ଜଳେଶପଟ୍ଟା ଆଶ୍ରମ ମୁଖ୍ୟଙ୍କୁ ହତ୍ୟା ଧମକ ଘଟଣା । ଅଭିଯୁକ୍ତକୁ ଗିରଫ କଲା ରାୟଗଡା ପୋଲିସ । ଆଶ୍ରମ ଯାଇ ସୁରକ୍ଷା ବ୍ୟବସ୍ଥା ଦେଖିଲା ବିଜେପି ପ୍ରତିନିଧି ଦଳ ।
କନକ ବ୍ୟୁରୋ: ବନ୍ଧୁକଧାରୀ ସୁରକ୍ଷା କର୍ମୀଙ୍କ ଆଢୁଆଳରେ କନ୍ଧମାଳର ଜିଲ୍ଲା ତୁମୁଡିବନ୍ଧ ଜଲେଶପଟ୍ଟା ଓ ଚକାପାଦ ଆଶ୍ରମ । ଆଶ୍ରମ ମୁଖ୍ୟଙ୍କୁ ହତ୍ୟା ଧମକ ଏବଂ ଆଶ୍ରମକୁ ବୋମା ପକାଇ ଉଡାଇ ଦିଆଯିବା ଧମକ ପରେ ଏପରି ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଦୁଇଟି ଫୋନକଲରେ ଧମକ ପରେ ଏହାକୁ ବେଶ ଗୁରୁତର ସହ ନେଇଛି ପୋଲିସ ।
Kanak News is now on WhatsApp
Join and get latest news updates delivered to you via WhatsApp
କାରଣ ୨୦୦୮ ମସିହା ଅଗଷ୍ଟ ୨୨ ତାରିଖରେ ଆଶ୍ରମରେ ରହୁଥିବା ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କୁ ଏଭଳି ଧମକପୂର୍ଣ୍ଣ ଚିଠି ଆସିଥିଲା । ଏହାର ଦିନକ ପରେ ଦୁର୍ବୃତ ଆଶ୍ରମ ମଧ୍ୟରେ ପଶି ସରସ୍ୱତୀଙ୍କୁ ହତ୍ୟା କରିଥିଲେ ।
ଗତ ୨୪ ଘଂଟା ମଧ୍ୟରେ ତୁମୁଡିବନ୍ଧ ଜଲେଶପଟ୍ଟା ଓ ଚକାପାଦ ଆଶ୍ରମର ମୁଖ୍ୟ ଜୀବନା ମୁକ୍ତାନନ୍ଦ ପୁରୀଙ୍କୁ ଆସିଥିଲା ଦୁଇଟି ଫୋନ କଲ । ଏହି ଫୋନ କଲରେ ଦୁବୃର୍ତ୍ତ ଧମକ ଦେଇଥିଲା ଓ ଆଶ୍ରମକୁ ବୋମା ପକାଇ ଉଡ଼ାଇ ଦିଆଯିବ ବୋଲି କହିଥିଲା । ରବିବାର ସକାଳ ୯ଟା ସମୟରେ ପୁଣି ଥରେ ଅଜଣା ନମ୍ବରରୁ ଆସିଥିଲା ଦ୍ୱିତୀୟ ଫୋନ କଲ । ଆସନ୍ତା ୪ ଦିନ ମଧ୍ୟରେ ତାଙ୍କୁ ହତ୍ୟା କରାଯିବ ବୋଲି ଧମକ ଦିଆଯାଇଥିଲା ।
ଗୁରୁତ୍ୱପୂର୍ଣ୍ଣ ଘଟଣାକ୍ରମରେ ଫୋନରେ ଧମକ ଦେଇଥିବା ଯୁବକକୁ ଗିରଫ କରିଛି ରାୟଗଡା ପୋଲିସ । । ପୋଲିସର କହିବା ହେଲା ଆଶ୍ରମ ମୁଖ୍ୟଙ୍କ ସହ ପୂର୍ବ ବିବାଦ କାରଣରୁ ଏପରି ଧମକ ଦେଇଛି ଯୁବକ । ଅନ୍ୟପକ୍ଷରେ କିନ୍ତୁ ଆଶ୍ରମ ମୁଖ୍ୟ ଏହି ଗିରଫଦାରୀକୁ ଗ୍ରହଣ କରୁନାହାନ୍ତି ।
ସେପଟେ ବିଜେପିର ଏକ ପ୍ରତିନିଧି ଦଳ ଆଜି ଜଲେଶପଟ୍ଟା ଆଶ୍ରମ ଯାଇ ଜୀବନା ମୁକ୍ତାନନ୍ଦ ପୁରୀଙ୍କୁ ଭେଟିବା ସହିତ ସୁରକ୍ଷା ବ୍ୟବସ୍ଥା ନେଇ କନ୍ଧମାଳ ଏସପିଙ୍କ ସହିତ ଆଲୋଚନା କରିଛନ୍ତି । ଏପଟେ ବିଶ୍ୱ ହିନ୍ଦୁ ପରିଷଦ ଏବଂ ରାଷ୍ଟ୍ରୀୟ ସ୍ୱୟଂ ସେବକ ସଂଘର ଏକ ଗୁରୁତ୍ୱପୂର୍ଣ୍ଣ ବୈଠକ ହୋଇଛି ।