ମନମୋହୁଛି ଧାନ ଓ କାଇଁଚ ରାଖୀ । ଧର୍ମଶାଳାରେ ଲୋକଙ୍କ ପ୍ରଥମ ପସନ୍ଦ ପାଲଟିଛି କାଇଁଚ ରାଖୀ, କୋରାପୁଟରେ ଧାନ ରାଖୀ ଷ୍ଟଲରେ ଗ୍ରାହକଙ୍କ ଭିଡ ।
କନକ ବ୍ୟୁରୋ : ଧାନ ! ମଣିଷ ଜୀବନର ଏକ ଗୁରୁତ୍ୱପୂର୍ଣ୍ଣ ଅଂଶ । ଖାଦ୍ୟରୁ ଆରମ୍ଭ କରି ପୂଜା ପାର୍ବଣ, ସବୁଠି ଖୋଜା ପଡେ ଧାନ । ଆଉ ଯେତେବେଳେ ଧାନରେ ରାଖୀ ତିଆରି ହୁଏ, ସେତେବେଳେ ତାର ଚାହିଦା ଅନ୍ୟରାଖୀ ଅପେକ୍ଷା ଢେର ଅଧିକ । କୋରାପୁଟ ଜିଲ୍ଲା କୋଟପାଡ଼ର ଆଶା ସ୍ୱୟଂ ସହାୟକ ଗୋଷ୍ଠୀ ଦ୍ୱାରା ପ୍ରସ୍ତୁତ ହୋଇଛି ଧାନ ରାଖୀ । ପୂର୍ବରୁ ଧାନରେ ବିଭିନ୍ନ ପ୍ରକାର ମୂର୍ତି ନିର୍ମାଣ କରୁଥିବା ମହିଳାମାନେ ଏଥର ରାଖୀ ତିଆରି କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଚଳିତବର୍ଷ କରୋନା ଯୋଗୁଁ ବ୍ୟବସାୟ ପ୍ରଭାବିତ ହୋଇଥିଲେ ବି ଧାନ ରାଖୀର ବିକ୍ରି ପାଇଁ ଓରମାସ ପକ୍ଷରୁ ବଜାର ବ୍ୟବସ୍ଥା କରାଯାଇଛି । ରାଖୀର ଦାମ ୩୦ ଟଙ୍କାରୁ ୭୫ଟଙ୍କା ପର୍ଯ୍ୟନ୍ତ ରହିଛି । ରାଖୀ ଗୁଡିକ ଦେଖିବାକୁ ଖୁବ୍ ସୁନ୍ଦର । ୧୭ ତାରିଖରୁ ଆରମ୍ଭ ହୋଇଥିବା ଷ୍ଟଲରେ ରାକ୍ଷୀ ପୂର୍ଣ୍ଣିମା ମଧ୍ୟରେ ଭଲ ବ୍ୟବସାୟ ହେବ ବୋଲି ଆଶା ରହିଛି । ଏହି ଷ୍ଟଲରେ ଧାନ ରାଖୀ ସହ କୋଟପାଡ଼ର ପେଡ଼ା, ମିରିଗାନ ମାସ୍କ ମଧ୍ୟ ବିକ୍ରି କରାଯାଉଛି । ଏ ବର୍ଷର ବ୍ୟବସାୟକୁ ଦେଖି ଆସନ୍ତା ବର୍ଷ ଅଧିକ ଷ୍ଟଲ ଖୋଲିବାକୁ ଆସା ରଖିଛି ଓରମାସ ।
ସେହିଭଳି ରାଖୀ ତିଆରିରେ ବ୍ୟସ୍ତ ବଡଚଣା ବ୍ଲକ ଚମ୍ପାପୁର ଗାଁର ମହିଳା । ଆଗରୁ କାଇଁଚରେ ବିଭିନ୍ନ ସାମଗ୍ରୀ ପ୍ରସ୍ତୁତ କରି ବେଶ୍ ସୁନାମ ଅର୍ଜନ କରିଥିବା ଏହି ମହିଳାମାନେ ଏବେ ତିଆରି କରୁଛନ୍ତି କାଇଁଚର ରାଖୀ । କିଏ ରାଖୀ ତିଆରୀ କରୁଛନ୍ତି ତ ଆଉ କିଏ ରାଖୀ ଗୁନ୍ଥିବା ସହ ପ୍ୟାକିଂ କରିବାରେ ବ୍ୟସ୍ତ । ପ୍ରାୟ ୪୦ ଜଣ ମହିଳା ରଙ୍ଗବେରଙ୍ଗର କାଇଁଚ ରାଖୀ ତିଆରି କରି ବେଶ୍ ଦୁଇ ପଇସା ରୋଜଗାର କରିବାରେ ସକ୍ଷମ ହୋଇପାରିଛନ୍ତି ।
୨୦୧୩ ମସିହାରୁ ଚମ୍ପାପୁର ଗାଁର ୪୦ଜଣ ମହିଳା କାଇଁଚର ସାମଗ୍ରୀ ପ୍ରସ୍ତୁତ କରୁଛନ୍ତି । ପ୍ରଥମେ କଳିଙ୍ଗନଗର ଶିଳ୍ପକେନ୍ଦ୍ର ପକ୍ଷରୁ ଏମାନଙ୍କୁ ସହଯୋଗ ମିଳୁଥିଲା । ଏବେ ଓରମାସ୍ ବଢାଇଛି ସହଯୋଗର ହାତ । କାଇଁଚ ରାଖୀ ତିଆରି କରିବା ନେଇ ଓରମାସ ପକ୍ଷରୁ ପ୍ରଶିକ୍ଷଣ ଓ ପ୍ରସ୍ତୁତି ସାମଗ୍ରୀ ଯୋଗାଇ ଦିଆଯାଉଛି । ବିକ୍ରି ପାଇଁ ଷ୍ଟଲ ମଧ୍ୟ କରାଯାଇଛି । ଏବେ ସୁଦ୍ଧା ପ୍ରାୟ ୬୦ହଜାର ଟଙ୍କାର ରାଖୀ ବିକ୍ରି କରିବାରେ ସକ୍ଷମ ହୋଇଛନ୍ତି ଏହି ମହିଳାମାନେ । ରାଖୀର ଦର ୨୫ ଟଙ୍କାରୁ ୫୦ ଟଙ୍କା ରହିଛି । ସରକାରଙ୍କ ପକ୍ଷରୁ କାଇଁଚ ବ୍ୟବସାୟର ଅଭିବୃଦ୍ଧି ନିମନ୍ତେ ଆର୍ôଥକ ସହାୟତା ଯୋଗାଇ ଦିଆଗଲେ ଏହି ଗ୍ରାମୀଣ ମହିଳାମାନେ ଅଧିକ ସ୍ୱାବଲମ୍ବୀ ହୋଇପାରିବେ ।