ଧରାପଡ଼ିବ ରାସନ କାର୍ଡ ଜାଲିଆତି । କଟିଯାଇପାରେ ଲକ୍ଷାଧିକ ଲୋକଙ୍କ ରାସନ୍ କାର୍ଡ, ମନ୍ତ୍ରୀ କହିଲେ, ଆଧାର କାର୍ଡ଼ ଲିଙ୍କ୍ ନଥିଲେ ବାଦ୍ ପଡ଼ିବେ ହିତାଧିକାରୀ
କନକ ବ୍ୟୁରୋ : ଆପଣ ରାସନ କାର୍ଡ ସହ ଆଧାର କାର୍ଡ ଲିଙ୍କ୍ କରିନାହାନ୍ତି କି? ତେବେ ଶୀଘ୍ର କରାଇ ନିଅନ୍ତୁ, ନହେଲେ କଟିଯାଇପାରେ ଆପଣଙ୍କ ରାସନ୍ କାର୍ଡ । ଗୋଟିଏ ପଟେ ୱାନ୍ ନେସନ୍-ୱାନ୍ ରାସନ୍ କାର୍ଡ ପାଇଁ ପ୍ରସ୍ତୁତି ଚାଲିଥିବା ବେଳେ ରାଜ୍ୟରେ ଆରମ୍ଭ ହୋଇଛି ରାସନ୍ କାର୍ଡ ସହ ଆଧାର କାର୍ଡ ଲିଙ୍କ୍ ପ୍ରକ୍ରିିୟା । ଲକ୍ଷାଧିକ ଲୋକ ଜାଲିଆତି କରି ରାସନ କାର୍ଡ ହାତେଇ ଥିବା ନେଇ ଅଭିଯୋଗ ହୋଇ ଆସୁଛି । ଏକାଧିକ ରାସନ୍ କାର୍ଡ ହାତେଇଥିବା ବ୍ୟକ୍ତିଙ୍କୁ ଚିହ୍ନଟ କରି ସେମାନଙ୍କୁ ଖାଦ୍ୟ ସୁରକ୍ଷା ଆଇନରୁ ବାଦ ଦେଇପାରନ୍ତି ସରକାର ।
Kanak News is now on WhatsApp
Join and get latest news updates delivered to you via WhatsApp
ଯଦି ରାସନ୍ କାର୍ଡ ରହିଛି, କିନ୍ତୁ ଆଧାର କାର୍ଡ ନାହିଁ, ତେବେ ଅକାମୀ ହୋଇଯିବ ଆପଣଙ୍କ ରାସନ୍ କାର୍ଡ । ରାସନ୍ କାର୍ଡ ସହ ଆଧାର କାର୍ଡ ଲିଙ୍କ୍ ନହେଲେ ଜାତୀୟ ଖାଦ୍ୟ ସୁରକ୍ଷା ତାଲିକାରୁ ବାଦ ପଡିବେ ହିତାଧିକାରୀ । ଲକ୍ଷ ଲକ୍ଷ ସ୍ୱଚ୍ଛଳ ବର୍ଗର ଲୋକ ରାସନ କାର୍ଡ ହାତେଇ ଥିବା ବେଳେ ଜଣେ ଜଣେ ହିତାଧିକାରୀ, ଏକାଧିକ ରାସନ୍ କାର୍ଡ ହାତେଇଥିବା ଅଭିଯୋଗ ହୋଇଆସୁଛି । ପାଖାପାଖି ୫ ବର୍ଷ କାଳ ଜାତୀୟ ଖାଦ୍ୟ ସୁରକ୍ଷା ଆଇନରେ ଏହି ହିତାଧିକାରୀମାନେ ଫାଇଦା ଉଠାଉଛନ୍ତି ।
ଆସନ୍ତାବର୍ଷ ଜୁଲାଇ ମାସରେ ସାରା ଦେଶରେ ୱାନ ନେସନ୍ – ୱାନ୍ ରାସନ୍ କାର୍ଡ ଯୋଜନା ଲାଗୁ କରିବାକୁ ମନସ୍ଥିର କରିଛନ୍ତି ମୋଦୀ ସରକାର । ଫଳରେ ଦେଶସାରା ରାସନ୍ କାର୍ଡ ସହ ଆଧାର କାର୍ଡ ଲିଙ୍କ୍ ପ୍ରକ୍ରିିୟା ଆରମ୍ଭ ହୋଇଛି । ଓଡ଼ିଶାରେ ମଧ୍ୟ ଆଧାର କାର୍ଡ ଲିଙ୍କ୍ ପ୍ରକ୍ରିୟା ଆରମ୍ଭ ହୋଇଥିବା ବେଳେ ଲକ୍ଷାଧିକ ଲୋକଙ୍କ ରାସନ୍ କାର୍ଡ କଟିଯିବ ବୋଲି ସୂଚନା ମିଳିଛି । ୨୦୧୪ରେ ଜାତୀୟ ଖାଦ୍ୟ ସୁରକ୍ଷା ଆଇନରେ ରାସନ୍ କାର୍ଡ ଯୋଗାଇ ଦିଆଯାଇଥିଲା । ସେତେବେଳେ ଆଧାର ଲିଙ୍କକୁ ବାଧ୍ୟତାମୂଳକ କରାଯାଇନଥିଲା । ଫଳରେ ଅନେକ ଅଯୋଗ୍ୟ ହିତାଧିକାରୀ, ରାସନ୍ କାର୍ଡ ହାତେଇବାରେ ସଫଳ ହୋଇଥିଲେ ।
ଓଡ଼ିଶାରେ ୩ କୋଟି ୨୬ ଲକ୍ଷ ୪୧ ହଜାର ଲୋକଙ୍କୁ ଖାଦ୍ୟ ସୁରକ୍ଷା ଆଇନରେ ଅନ୍ତର୍ଭୁକ୍ତ ହୋଇଛନ୍ତି । ଯାହା ମୋଟ ଜନସଂଖ୍ୟାର ପ୍ରାୟ ୭୮ ପ୍ରତିଶତ । ସେପଟେ ୨୦୧୮ ଗାନ୍ଧୀ ଜୟନ୍ତୀ ଦିନ ରାଜ୍ୟ ସରକାର ନିଜସ୍ୱ ଖାଦ୍ୟ ସୁରକ୍ଷା ଯୋଜନା ଘୋଷଣା କରିଥିଲେ । ଜାତୀୟ ଖାଦ୍ୟ ସୁରକ୍ଷା ଆଇନରେ ବାଦ ପଡ଼ିଥିବା ୨୫ ଲକ୍ଷ ହିତାଧିକାରୀଙ୍କୁ ଏଥିରେ ଅନ୍ତର୍ଭୁକ୍ତ କରିଛନ୍ତି । ଖାଦ୍ୟ ସୁରକ୍ଷା ଆଇନରେ ରାଜ୍ୟର ଲକ୍ଷ ଲକ୍ଷ ଗରିବ ଲୋକ ବାଦ ପଡିଥିବା ସରକାର କହୁଥିବା ବେଳେ ଅଯୋଗ୍ୟ ହିତାଧିକାରୀଙ୍କୁ କିପରି ରାସନ କାର୍ଡ ଦିଆଗଲା ବୋଲି ପ୍ରଶ୍ନ ଉଠାଇଛନ୍ତି ବିରୋଧୀ । ରାସନ କାର୍ଡ ନେଇ ଧରପଗଡ଼ ଆରମ୍ଭ ହୋଇଥିବା ବେଳେ କାଳିଆ ଯୋଜନାର ଚାଲିଛି ଖୋଳତାଡ଼ । ଯେଉଁ ଅଯୋଗ୍ୟ ହିତାଧିକାରୀ କାଳିଆ ଟଙ୍କା ନେଇଛନ୍ତି, ସେମାନଙ୍କ ଠାରୁ ଟଙ୍କା ଫେରାଇ ଆଣିବା ପ୍ରକ୍ରିିୟା ଆରମ୍ଭ ହୋଇଛି ।