଉଲ୍ଲଙ୍ଘନ ସ୍ୱୀକାରଯୋଗ୍ୟ ନୁହେଁ । ଏ ନେଇ ପୁରୀ ଗୋବର୍ଦ୍ଧନ ପୀଠର ମୁଖପାତ୍ର ପ୍ରେସ ମିଟ୍ କରି ଶଙ୍କରାଚାର୍ଯ୍ୟଙ୍କ ମତକୁ ପୁଣି ଥରେ ଦୋହରାଇଛନ୍ତି । ଶ୍ରୀମନ୍ଦିର ସଂସ୍କାର ନେଇ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ଅନେକ ଦ୍ୱନ୍ଦ୍ୱ ସୃଷ୍ଟି ହୋଇଛି । ଶଙ୍କରାଚାର୍ଯ୍ୟଙ୍କ ଭଳି ଅଣହିନ୍ଦୁ ପ୍ରବେଶ ନେଇ ଗଜପତି ମହାରାଜା ଦିବସିଂହ ଦେବ ମଧ୍ୟ ବିଭିନ୍ନ ସମୟରେ ମତ ରଖି ଆସିଛନ୍ତି ।
ଗଜପତି ମହାରାଜଙ୍କ ମତ ହେଉଛି ଶ୍ରୀମନ୍ଦିରର ଦୁଇଟି ମୁଖ୍ୟ ପର୍ବ ରଥଯାତ୍ରା ଓ ସ୍ନାନଯାତ୍ରାରେ ବିଗ୍ରହମାନେ ସମସ୍ତଙ୍କୁ ଦର୍ଶନ ଦେବା ନିମନ୍ତେ ଶ୍ରୀମନ୍ଦିର ବାହାରକୁ ବିଜେ କରିଥାନ୍ତି । ଅଣହିନ୍ଦୁଙ୍କ ବର୍ଷବ୍ୟାପୀ ଦର୍ଶନ ନିମନ୍ତେ ଶ୍ରୀମନ୍ଦିର ସିଂହଦ୍ୱାର ଗୁମୁଟ ମଧ୍ୟରେ ଶ୍ରୀ ଶ୍ରୀ ପତିତପାବନଙ୍କର ପ୍ରତିଷ୍ଠା ହୋଇଛି । ଶ୍ରୀମନ୍ଦିରର ରୀତିନୀତି ତଥା ପ୍ରଚଳିତ ପରମ୍ପରା ସମ୍ପର୍କରେ କୌଣସି ପ୍ରଶ୍ନ ଉପୁଜିଲେ ଶାସ୍ତ୍ରୀୟ ସିଦ୍ଧାନ୍ତ ନିମନ୍ତେ ଶଙ୍କରାଚାର୍ଯ୍ୟ ଓ ମୁକ୍ତିମଣ୍ଡପ ପଣ୍ଡିତଙ୍କ ଉପଦେଶ ଗ୍ରହଣ କରାଯାଇଥାଏ । ଶାସ୍ତ୍ରୀୟ ବିଧିବିଧାନ ଓ ପରମ୍ପରାକୁ ବାଦଦେଇ ଶ୍ରୀମନ୍ଦିରର କୌଣସି ରୀତିନୀତିକୁ ପରିବର୍ତନ କରାଯିବା ସମୀଚୀନ ନୁହେଁ ବୋଲି କହିଛନ୍ତି ଗଜପତି ଦିବ୍ୟସିଂହ ଦେବ ।
ଅଣହିନ୍ଦୁ ପ୍ରବେଶ ନେଇ ଶଙ୍କରାଚାର୍ଯ୍ୟ ଓ ପୁରୀ ଗଜପତିଙ୍କର ସ୍ପଷ୍ଟ ମତ ରହିଛି । ସେପଟେ ଏହାକୁ ରାଜନୈତିକ ମହଲରେ ମଧ୍ୟ ଏ ନେଇ ଜୋରଦାର ଆଲୋଚନା ଆରମ୍ଭ ହୋଇଛି । ରେକର୍ଡ ଅଫ୍ ରାଇଟ୍ସ, ବଂଶାନୁକ୍ରମିକ ସେବାୟତ ପରମ୍ପରା ଆଦି ପ୍ରସଙ୍ଗରେ ଭିନ୍ନ ଭିନ୍ନ ମତ ପ୍ରକାଶ ପାଇଛି । ବରିଷ୍ଠ ବିଜେପି ନେତା ବିଜୟ ମହାପାତ୍ର କହିଛନ୍ତି, ସୁପ୍ରିମକୋର୍ଟଙ୍କ ନିଷ୍ପତି ପାଳନ କରିବା କଷ୍ଟକର । ସେ କହିଛନ୍ତି, ଅନ୍ୟ ମନ୍ଦିର ଓ ଶ୍ରୀମନ୍ଦିର ମଧ୍ୟରେ ଫରକ ରହିଛି । ସେହିପରି ପିସିସି ସଭାପତି ନିରଂଜନ ପଟ୍ଟନାୟକ କହିଛନ୍ତି, ଶ୍ରୀମନ୍ଦରରେ ସଂସ୍କାର ଆସିବା ଆବଶ୍ୟକ, ତେବେ ପରମ୍ପରାର ପରିବର୍ତନ ସହଜ ନୁହେଁ । ସେପଟେ ଆଇନ ମନ୍ତ୍ରୀ ପ୍ରତାପ ଜେନା କହିଛନ୍ତି, ସୁପ୍ରିମକୋର୍ଟଙ୍କ କପି ମିଳିବା ପରେ ପ୍ରସ୍ତାବ ଉପରେ ବିଚାର ବିମର୍ଶ କରାଯିବ । ପୁରୀ ଜିଲ୍ଲା ଜଜ୍ ଦେଇଥିବା ପ୍ରସ୍ତାବକୁ ସୁପ୍ରିମକୋର୍ଟ ଗ୍ରହଣ କରିବା ପରେ ଏହାକୁ ନେଇ ତର୍କ ବିତର୍କ ବଢିବାରେ ଲାଗିଛି । ବିଶେଷ କରି ବଂଶାନୁକ୍ରମିକ ସେବାୟତ ପରମ୍ପରା ବନ୍ଦ ଓ ମନ୍ଦିର ଭିତରକୁ ଅଣହିନ୍ଦୁଙ୍କ ପ୍ରବେଶ ପ୍ରସଙ୍ଗରେ ପ୍ରସ୍ତାବ ଉପରେ ମିଶ୍ର ପ୍ରତିକ୍ରିୟା ପ୍ରକାଶ ପାଉଛି ।